VOV4.Sêdang - A kong pơlê Kon Tum, rak vế, pêi pro tiô tơdroăng hnê tối dêi Chin phuh ƀă Khu xiâm pơkuâ ngăn lêng, mê tơdroăng cheăng hbrâ, mơdât pơreăng COVID-19 drô troăng tíu tơkăng kong a kong pơlê Kon Tum dế pơtối châ khu lêng mô đô̆i gak tíu tơkăng kong pêi pro hên hnoăng cheăng vâ khoh kâi châ mơdât pơreăng. Khoa Điềm, Ngế chêh hlá tơbeăng cheăng tung Rơ’jíu Việt Nam a kơpong Tây Nguyên ai chêh tối ‘na tơdroăng cheăng ki mê a kơpong tíu tơkăng kong Bờ Y, ối tối cho 3 hơlâ Đông Dương, tíu ki ai troăng tơkăng kong ƀă 2 to kong têa Lếo prế Kul.

Kơpong bo cheăng lâp plâi tơnêi Bờ Y, ối tung cheăm Bờ Y, tơring Ngọc Hồi, kong pơlê Kon Tum ai lối 20km troăng tơkăng kong ƀă kong têa Lếo prế Kul đi đo ai hên tơdroăng ki ôh tá tơniăn sap ing ‘na tá tơkăng kong mot tung tơnêi têa pin ôh tá tro luât. Hlo tơdroăng ki tối a kơpêng, Đông Mố đô̆i gak tơkăng kong bo cheăng lâp plâi tơnêi Bờ Y hiăng pro 6 tôh, gak séa ngăn pơreăng COVID-19 vâ rak ki tơniăn ƀă ukố umê.

A mâu tíu gak kố rơtế ƀă 45 ngế kăn ƀô̆, lêng mố đô̆i gak tơkăng kong ối ai mâu khu lêng ƀă kuăn pơlê dêi cheăm rak vế gak, lăm pơtrui a drô troăng tơkăng kong tá kong hâi ƀă kong măng. Thiê̆u tă Đoàn Xuân Trường, Kăn phŏ Đô̆i mơhnhôk khu lêng ƀă kuăn pơlê, Đông mố đô̆i gak tơkăng kong dêi bo cheăng lâp plâi tơnêi Bờ Y ăm ‘nâi, rêm ngế kăn ƀô̆, lêng veăng tung mâu tôh, tíu gak pơrá mơ-eăm tơkâ luâ xơpá vâ pêi klêi hnoăng cheăng:

“Ngin plâ hâi măng ối ƀă tôh, tíu gak vâ lăm pơtrui séa ngăn vâ ôh tá ăm ai ngế ki lâi châ mot tung tơnêi têa pin ƀă rak vế krá tơniăn pôi tá ăm pơreăng châ tâ tú. Maluâ nhŏng o ngin cheăng a tôh, tíu gak xuân xơpá khât, ‘na liăn ngân hiâm mơno. Mê nếo tơdroăng ki prôk lăm xuân xơpá la ngin ‘mâi mơnhông tơdroăng ki xơpá mê vâ pêi klêi hnoăng cheăng”.

Kăn ƀô̆, lêng mố đô̆i gak tơkăng kong bo cheăng lâp plâi tơnêi Bờ Y lăm pơtrui hbrâ mơdât pơreăng COVID-19 a tíu tơkăng kong

Rơtế ƀă mơdêk rak ngăn, krá tơniăn tơdroăng ki kuăn pơlê ‘na tá tíu tơkăng kong mot tung kong pơlê ôh tá tro luât, Đông mố đô̆i gak tơkăng kong bo cheăng lâp plâi tơnêi Bờ Y xuân mơdêk ó hnoăng cheăng tối tơbleăng, hbrâ mơdât pơreăng COVID-19 ăm tơmối ƀă kuăn pơlê ki ai chiâk deăng achê kơpong tíu tơkăng kong. Kăn ƀô̆ lêng dêi đông mố đô̆i gâk tơkăng kong troh rêm hngêi kuăn pơlê hnê tối ăm kuăn pơlê truâ kên pâng môh rơkong drêng lăm pêi chiâk deăng ƀă pêi pro kơtăng mâu tơdroăng ki pơkâ thế ‘na hbrâ mơdât pơreăng; pôi tá tơkâ luâ tíu tơkăng kong pêi chiâk deăng ki ôh tá tro luât.

Klêi mê, ăm hlo rơtế ƀă tơdroăng ki mơdêk ki rơkê plĕng ‘na ki rơ-iô dêi COVID-19, rêm ngế kuăn pơlê a kơpong tíu tơkăng kong ối cho khu ngế dêi khu lêng mố đô̆i gak tơkăng tung hnoăng cheăng hbrâ mơdât pơreăng ƀă rak vế gak kring tíu tơkăng kong.

Jâ Nang Cứu, a pơlê Iệc, cheăm Pờ Y ai chiâk achê tíu tơkăng kong ki tơdjêp ƀă kong têa Lếo ăm ‘nâi:

“Drêng pêi chiâk akố vâi krâ nhŏng o tung pơlê hmâ châ kăn ƀô̆ mố đô̆i gak tơkăng kong hnê tối. Vâi krâ nhŏng o tung pơlê ƀă á trâm mâu ngế ki tơviah mê tơbleăng ăm mâu vâi tăm mố đô̆i gâk tơkăng kong ‘nâi hlối”.

Hnê tối hbrâ mơdât COVID-19 ăm kuăn pơlê kơpong tíu tơkăng kong xua Đông mố đô̆i gak tơkăng kong bo cheăng lâp plâi tơnêi Bờ Y rak ngăn

Trung tă Đặng Nguyên Hương, kăn pơkuâ ngăn Đảng ủy, Chính trị viên Mố đô̆i gak tơkăng kong bo cheăng lâp plâi tơnêi Bờ Y ăm ‘nâi, kăn ƀô̆, lêng dêi Đông khŏm mơ-eăm pôi tá ăm tro kơdrâ, ‘na tơdroăng dêi pơreăng COVID-19:

“Hlo ôh tá tơniăn dêi pơreăng COVID-19 a Kul, Lếo, ngin hiăng tơbleăng mâu troăng hơlâ ƀă tơdroăng cheăng a tíu tơkăng kong vâ ‘nâi nhên pơreăng COVID-19 ‘na tá tơkăng kong vâ tơkŭm hnê tối ăm khu lêng ƀă kuăn pơlê ƀă kăn ƀô̆, lêng tung tíu pêi cheăng ‘nâi nhên ‘na pơreăng vâ tối tơbleăng hnoăng cheăng hbrâ mơdât pơreăng COVID-19. Khŏm mơ-eăm pôi tá ăm pơreăng tâ tú ing kong têa ki ‘na tá mot tung kong pơlê mê ah mot tung tíu pêi cheăng”.

Hlo ôh tá tơniăn dêi pơreăng COVID-19, ai troăng tơkăng kong xŏn lối 292 km tơdjêp ƀă kong têa Lếo ƀă Kul, khu lêng mố đô̆i gak tơkăng kong Kon Tum nôkố dế rak vế 66 tíu gak, ƀă lối 400 ngế kăn ƀô̆, lêng drô troăng tơkăng kong vâ pêi pro hnoăng cheăng péa tơdroăng rế rak vế tíu tơkăng kong Tơnêi têa rế hbrâ mơdât pơreăng COVID-19 châ tơƀrê.

Khoa Điềm chêh

Katarina Nga tơplôu ƀă tơbleăng