VOV4.Sêdang - Hơnăm 2021, cho tơdroăng ki tối tơbleăng mơdêk ki hlê plĕng ‘na hnoăng vâi hdrêng, rak vế, rak ngăn vâi hdrêng tung pơla ai pơreăng kân; hnối cho tŏng kum vâi hdrêng ki tro tơdjâk xua pơreăng kân Covid-19, Khế pêi pro xua vâ tŏng kum vâi hdrêng hơnăm kố kô tơkŭm tung tơdroăng: “Tơdjuôm ivá rak vế pêi pro hnoăng cheăng kum vâi hdrêng, rak ngăn vâi hdrêng tung pơla rơnó mêi  khía mơhot, têa kân lân lu, pơreăng tâ tú”. Ƀă tơdroăng kố, a kơpong Tây Nguyên rơtế ƀă lâp tơnêi têa dế ai hên tơdroăng pêi pro ai pơxúa ƀă vâi hdrêng.

Môi tung mâu tơdroăng pêi pro ki pơxúa apoăng a Dak Lak cho Khu râng Kơxô̆ liăn tŏng kum vâi hdrêng kong pơlê kố hiăng tơkŭm po lăm pôu, diâp kơxuô tơmeăm ƀă hnê mơhno hbrâ mơdât pơreăng Covid 19 ăm mâu vâi hdrêng a Tíu xiâm tŏng kum pơlê pơla hngêi chuô Bửu Thắng (pơlê kong kơdrâm Ƀuôn Ma Thuột).

Pôa Lâm Đình Nhiên, Kăn pơkuâ Khu râng kơxô̆ liăn tŏng kum vâi hdrêng kong pơlê Dak Lak tối ăm ‘nâi, dế pêi pro tŏng kum mơjiâng 4 toăng hngêi tuăn pâ; lăm kơ-êng mơhnhôk mâu rơpŏng ai kuăn tro rong, rơpŏng ai vâi hdrêng klâk têa a mâu tơring Čư Mgar, Krông Pač, Čư Kuin ƀă Krông Bông. Tŏng kum trếo piê kơhiâm, tơmeăm ki xúa rêm hâi ƀă rak ngăn ivá châ chăn, rah khăm mâu ngế châi plâi nuih ƀă tơdroăng chó a vâi hdrêng.

“Khu pơkuâ râng liăn kô tơkŭm krếo thế, mơhnhôk mâu kơ koan, khu tơrŭm cheăng, khu tê mơdró ƀă kơ koan Chin phuh vâ ai kơxô̆ liăn tŏng kum mâu ngế tro tâ pơreăng ki pá pơlât môi tiah châi plâi nuih sap ing kot mâ; lăm kơ-êng mâu vâi hdrêng tro rong râ, klâk têa. Ƀă ki rơhêng vâ tối hâi kố hiăng tŏng kum 30 rơtuh ăm vâi hdrêng kuăn tê a Tíu xiâm dêi Hngêi chuô Bửu Thắng vâ tŏng kum môi iâ rôe tơmeăm kâ, tơmeăm khoăng ki xúa rêm hâi tung mâu hâi pơreăng ƀă hnê mơhno mâu vâi muăn tung tơdroăng hbrâ mơdât pơreăng Covid 19’’.

Kal mâu troăng tơniăn ăm rêm ngế vâi hdrêng tung rơnó pơreăng kân

A râ xiâm Tơnêi têa, Khu pơkuâ râng Kơxô̆ liăn tŏng kum vâi hdrêng Việt Nam ƀă Khu xiâm pơkuâ cheăng pêi – Mô đô̆i rong râ ƀă pơlê pơla hiăng pơkâ tŏng kum hmê kơchâi kâ ăm lối 4 rơpâu ngế vâi hdrêng cho F0 ƀă F1 thế klâ kơtăn kô châ tŏng kum liăn kâ hmê rêm hâi ƀă kơlo tŏng kum 80.000 liăn/môi ngế muăn, châ pêi pro troh tâi hơnăm kố.

Pơreăng kân Covid 19 hiăng, dế ƀă pơtối tơdjâk troh châ chăn, ivá ƀă dêi vâi hdrêng. Tiô séa ngăn, tung kơxô̆ 30 kong pơlê ai ngế tro tâ Covid 19, ai 18 kong pơlê tơbleăng ai vâi hdrêng ối tung khu F0 ƀă F1. Tung mê, Bắc Giang dế ai kơxô̆ vâi hdrêng thế klâ kơtăn tơkŭm kơdrâm má môi ƀă rơpâu ngế muăn.

Jâ Nguyễn Thị Nga, Kăn phŏ pơkuâ vâi hdrêng, ối tung Khu xiâm pơkuâ cheăng pêi – Mô đô̆i rong ƀă pơlê pơla tối ăm ‘nâi, đông dế kơbông krếo tơdroăng tơdjuôm ivá, kum ing mâu khu tơrŭm cheăng, ngế krê tung tơnêi têa ƀă kong têa ê vâ vâi hdrêng Việt Nam tơkâ hluâ hneăng kố, kum mâu vâi o ai môi tơdroăng rêh ối la ngiâ tơniăn tâ.

“Tung mâu hâi achê kố, ngin tơmâng tơdroăng séa ngăn mâu vâi hdrêng tro tâ Covid 19 xuân môi tiah ƀă vâi hdrêng thế lăm klâ kơtăn ối tung khu F1. Pơkâ thế mâu kong pơlê hbrâ tŏng kum mâu vâi o, tơmâng tá trếo piê kơhiâm, tơmeăm kâ xuân môi tiah mâu tơdroăng kal vâ ăm vâi hdrêng, ki rơhêng vâ tối cho mâu tơdroăng pro tơdjâk ôh tá xê krê ƀă nôu pâ dêi mâu vâi o mê cho mâu vâi o xuân tơdjâk râ ‘nâng’’.

Lăm pôu ƀă diâp kơxuô tơmeăm vâi hdrêng a hngêi chuô Bửu Thắng – Dak Lak

Nôkố Khu pơkuâ râng Kơxô̆ liăn tŏng kum vâi hdrêng Việt Nam pơtối mơhnhôk, tŏng kum mâu tơmeăm khoăng ki kal xúa rêm hâi, tơmeăm khăm pơlât, môi tiah: ki pâng rơkong môh, têa tôu ro, xup kơxŏng khăng, hmân ếo mâu tơmeăm ki ê ăm vâi hdrêng cho mâu ngế F0, F1, F2 a kong pơlê Điện Biên.

Tơdrêng amê, thâ pêi pro mơhnhôk, tŏng kum ăm mâu vâi hdrêng a mâu kong pơlê ki ai pơreăng môi tiah Bắc Giang, Bắc Ninh.

Mơhnhôk Khế lo pêi kum vâi hdrêng hơnăm 2021, mâu khu xiâm, kơvâ cheăng hiăng ai hlá mơ-éa hnê mơhno pêi pro mâu tơdroăng tung Khế lo pêi kum vâi hdrêng. Vi ƀan pơkuâ ‘na pơ’leăng mâ mơngế, Rơpŏng ƀă vâi hdrêng – Khu xiâm pơkuâ lêng, Khu xiâm pơkuâ ‘na mơhno túa lĕm tro tơ’noăng ivá ƀă ôm hyô; Khu xiâm pơkuâ tơdroăng kal tiô troăng um tơvi, rơ’jíu ƀă Internet tơrŭm ƀă Khu pơkuâ rak tơniăn tơdroăng kal Việt Nam ƀă mâu khu xiâm, kơvâ ki tơdjâk tơkŭm po roh tơ’noăng “Hok tro ƀă Tơniăn tơdroăng kal”; Khu xiâm pơkuâ Đoân droh rơtăm Kŏng san Hồ Chí Minh tơkŭm po tơdroăng pơxiâm po rơnó pơtê hriâm.

Jâ Nguyễn Thị Nga tối ăm ‘nâi tơ’nôm:

“Kơ koan xiâm pơkuâ vâi hdrêng, Khu xiâm pơkuâ cheăng pêi mô đô̆i rong ƀă pơlê pơla xuân châ tơdroăng tŏng kum rơtế dêi mâu khu tơrŭm cheăng lâp plâi tơnêi a Việt nam xuân môi tiah mâu khu tơrŭm cheăng pơlê pơla. Tung khế lo pêi kum vâi hdrêng kô châ tơkŭm po hên roh tơpui tơno ki rơhêng vâ tối cho mâu roh tơpui tơno mơ’no tơdrêng tung um tơvi vâ kô tơbleăng nhên pơkâ ‘na luât, troăng hơlâ xuân môi tiah mâu tơdroăng pêi pro, túa pêi ki kal ăm rơpŏng, ăm vâi hdrêng xuân môi tiah pơlê pơla vâ pin rơtế tơdjuôm ivá tơniăn pêi pro hnoăng dêi vâi hdrêng, ki má lối cho vâi hdrêng tro tơdjâk xua pơreăng kân Covid 19”.

Kơ koan xiâm pơkuâ vâi hdrêng xuân hiăng ai mơ-éa hnê mơhno Khu pơkuâ cheăng pêi – Mô đô̆i rong râ ƀă Rêh ối pơlê pơla mâu kong pơlê, pơlê kong kơdrâm thăm pơtâng tối tung mâu um tơvi, rơ’jíu, phôn ƀă internet hnê mâu tơdroăng rêh ối, troăng hbrâ mơdât, hbrâ mơdât pro pơlăm pơlối vâi hdrêng, hbrâ mơdât xía vâ, tro rong a vâi hdrêng; rak vế vâi hdrêng tung tíu internet, pơtâng tối ‘na Tíu krếo phôn tơnêi têa gak kring vâi hdrêng (111) troh rơpŏng, pơlê pơla ƀă vâi hdrêng ƀă tơniăn ăm vâi hdrêng tung rơnó ai pơreăng kân.

Tung mê, pơkâ rĕng ‘nâi kơxô̆, chêh inâi ƀă tơdroăng kal vâ dêi vâi hdrêng a mâu kong pơlê klâ kơtăn pơlê pơla ƀă mâu tíu klâ kơtăn; xúa liăn ngân dêi Khu pơkuâ râng Kơxô̆ liăn tŏng kum vâi hdrêng râ kong pơlê (tâng ai) lơ liăn ngân dêi Khu pơkuâ râng Kơxô̆ liăn tŏng kum vâi hdrêng Việt Nam ƀă mâu kơxô̆ liăn mơhnhôk ki ê vâ tŏng kum trếo piê kơhiâm, tơmeăm xúa rêm hâi, pơkeăng ƀă mâu tơmeăm khăm pơlât tơ’nôm ăm vâi hdrêng ƀă troăng pêi ôh tá lôi ăm ai môi ngế vâi hdrêng ki lâi ai tơdroăng kal vâ, trâm pá puât mê ôh tá châ tŏng kum teăm tơdrêng.

VOV chêh

A Sa Ly tơplôu ƀă tơbleăng