VOV4.Sêdang - Ƀă a Lâm Đồng, khu râ kăn pơkuâ dế tơvâ ƀă tơdroăng hbrâ mơdât pơreăng COVID 19 ƀă hbrâ ăm tơdroăng tâ phĭu, tơdroăng chiâ xo tơnêi, hmốu ôh tá tro luât hiăng xông tâ tú ó a cheăm Hiệp An, tơring Đức Trọng, kong pơlê Lâm Đồng. Ôh tá bê xâu, chiâ xo tơnêi, hmốu a kơmăng lơ hâi pơtê cheăng a mơ’nui măng tĭng môi tiah hdrối nah, tơdroăng chiâ xo tơnêi, hmốu ôh tá tro luât xuân pơtối ai, tíu ki mê bu kơtăn tíu pêi cheăng Vi ƀan cheăm bu hrĭng met.

A ƀăng tơnêi pêi chiâk deăng 283, hlá mơ-éa lơgât tơnêi 6A ối achê kong loăng hngó ngiât lĕm, chât rơpâu khô̆i tơnêi, hmốu hiăng châ môi khu mơ’no liăn chiâ xo châ hluăn, djâ tíu ê tê. Tung kơpong, tơdroăng chiâ xo tơnêi, hmốu xuân dế ai hên hĭn, pro tá kơpong kố chiâng môi tíu vâi chiâ xo tơmeăm ki hên. Drêng ngin troh amê, mâu rơxế kân pơto tơmeăm ki hngăm, kơmăi pong hmốu ƀă hên kŏng nhân ki mung pêi cheăng hiăng kơtâu hdâ. Tung môi pơla tê, tíu kố bu u ối môi toăng kơmăi chiâ ki kân ôh tá ai ngế pơkuâ.

Tíu chiâ xo tơnêi, hmốu ôh tá tro luât a cheăm Hiệp An

Tíu chiâ xo hmốu, tơnêi ôh tá tro luât kố hiăng pêi cheăng rêm hâi tung hên khế hiăng hluâ, achê kơpong kuăn pơlê rêh ối, kơtăn tíu pêi cheăng Vi ƀan cheăm tá hâi châ 2km, laga khu râ kăn pơkuâ cheăm Hiệp An bu pơxâu phâk liăn 1 xôh ăm i klêi tê a hâi lơ 27/4. Pôa Uông Thanh Hải, ngế pêi ‘na vê hdró tơnêi tíu cheăm Hiệp An tối, xiâm kối ôh tá châ hlo teăm tơdrêng mâu tơdroăng pro xôi xua mâu ngế ki kố vâi rơkê hmuâ, tơdrêng amê khu kăn ƀô̆ cheăm iâ ƀă tơvâ hên tơdroăng ki ê vâ pêi:

“Mơngế pêi cheăng ngin mê iâ xua mê ôh tá kâi vâ mơdât tâi tâng mâu tơdroăng chiâ tơnêi, klêi mê chiâ xo hmốu ôh tá tro luât kố. Chât khât tơdroăng cheăng lối hên tâng pơchông ƀă ngin. Pakĭng mê, rêm roh ngin lăm troh amê, mê mâu rơxế vâi hiăng vê dêi prôk u ê, ôh tá châ rup tơdrêng mê ôh tá ai xiâm kối vâ pơxâu phâk tơdroăng pro xôi chiâ xo tơnêi, hmốu ôh tá tro luât’’.

Chât rơpâu mêt khô̆i tơnêi, hmốu akố hiăng pơto tê châ hluăn

Kăn ƀô̆ pơkuâ mê mơnĕn xua hên tơdroăng cheăng ki ê, laga ai mâu tíu ki ê achê troăng kân lăm ngi kong têa ê kơxô̆ 20, kơtăn Vi ban cheăm Hiệp An to lâi hrĭng met xuân ai tơdroăng chiâ xo tơnêi, hmốu tiah mê há. Mâu rơxế chiâ, gu tơnêi ôh tá bê xâu kơbố vâi xuân kơnhêng chiâ, gu, chiâ xo tơnêi, hmốu a kong hâi laga khu râ kăn pơkuâ cheăm ngăn môi tiah ôh tá ‘nâi ki klâi. Troh drêng ngin mơhno um xup ƀă kơ-êng, tíu chiâ xo tơnêi, hmốu kố hôm ai mơ-éa phêp há lơ ôh mê khu râ kăn pơkuâ cheăm Hiệp An nếo tơkŭm po khu ngế lăm seá ngăn, mơnhên tơdroăng pro xôi ƀă pro mơ-éa pơxâu phâk liăn.

Pôa Hồ Hữu Hiếu, Kăn hnê ngăn Vi ƀan cheăm Hiệp An mơnhên, khu râ kăn pơkuâ cheăm ôh tá lôi ôh tơdroăng kố, ôh tá ‘nâi pro ti lâi tơdroăng gu tơnêi, chiâ xo tơnêi, hmốu ôh tá tro luât. Pôa tối, chiâng ai tơdroăng kố xua tơnêi tíu kân rơdâ, rơnâk, thông, mâu ngế ki chiâ xo tơnêi, hmốu hmâ pêi cheăng a mâu hâi pơtê cheăng, a kơmăng xua mê pá vâ châ hlo. Laga pôa Hồ Hữu Hiếu xuân tối, cheăm khŏm mơdât tơdroăng kố:

“Tung pơla kố nah, Vi ƀan cheăm pơxâu phak hên ngế pro xôi. Laga, xua Hiệp An kơpong kân rơdâ, tơnêi rơnâk, ngo ngối, thông klong, mâu ngế ki chiâ xo tơnêi, hmốu kố vâi pêi cheăng chôu ki pơtê cheăng, kơmăng vâ chiâ xo tơnêi, hmốu ôh tá tro luât. Tung la ngiâ, cheăm Hiệp An kô khŏm pơxâu phak mâu ngế ki pro xôi, rak tơniăn ôh tá ăm ai tơdroăng gu tơnêi, chiâ xo tơnêi, hmốu ôh tá tro luât tung cheăm”.

Kơmăi chiâ, gu tơnêi ôh tá tro luât tá hâi teăm vê djâ tíu ê

“Khŏm mơdât’’ pơxâu phak vâ rak tơniăn, rơkong mơnhên dêi khu râ kăn pơkuâ cheăm Hiệp An, tơring Đức Trọng, kong pơlê Lâm Đồng xuân ăm hlo, hdrối nah, cheăm pơkuâ tá hâi kơtăng. Ƀă tơdroăng ki mê hiăng tiâ ăm tơdroăng ki chiâ xo tơnêi, hmốu ôh tá tro luât a tíu kố, xuân ối ai tơdroăng kố môi tiah vâ pơloăng mơnúa pơlê pơla ƀă luât.

Quang Sáng chêh

A Sa Ly tơplôu ƀă tơbleăng