VOV4.Sêdang - Tơdroăng hmôu pơ ôh tá lĭng pêi pro klêi tung  mâu tơdroăng pơkâ mơjiâng thôn pơlê  nếo cho tơdroăng ki kăn hnê ngăn tơring Lạc Dương, kong pơlê Lâm Đồng tô tuăn. La pơla 2 tơdroăng tơkêa bro cho pêi pro klêi tro tiô tơhrâ drêng mâu tơdroăng pơkâ pêi hâi teăm krá kâk ƀă pơkâ mơdon hâi tâ vâ mơjiâng mâu tơdroăng pơkâ ki tơ-ƀrê, tơring kố hiăng rah xo troăng hơlâ ki má péa. Hvêa chêng prôk ki chôa lâng vâ pro tơniăn khât, krá kak tung tơdroăng mơjiâng thôn pơlê nếo.

Troh hơnăm 2020, lâp tơring Lạc Dương ai 4 to cheăm châ Vi ƀan hnê ngăn kong pơlê Lâm Đồng mơnhên plêi klêi thôn pơlê nếo. Krê a cheăm K’Nớ châ 14/19 tơdroăng. Tơdroăng ki pro hngêi trăng, troăng klông cheăng kâ pơlê pơla tung mê, ai mâu kế tơmeăm mơjiâng pro ki kal kum ăm tơdroăng rêh ối, cheăng kâ dêi kuăn pơlê a mâu cheăm thôn pơlê nếo pơtối châ kơjo kum ‘no liăn cheăng, mơnhông mơdêk. Mâu tơdroăng ki mơnhông cheăng kâ tơtro ƀă tơdroăng ki ‘mâi pêi cheăng kâ, hơ’leh tơdroăng cheăng kâ thôn pơlê, tăng cheăng pêi ƀă pêi lo liăn ăm kuăn pơlê cho tơdroăng ki châ tơmâng ngăn khât.

Mâu tơdroăng kơdroh kơtiê, rak tơniăn tơdroăng rêh ối cheăng pơlê pơla pêi pro châ tơbrê. Kơnôm mê, troh khế 11/2020 tơring kố ối 122 rơpŏng kơtiê, châ 1,8%. Tung mê, rơpŏng kơtiê cho hdroâng kuăn ngo ai 119 rơpŏng, châ 2,5%. Pêi lo liăn rêm ngế lâp tơring hơnăm 2020 tiô riân châ 45 rơtuh 900 rơpâu liăn.

Nôkố, tung mơjiâng thôn pơlê nếo tơring Lạc Dương, kong pơlê Lâm Đồng ối tơvâ a 3 tơdroăng ki kal, mê cho: Kong prâi tơnêi tíu, troăng hơlâ a cheăm kơpong hngế Đưng K’Nớ.

Cheăng kâ mơnhông, tơdroăng rêh ối kuăn pơlê châ mơdêk cho mâu tơdroăng ki pro pơxúa sap ing mơjiâng thôn pơlê nếo a Lạc Dương

‘Na tơdroăng kong prâi tơnêi tíu, pôa Hoàng Văn Hãnh, kăn phŏ rak ngăn kong tế tơmeăm khoăng tung têa, a tơnêi ƀă hyôh kong prâi tơring Lạc Dương ăm ‘nâi: 3/5 tơdroăng ki kal dêi tơdroăng pơkâ kong prâi tơnêi tíu hiăng pêi klêi a tâi tâng mâu cheăm. Tung mê, tơdroăng ki gô̆m văng, chơ ok xok ƀă mơjiâng tíu ki ‘măn têa, gô̆m văng mâu tơdrong pơkeăng rak vế xôh kơdê oâ hdrong châ tơmâng ngăn khât. Laga, ai mâu rơpŏng, mâu ngế krê tá hâi hlo nhên ki kal dêi tơdroăng kố mê tá hâi kơhnâ, rơnáu tung tơdroăng pêi pro, tơdjâk troh ki tơbrê tơdjuôm ƀă tơdroăng ki pêi klêi tơdroăng pơkâ thôn pơlê nếo.

‘Na troăng prôk, tơvâ dêi tơring Lạc Dương nôkố cho a troăng ki xŏn 7 rơpâu km sap ing Thôn 2 mot tung thôn Đưng Trang ối tung cheăm Đưng K’Nớ. Pôa Nguyễn Văn Huynh, kăn pơkuâ Ƀơrô cheăng kâ, hngêi trăng, troăng klông tơring Lạc Dương ăm ‘nâi: Vâ rak tơniăn cheăm Đưng K’Nớ pêi klêi ‘na troăng prôk veăng kum pêi klêi tơdroăng pơkâ mơjiâng thôn pơlê nếo hơnăm 2021, ƀơrô cheăng hiăng pơkâ thế Vi ƀan hnê ngăn tơring Lạc Dương ‘mâi rơnêu troăng prôk ƀă tâi tâng kơlo liăn ‘no tiô tối hdrối dâng 4 rơtal liăn. Tiô tối hdrối troăng ki kố kô klêi a hơnăm 2021.

Hơnăm ối nếo tơring Lạc Dương veăng pro troăng prôk a thôn pơlê

Tâng môi tiah péa tơdroăng ki tối a kơpêng kô châ kum kơxô̆ liăn ‘no cheăng rak tơniăn mê tơdroăng ki kân má môi u ối cho a cheăm Đưng K’Nớ. Vâ mơjiâng thôn pơlê nếo tơbrê a hơnăm 2021, tơdroăng ki rơhêng vâ ‘no liăn cheăng dêi Đưng K’Nớ ai mâu tơdroăng: troăng prôk, tơmeăm xúa ‘na mơhno túa lĕm tro, têa krúa thôn pơlê, rơchoâ long têa ki malối tâ cho tơdroăng kơdroh kơtiê.

Khŏm mơ-eăm tơdroăng kal kí dêi tơring Lạc Dương hiăng châ mơhno tối nhên tung tơdroăng ki tơkŭm ivá tơrŭm cheăng, tŏng kum cheăm Đưng K’Nớ. Ƀă sap ing apoăng hơnăm 2021, kăn pơkuâ tơring hiăng lăm séa ngăn ƀă hnê mơhno mâu tơdroăng ki kal ai tơdjâk troh tơdroăng ki mơdêk ki rơkê plĕng tung rêh ối kuăn pơlê a Đưng K’Nớ. Xua tơdroăng ki ‘no liăn sap ing mâu ivá bu cho tơdroăng ki kal, ƀă mơdêk ki rơkê plĕng tung rêh ối vâ pro tơdroăng ki tơdâng tơ’mô tơ’lêi hlâu tung kuăn pơlê nếo cho tơdroăng ki tŭm ăm tơdroăng mơnhông tơdjuôm ƀă pêi klêi túa pơkâ mơjiâng thôn pơlê nếo hơnăm 2021 tối krê a Đưng K’Nớ.

Tiô pơkâ apoăng, troh hơnăm 2020, tơring Lạc Dương, kong pơlê Lâm Đồng pêi klêi thôn pơlê nếo. Laga, séa ngăn hlo mâu tơdroăng ki tá hâi krá tơniăn, mê tơring hiăng pro ton hơnăm cho troh hơnăm 2022 ah. Mâu hâi khế ki mơdon ôh ti xê cho tơdroăng ki kal. Xua ki kal tâ cho tơdroăng ki krá tơniăn tung mâu tơdroăng pơkâ, cho tơdroăng rêh ối tơniăn lĕm dêi kuăn pơlê. Mê tơdroăng ki hrá la krá cho tơdroăng ki kal xua tơdroăng ki rế ton rế athế châ mơjiâng tung tơdroăng ki krá rơdêi.

Hlá tơbeăng Lâm Đồng

Katarina Nga tơplôu ƀă tơbleăng