VOV4.Sêdang - Pơreăng kân Covid-19 dế tâ tú rơ-iô tung lâp plâi tơnêi, pro lối 2,4 rơtuh ngế hlâ, pro pá ‘na cheăng kâ thăm rế kơdroh ó. Hlo tơdroăng ki rơ-iô dêi pơreăng tâ tú, Đảng, Tơnêi têa Việt Nam hiăng ƀă dế mơ-eăm pêi pro mâu tơdroăng vâ tơniăn hnoăng rêh ối dêi kuăn pơlê ƀă kuăn pơlê kong têa ê ki rêh ối a Việt Nam, hlối veăng pêi pro mâu tơdroăng ki tro tung hbrâ mơdât pơreăng kân, hlối tơnuăn ‘na tơdroăng rêh ối dêi kuăn pơlê tung hbrâ mơdât pơreăng kân, tơniăn tung rêh ối cheăng kâ dêi kuăn pơlê.

Mơ-éa tơbleăng tơniăn krê dêi tơnêi têa Việt Nam Dân chuh kŏng hoa, châ Pôa Hồ Chí Minh, Kăn xiâm hnê ngăn tơnêi têa hneăng apoăng pơchuât a plông kân Ba Đình hâi lơ 2/9/1945 hiăng mơnhên “Tâi tâng rêm ngế pơrá ai hnoăng tơdâng tơ’mô. Xeăng hiăng ăm vâi hnoăng ki mê ôh tá ai kơbố chiâng pro tơ‘nhê; tung mâu hnoăng ki mê, ai hnoăng châ rêh, hnoăng tơniăn lĕm ƀă hnoăng châ hơniâp lĕm”.

Drêng ai pơreăng kân Covid 19 xông tâ tú ôh tá tơniăn, ki kơnâ má môi dêi hnoăng kuăn mơngế cho hnoăng châ rêh, châ kring vế châ chăn thăm rế hên tâ mê nếo. Kố cho tơdroăng ki Việt Nam hiăng, dế, ƀă pơtối pêi tâi ivá tơná vâ kring vế.

Sap ing ai pơreăng xông tâ tú, pôa Nguyễn Xuân phúc, Ngế pro xiâm hnê ngăn tơnêi têa mơnhên: Việt Nam hbrâ pleăng hnoăng cheăng xua tơdroăng châ tơƀrê ‘na cheăng kâ vâ hbrâ mơdât pơreăng, tơniăn ivá châ chăn dêi kuăn pơlê. Hâi lơ 30/1, Ngế pro xiâm hnê ngăn Chin phuh hiăng kĭ pơkâ mơjiâng Khu hnê mơhno tơnêi têa hbrâ mơdât pơreăng ếi troăng hiâm ki râ xua pơreăng nếo virus corona pro, xua pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ hnê ngăn cheăng Đảng Khu xiâm ngăn pơkeăng ƀă khăm pơlât pơkuâ xiâm.

Tâi tâng khu cheăng kal kí ƀă kuăn pơlê hiăng veăng mơdât pơreăng. Hên mâu troăng pêi kơtăng hiăng châ Đảng, Tơnêi têa Việt Nam pêi pro rĕng môi tiah pơchân kuăn pơlê pâng rơkong - môh a tíu tơdjuôm, tối ăm mâu ƀok thái pơkeăng ƀă klâ kơtăn a mâu tíu klâ kơtăn tơdjuôm drêng vêh ing kơpong ai pơreăng; pơlât tê kơtê ăm mâu ngế tro tâ SARS-CoV2 ƀă ăm tơmeăm kâ tê kơtê ƀă mơngế klâ ối kơtăn; kơdroh troh hlối pơtê tâi tâng prôk lăm tung tơnêi têa ƀă tơdroăng mot a tơnêi têa; pơkâ kuăn pơlê klâ kơtăn pơlê pơla tung pơla lối môi khế; pơkâ ƀă po rơdâ tơdroăng tŏng kum kuăn pơlê ƀă khu tê mơdró tro tơdjâk ó xua pơreăng kân Covid 19.

A kơpong vâi krâ hdroâng kuăn ngo ƀă kong ngo, tơdroăng hbrâ mơdât pơreăng châ tơmâng má môi, po rơdâ pêi kơtăng. Ƀă hên mơ-éa, Vi ƀan hdroâng mơngế hiăng tơbleăng Chin phuh tơbleăng Pơkâ kơxô̆ 06/CT-TTg hâi lơ 31/3/2020 pơkâ mâu ngế pêi cheăng, mơngế pơkuâ ing mâu troăng kŭn, troăng kân kơpong tíu tơkăng kong, kơdroh mâu tíu kơdrâm mơngế ƀă pêi pro tơtro mâu tơdroăng pâng rơkong - môh, xếo kŏng ƀă pơkeăng kơdê pơreăng, ti tăng rĕng ‘nâi tơdroăng pơreăng vâ ai troăng mơdât teăm tơdrêng, tơdrêng amê mơnhên ki tơdjâk dêi pơreăng troh vâi krâ hdroâng kuăn ngo rơtế pơkâ thế Chin phuh, Ngế pro xiâm hnê ngăn Chin phuh hnê mơhno po rơdâ pêi pro tơdâng tơ’mô mâu troăng hbrâ mơdât pơreăng ƀă kơpong hdroâng kuăn ngo ƀă kong ngo.

Vi ƀan hdroâng kuăn ngo xuân hiăng pơkuâ, hnê mơhno mâu kong pơlê kơpong vâi krâ kơpong hdroâng kuăn ngo ƀă kong ngo pêi pro kơtăng mâu mơ-éa, Pơkâ dêi Ngế pro xiâm hnê ngăn Chin phuh, hnê mơhno dêi Khu xiâm ngăn pơkeăng ƀă khăm pơlât ‘na tơdroăng hbrâ mơdât pơreăng. Vi ƀan hdroâng kuăn ngo xiân hiăng ai mâu tơdroăng tŏng kum, mơhno hiâm mơno tŏng kum dêi pó ăm vâi krâ hdroâng kuăn ngo kơtiê, tro tơdjâk xua pơreăng Covid 19 a cheăm Phố Là, tơring Đồng Văn ƀă tâi tâng kơxô̆ liăn cho 110 rơtuh liăn.

Tiô tơbleăng dêi Vi ƀan hdroâng kuăn ngo, roh pơreăng Covid 19 xông tâ tú apoăng ai 47/51 kong pơlê, pơlê kong kơdrâm kơpong vâi krâ hdroâng kuăn ngo ƀă kong ngo ai 5 ngế hdroâng kuăn ngo dương tĭnh ƀă Covid 19. Hiăng ai 4 ngế châ pơlât prêi. Ai 1.148 ngế hdroâng kuăn ngo châ klâ kơtăn a hngêi ối tung 6 kong pơlê (Hà Giang, Cao Bằng, Lai Châu, Điện Biên, Bắc Giang, Kon Tum); 1.639 ngế hdroâng kuăn ngo ối tung 8 kong pơlê klâ kơtăn tơkŭm a mâu tíu pêi cheăng, hngêi pơkeăng; 10.371 ngế hdroâng kuăn ngo ối tung 8 kong pơlê lăm pêi cheăng chêng kŏng tơkâ hluâ tíu tơkăng kong vêh a pơlê (xêo sap ing hâi lơ 1/2020 troh khế 4/2020). Ai 813 rơpŏng hdroâng kuăn ngo kơtiê, vâ chê kơtiê, rơpŏng ôh tá ai kuăn ‘nĕng rak ngăn (kong pơlê Kon Tum, ƀă An Giang) tro tơdjâk dêi pơreăng Covid 19 tơ’lêi kơklêa drêng tá hâi troh rơnó pôe xo ƀă hía hé.

Rơtế ƀă tơdroăng veăng dêi mâu kong pơlê kơpong hdroâng kuăn ngo ƀă kong ngo, Vi ƀan hdroâng kuăn ngo hiăng po rơdâ pêi pro hên troăng hbrâ mơdât pơreăng; thăm ‘nâi tơdroăng pơreăng xông tâ tú a kơpong hdroâng kuăn ngo ƀă kong ngo; hnê mơhno mâu kơ koan, khu tơrŭm cheăng ối tung hnoăng pơkuâ thăm pơtâng tối, mơhnhôk vâi krâ hdroâng kuăn ngo pêi pro mâu troăng hbrâ mơdât pơreăng Covid 19, tung mê, ai hên troăng pơtâng tối, pơtâng tối ƀă nâl hdroâng kuăn ngo.

Pơtối mê, Vi ƀan hdroâng kuăn ngo hiăng pâ thế Ngế pro xiâm hnê ngăn Chin phuh hnê mơhno mâu kong pơlê thăm pơtâng tối, mơhnhôk vâi krâ, ki má lối cho vâi krâ hdroâng kuăn ngo rêh ối a kơpong tíu tơkăng kong mơdêk hlê plĕng hbrâ mơdât pơreăng, ôh tá prôk lăm tơkâ hluâ tíu tơkăng kong, ôh tá lăm pêi cheăng, tê mơdró a peăng tá tíu tơkăng kong tung pơla kố. Séa ngăn, ‘nâi tơdroăng rêh ối vâi krâ drô tíu tơkăng kong, ai troăng tŏng kum kế kâ, tơmeăm xúa kum vâi krâ hbrâ mơdât pơreăng; Ai troăng tŏng kum phá tơ-ê ƀă tơring Đồng Văn, ki rơhêng vâ tối cho thôn Pín Tủng, cheăm Phố Là (thôn ai Giàng Thị Chở tro tâ pơreăng Covid 19, tơniăn tơdroăng rêh ối) ƀă hía hé.

Tung roh xông tâ tú roh má pái dêi pơreăng Covid 19, Chin phuh hiăng hnê mơhno kơtăng ƀă troăng pêi rĕng ti tăng xiâm kối, mơdât ôh tá ăm mot kơpong ai pơreăng, tơdroăng ki veăng kơtăng dêi mâu kong pơlê, tơdroăng ki pêi tiô pơkâ hbrâ mơdât pơreăng dêi kuăn pơlê, xua mê troh nôkố hiăng mơdât tơdroăng pơreăng xông tâ tú.

Ki rơhêng vâ tối Chin phuh xuân hiăng hnê mơhno mơ’no liăn ngân vâ Khu xiâm pơkuâ ngăn pơkeăng ƀă khăm pơlât thâ rôe vaccine ing kong têa ê vâ pâk ăm kuăn pơlê ƀă pơkâ Khu xiâm ngăn pơkeăng ƀă khăm pơlât pâk vaccine teăm tơdrêng, tro mơngế ăm kuăn pơlê. Xông tơpui a hneăng hôp lâp tơnêi têa apoăng hơnăm 2021, pôa Nguyễn Xuân Phúc, Ngế pro xiâm hnê ngăn tơnêi têa tối rơdêi.

“Pin kô mơ-eăm pâk tâi tâng ăm kuăn pơlê Việt Nam, pin rak tơniăn bê kơxŏ liăn ƀă tŭm tơdroăng, thăm nếo ai troăng tŏng kum liăn ngân tơdrêng vâ rêm ngế kuăn pơlê châ pâk vaccine. Kố cho pơkâ ki kal ki kơvâ khăm pơlât ƀă mâu khu râ thế tơkŭm pêi pro hnoăng cheăng kố rĕng, ki má lối cho mâu ngế ki Chin phuh hiăng ai Pơkâ’’.

Xuân a hneăng hôp kố, jâ Caitlin Wiesen – Antin, Kăn pơkuâ teăng mâ pêi cheăng a UNDP a Việt Nam kheăn kơdeăn Việt Nam tung mâu hơnăm hiăng hluâ hiăng châ tơƀrê hên kal khât, ai hên tơdroăng pêi ki nhên ƀă tiô tơdroăng “Ôh tá lôi kơbố parŏng”. Roh apoăng Việt Nam ai kơxô̆ kuăn mơngế ƀă hơnăm rêh châ tơtêk a kơlo tơdjuôm. Tung pơla pơreăng Covid 19 hiăng tơdjâk ó troh tơdroăng cheăng kâ lâp plâi tơnêi, Việt Nam hiăng rĕng chiâng kong têa châ tơƀrê tung pêi pro tơdroăng cheăng péa xôh mơdât pơreăng châ tơƀrê ƀă mơ-eăm mơnhông cheăng kâ châ a kơlo xông tơtêk hôm tung hơnăm 2020, ing mê, xuân ăm hlo tơdroăng rak ngăn ivá ăm kuăn pơlê đi đo châ Đảng, Tơnêi têa Việt Nam tơmâng ƀă tơniăn.

VOV4 chêh

A Sa Ly tơplôu ƀă tơbleăng