VOV4.Sêdang -  Hâi lơ 6/4, Khu xiâm pơkuâ ngăn lêng tơkŭm po hneăng hôp mơ’no tơdrêng tung um tơvi rôh hôp má 14 Khu kăn rak tơniăn hơniâp lĕm tiô rôh má 4, pơla hơnăm 2021-2023 tung pơla po Hneăng hôp mâu Kăn xiâm pơkuâ ngăn lêng ASEAN po rơdâ. Đăi tă Mạc Đức Trọng, Ngế xiâm pơkuâ Khu kăn ki rơkê ‘na rak tơniăn  pro hơniâp lĕm Việt Nam ƀă jâ Matsuzawa Tomoko, Ngế xiâm pơkuâ Khu rơkê rak tơniăn hơniâp lĕm kong têa Nhuk, hlối cho ngế Pơkuâ hneăng hôp.

Hneăng hôp pơtối, mơnhên hnoăng cheăng pêi, ki nhoăm, ki rơdêi, hnoăng veăng ‘no dêi Việt Nam tung mâu luât pơkâ hên troăng ‘na rak tơniăn pro hơniâp lĕm Khu lâp kong têa tung kơpong. Kố cho rôh ki mơdêk tơpui tơno hnê tối ‘na tơdroăng cheăng, tối ăm dêi rơpó ‘nâi túa pêi cheăng pơla mâu kong têa tung khu ƀă Khu lâp kong têa vâ mơdêk veăng pêi dêi mâu vâi kơdrâi tung mâu tơdroăng ‘na rak tơniăn hơniâp lĕm.

Đăi tă Mạc Đức Trọng ăm ‘nâi: Hneăng hôp mâu kăn xiâm pơkuâ ngăn lêng ASEAN po rơdâ hiăng veăng ‘no hên tung mơdêk tơrŭm kring tơniăn, ‘na lêng, xua vâ pro hơniâp lĕm tơniăn, mơnhông a kơpong ƀă tung lâp plâi tơnêi.

Gương tơplôu ƀă tơbleăng