VOV4.Xơ Đăng - Pôa Hầu A Lềnh, ngế xiâm pơkuâ Vi ƀan hdroâng kuăn ngo nếo ai rôh pêi cheăng ƀă khu pơkuâ ngăn Đảng, Vi ƀan hnê ngăn kong pơlê Yên Bái ‘na pêi pro hnoăng cheăng hdroâng kuăn ngo, hnoăng cheăng hbrâ tối tơbleăng pêi pro Tơdroăng pơkâ dêi tơnêi têa ‘na mơnhông mơdêk cheăng kâ rêh ối pơlê pơla kơpong hdroâng kuăn ngo ƀă kong ngo hneăng hơnăm 2021 – 2030.

A rôh pêi cheăng, pôa Đỗ Đức Duy, kăn pơkuâ ngăn Đảng kong pơlê Yên Bái pói rơhêng vâ, Vi ƀan hdroâng kuăn ngo pơtối tơmâng ngăn, tŏng kum kong pơlê Yên Bái pêi pro tro troăng hơlâ tŏng kum hdroâng kuăn ngo tung la ngiâ; mê cho tơdroăng ki mơhnhôk mâu liăn ngân; troăng hơlâ kum ăm mâu ngế ki châ kuăn pơlê loi nhuô̆m; rak ngăn kong; mơnhông pêi chiâk deăng tơtro ƀă ôm hyô ƀă hên tơdroăng ki ê.

Pôa Hầu A Lềnh pơkâ thế kong pơlê Yên Bái mơdêk hnoăng cheăng hnê tối, mơhnhôk ki rơkê plĕng dêi mâu khu pơkuâ tơdroăng kal kí ‘na hnoăng cheăng hdroâng kuăn ngo, pêi pro troăng hơlâ tŏng kum hdroâng kuăn ngo, pro tơdâng tơ’mô tung kuăn pơlê; séa ngăn, ‘mâi rơnêu troăng hơlâ tŏng kum hdroâng kuăn ăm tơtro tung hneăng hơnăm ki nếo; hriăn ngăn hnê mơhno tíu, tơkŭm mâu liăn ngân tŏng kum, pơkâ tơleăng mâu tơdroăng ki xơpá, a kơpong hdroâng kuăn ngo.

Katarina Nga tơplôu ƀă tơbleăng