VOV4.Sêdang - Pơla hdrối kố nah, lối rơpâu ngế kuăn pơlê ki pêi cheăng dêi mâu kong pơlê kơpong Tây Nguyên dế rêh ối ƀă pêi cheăng a Pơlê kong kơdrâm Hồ Chí Minh ƀă mâu kong pơlê peăng Hdroh hiăng brôk dêi pó prếo vêh ngi pơlê ngah kô vâ kơtâu hdâ hơngế ing tíu ki tâ tú pơreăng ki ó mê, vâi hiăng kơto dêi rơxế honđa tơná. Vâ mơdât tơdroăng ki tro tâ tú pơreăng ing mâu ngế ki prếo vêh a pơlê xiâm mê, mâu kong pơlê, pơlê kong kân hiăng kum ăm rơxế, kuăn mơngế ki pơkuâ ngăn ƀă tơmeăm khoăng vâ kum ăm vâi châ prếo vêh dêi a pơlê tơniăn. Ai môi tơdroăng ki kal má môi drêng troh a pơlê xiâm tơná, vâi krâ-nhŏng o athế rak vế, pêi pro tro tiô kơ tơdroăng ki hbrâ, tơplâ mơdât pơreăng vâ rak vế tơniăn ăm dêi ivá, rơpŏng hngêi, nhŏng o, pú hmâ, pơlê pơla.

Hlo tơdroăng ki ôh tá tơniăn dêi mâu ngế ki pêi cheăng a kong pơlê ki ê vêh dêi ngi pơlê vâ hbrâ mơdât pơreăng pơrá tơkâ luâ tíu séa ngăn Cai Chanh, tơring Dak Rlâp, kong pơlê Dak Nông, kơvâ ngăn pơkeăng ƀă khăm pơlât hiăng xing xoăng mâu ngế cheăng ƀă mâu rơxế vâ séa ngăn, xing xoăng tơdrêng.

Pôa Hà Văn Hùng, kăn phŏ pơkuâ Khu ngăn pơkeăng ƀă khăm pơlât Dak Nông tối, Tơdroăng ki séa ngăn krá tơniăn, xing xoăng troăng klâ krê drêng kuăn pơlê vêh, prôk tơkâ luâ sap ing kong pơlê kô kum kong pơlê hbrâ mơdât xiâm kối ki tâ tú dêi pơreăng sap ing apoăng vâ ví tơdroăng ki mâu kơvâ cheăng khăm pơlât tung hnoăng cheăng hbrâ mơdât pơreăng môi tiah nôkố.

“A tíu gak ki mê ngin pêi pro tơdroăng ki vê ngăn ki tô hngíu a châ vâ séa ngăn hôm ai mâu ngế ki tơngê, kơ-o, ôh tá kâi hiâm tơdjâk troh mâu ngế ki tâ pơreăng há lơ ôh, tơkŭm tơbleăng chêh tối inâi ‘na pơkeăng ƀă kong ngê̆ cho mơnhên mah QR-Code. Ngin xuân ối pơtối pêi pro séa ngăn mâu ngế ki lăm/vêh/troh Dak Nông cho athế ai hlá mơ-éa séa ngăn COVID-19 âm tĭnh. Malối mâu ngế ki lâi vêh ƀă troh Dak Nông la tá hâi séa ngăn mơheăm mê mâu ngế ki mê ngin kô test rĕng vâ châ ‘nâi tơdrêng”.

Mâu ngế mot a tíu tơkŭm vâ test rĕng hdrối vâ vêh a hngêi

Dế mơ-êa a khế má 7, on veăng nâ Hoàng Thị Nhung, cheăm Čư̆ Ea Vy, tơring Ea Hleo, kong pơlê Dak Lak pro kŏng nhân a Bình Dương hiăng krếo phôn tơpui dêi ƀă rơpŏng hngêi, hbrâ tŭm mâu kế tơmeăm tung môi hngêi ki kŭn a chiâk, vâ on veăng vêh klâ ối krê drêng vêh troh a pơlê.

“Vêh a hngêi mê á xuân hlo hmiân tuăn tâ, la a drô troăng á hlo tô tuăn xua á hiăng test a tíu ki á pêi cheăng, la vêh troh a kố test nếo mê hlo kơdroh iâ ki tô tuăn. Drêng vêh troh a hngêi a lăm troh a Tíu khăm pơlât cheăm chêh tối dêi inâi, tối dêi ivá klêi mê on veăng á lăm klâ ối a chiâk kơtăn ing hngêi 4km”.

Ƀă nâ H’Mara Niê, a cheăm Hòa Phong, tơring Krông Bông xuân tơkâ luâ troăng prôk ki xŏn sap ing Bình Phước vâ vêh dêi ngi hngêi drêng nôu tơbleăng a cheăm hiăng ai kơpong klâ krê tơkŭm ăm mâu ngế ki vêh sap ing kơpong ki ai pơreăng. Pôu hngăm ôh tá ‘nâi pin hiăng tơkŏng pơreăng vêh tâ tú ăm rơpŏng, ăm pơlê cheăm vâ hiât môi iâ mâu tơdroăng ki tô tuăn drêng á châ mot ối a kơpong ki klâ ối krê tơkŭm dêi cheăm.H’Mara Niê ăm’nâi:

“Á phiu ro khât drêng troh a kố. Á lăm klâ ối krê a hngêi hriâm a cheăm, ôh tá khên vêh a hngêi ôh. Ƀă nôu á xuân hiăng krếo phôn ăm á, vêh athế lăm klâ ối krê hlối, pôi tá vêh ngi hngêi”.

Ngoh Bùi Ngọc Hoàng, ngế ki pơkuâ ngăn Đoân droh rơtăm tơring Ea Hleo, kong pơlê Dak Lak ăm ‘nâi: pêi pro tiô tơdroăng ki pơkâ thế hâi lơ 31/7 dêi Ngế pro xiâm hnê ngăn Chin phuh, Khu hnê mơhno cheăng hbrâ mơdât pơreăng COVID-19 tơring Ea Hleo hiăng hôp vâ tơbleăng hnoăng cheăng tơdah xo kuăn pơlê vêh sap ing pơlê kong kân. Tiah mê, tơring hiăng pro 3 tíu ki klâ ối krê tơkŭm ƀă pơtroh 9 toăng rơxế lăm troh a hngêi trung hdroâng kuăn ngo ai tíu kâ koi ối pơtê Nơ Trang Lơng, tíu ki mâu kuăn pơlê vêh ngi Dak Lak tơkŭm vâ test rĕng hdrối vâ vêh dêi ngi kong pơlê. Hnoăng cheăng khăm pơlât, tơdroăng ki pế pơchên hmê kơchâi tung pơla kuăn pơlê klâ ối krê xuân châ tơring pơkâ túa ki pêi pro nhên.

“Kơpong ki klâ ối krê dêi tơring mê tâi tâng châ ăm kuăn mơngế ối dâng 400 ngế pro a 3 tíu, môi cho Tíu xiâm ngăn pơkeăng ƀă khăm pơlât tơring, péa cho Tíu xiâm hnê cheăng pêi dêi tơring ƀă pái cho Hngêi trung hdroâng kuăn ngo ai tíu kâ koi ối pơtê tơring. Khu hnê mơhno cheăng tơring hiăng hbrâ sap ing A troh Z, ki hdrối tâ cho rak tơniăn ăm vâi krâ nhŏng o hmiân tuăn klâ krê ƀă pêi pro tro tiô tơdroăng pơkâ ‘na hbrâ mơdât pơreăng”.

Kuăn pơlê châ test rĕng hdrối vâ vêh a hngêi

Sap ing kơxê lơ 29 troh kơxo má lơ 3/7/2021 vâ chê 900 ngế cho mâu ngế pêi cheăng a Đồng Nai to rơxế hon đa vêh troh a Dak Lak. Mâu kuăn pơlê ki ai tơdroăng ki vâ chêh inâi ƀă kơ koan ki ai tơdjâk kong pơlê Đồng Nai bu chiâng châ vêh drêng hiăng châ test rĕng âm tĭnh ƀă COVID-19 vâ rak tơniăn ôh tot a mâu tíu séa ngăn pơreăng. Klêi mê, Kăn sat gak troăng prôk ƀă mâu khu ki ai tơdjâk cho mâu khu ki pêi pro tơniăn, mâu ƀok thái pơkeăng dêi kong pơlê Đồng Nai hiăng mơjiâng khu ki chiân a troăng vâ chê 400 km. Kong pơlê Đồng Nai xuân xing xoăng môi toăng rơxế ki chơ kế tơmeăm kâ kum ăm khu ki kố.

Klêi kơ’nâi 3 măng pơtối, tơbleăng tơdah kuăn pơlê vêh ngi dêi pơlê sap ing mâu kong pơlê peăng Hdroh hiăng ai lối 3 rơpâu ngế châ vêh troh a kong pơlê Dak Lak. Vâ rak tơniăn hbrâ mơdât pơreăng, khu ki ai tơdjâk hiăng hâi măng chêh pro mâu hlá mơ-éa môi tiah ăm mâu ngế ki vêh mê chêh tối dêi inâi ƀă test rĕng ăm mâu kuăn pơlê. Ing mê, hiăng châ hlo dâng 20 ngế test rĕng ‘nâi yương tĭnh ƀă SARS- CoV -2, tung mê ai 7 ngế klêi kơ’nâi test rĕng ăm ‘nâi RT – PCR yương tĭnh, kơxô̆ ki u ối dế tơkôm vâ ‘nâi RT – PCR.

Mâu ngế ki test rĕng yương tĭnh pơrá châ klâ ăm ối krê pơtân tung pơla tơkôm RT –PCR, mâu ngế ki ‘nâi âm tĭnh châ ăm vêh ngi kong pơlê ƀă pơkâ thế lăm troh a tíu khăm pơlât a mâu hngêi pơkeăng cheăm chêh tối dêi inâi ƀă klâ ối krê a hngêi tro pơkâ.

Pôa Lê Phúc, kăn phŏ pơkuâ Tíu xiâm séa ngăn châi tamo kong pơlê Dak Lak ăm ‘nâi: Klêi kơ’nâi Ngế pro xiâm hnê ngăn Chin phuh pơkâ ăm hlá mơ-éa a hâi lơ31/7, mê kong măng lơ 1/8, klêi kơ’nâi xing xoăng rơxế vâ tơdah xo kuăn pơlê vêh a hngêi ƀă pêi pro mâu tơdroăng ki klâ ối krê ăm tơtro. Tơdroăng kố kô kum mâu kong pơlê, tơring, cheăm séa ngăn mơdât ki tâ tú dêi pơreăng châ tơƀrê tâ.

“Ai mâu tơring, cheăm hiăng pêi pro klâ krê tơkŭm a tơring ngin tối tiah kố tuá pơkâ kố kô rak tơniăn tâ xua klâ krê tơkŭm ai mâu tơdroăng kuăn pơlê ôh ta chiâng vâ klâ ối krê a hngêi. Klâ krê tơkŭm mê kôpêi pro mâu tơdroăng PCR ƀă drêng châ ‘nâi yương tĭnh mê hiăng ối tung kơpong klâ krê tơkŭm mê gá kô ôh tá tâ tú troh pơlê pơla.

Ƀă mâu ngế ki klâ krê a hngêi athế ai tŭm tơdroăng, xuân pêi pro séa ngăn pơkeăng ƀă pâk xo mơheăm a hngêi vâ rak tơniăn klêi mê drêng châ ‘nâi mâu túa séa ngăn yương tĭnh athế ai troăng hơlâ pơkâ pêi pro ki pơtối vâ klâ krê ăm tơtro”.

Troh nôkố, tâi tâng 15 to tơring, pơlê kong krâm, pơlê kong kơdrâm dêi kong pơlê Dak Lak pơrá ai ngế ki tâ Covid-19.Ki hên chomâu ngế ki ai pơreăng tơdjâk troh Pơlê kong kân Hồ Chí Minh ƀă mâu kong pơlê peăng Hdroh. Hlo ôh tá tơniăn dêi pơreăng, tơdroăng kuăn pơlê pơtối vêh dêi ngi pơlê vâ ví pơreăng mơni kô ối nếo. mâu túa pơkâ tơdah xo kuăn pơlê vêh a hngêi dế châ Dak Lak pêi pro hiăng kum kuăn pơlê hmiân tuăn tâ ƀă pro kơdroh ki tâ tú dêi pơreăng troh pơlê pơla.

VOV Tây Nguyên

Katarina Nga tơplôu ƀă tơbleăng