VOV4.Sêdang - Klêi kơ’nâi test rĕng ƀă séa ngăn têa môh, rơkong, kơxo lơ 25/8, kơvâ ki ai tơdjâk troh châ ‘nâi ai 14 ngế a thôn 7 cheăm Čư̆ Êbur, pơlê kong kơdrâm Ƀuôn Ma Thuột, kong pơlê Dak Lak yương tĭnh ƀă SARS –CoV-2 ki tá hâi ‘nâi nhên xiâm kối tâ. Tơdroăng kố hiăng châ tối nhên ƀă túa ki pâk xo têa môh rơkong séa ngăn RT –PCR xua CDC kong pơlê ƀă Viện Vệ sinh dịch tễ Tây Nguyên séa ngăn. Klêi kơ’nâi mơnhên mâu ngế ki tâ, khu kăn pơkuâ hiăng mơdât mot lo hơlâ troăng 427 troăng Y Moan, tơdrêng amê hnối tơrŭm ƀă kơvâ cheăng ngăn pơkeăng ƀă khăm pơlât test rĕng kháng nguyên ăm kuăn pơlê a kơpong ki tâ tú hơlâ ki kố.

Khu cheăng ‘na khăm pơlât pơlê kong kơdrâm Ƀuôn Ma Thuột test rĕng ăm kuăn pơlê

Tiah mê, bu tung pơla 4 hâi, pơlê kong kơdrâm Ƀuôn Ma thuột hiăng châ ‘nâi ai 2 tíu ki ai pơreăng a thôn 6 ƀă thôn 7 cheăm Čư̆ Êbur ƀă 31 ngế tâ. Tá 2 tíu ki ai pơreăng kố pơrá tá hâi ‘nâi xiâm kối tâ tú. Hlo tơdroăng mê, kơvâ ngăn pơkeăng ƀă khăm pơlât pơlê kong kơdrâm Ƀuôn Ma Thuột kô po rơdâ pâk xo têa môh séa ngăn rĕng ăm tâi tâng kuăn pơlê, vâ klâ mâu F0 lo ing pơlê pơla.

Katarina Nga tơplôu ƀă tơbleăng