VOV4.Sêdang - Pơkâ 05 dêi khu xiâm pơkuâ ngăn Đảng tơring Lak, kong pơlê Dak Lak ‘na “Kăn hnê ngăn pêi pro tơdroăng pơ’lêh hdrê loăng pêt, mơnăn păn pơla sap hơnăm 2021-2025”, kơ’nâi vâ chê môi hơnăm pêi pro hiăng troh lâp lu, po troăng hơlâ vâ săm kơtiê krá tơniăn ăm kuăn pơlê hdroâng kuăn ngo ối a kơpong xơpá má môi mê.

Ki xiâm dêi tơdroăng pơkâ kơxô̆ 05 dêi Đảng ƀô̆ tơring Lak, kong pơlê Dak Lak cho mơhnhôk tá khu pơkuâ tơdroăng kal kí sap ing tơring troh thôn pơlê, rơtế veăng pêi pro. Kăn ƀô̆, đảng viên djâ troăng ahdrối, ƀă hiâm mơno pôu râng dêi hnoăng cheăng “achê kuăn pơlê, xua kuăn pơlê, rak vế ngăn ăm kuăn pơlê”. Ôh tá xuá liăn ngân, lâp tơring mơhnhôk tơdroăng ki veăng tơlo dêi kăn ƀô̆, đảng viên; mâu kơ koan, tíu pêi cheăng, khu mơdró kâ tơrŭm pro nhŏng o ƀă pơlê hdroâng kuăn ngo veăng kum liăn roê lối hrĭng rơpâu hdrê loăng pêt hbru ăm mâu rơpŏng kơtiê; hnê kih thuât pêt, rak ngăn.

Tung hơnăm apoăng pêi pro, tơring Lak hiăng hơ’lêh khât tung tơdroăng ki hơ’lêh pêt hdrê loăng, pêt a tâi tâng a tơnêi ki ôh tá chiâng pêt klâi.

A ƀuôn Dơ Tu, cheăm Ƀuôn Triết, tơring Lak, kong pơlê Dak Lak, mâu kơdrum ki ôh tá pêt klâi xua tơnêi ôh tá lĕm, mâu ngo ngối ki chúa lôi têa kơtê hiăng châ pêt loăng ngiât xua rêm hngêi hiăng châ hbru ăm hdrê loăng pêt, hnê kih thuât pêt rak ngăn ăm tơtro.

Pôa Võ Ngọc Tuyên, kăn pơkuâ ngăn Đảng tơring diâp hdrê loăng pêt ăm vâi krâ nhŏng o cheăm Ƀuôn Triết

Ngoh Y Jony Ƀyă, a ƀuôn Dơ Tu, cheăm Ƀuôn Triết, tơring Lak, phiu ro xua hiăng rĕng châ pêt tơvât ƀă lối chât to xiâm loăng plâi mit siam hdrối kong mê hngê kố hdrê pêt hiăng ngiât lĕm a lối 4 sào kơdrum.

“Rơpŏng á mơnê tơring, hiăng kum ăm hdrê loăng plâi kâ vâ hơ’lêh loăng pêt a tơnêi chiâk dêi tơná tiô túa ki pêt tơvât. Rơpŏng á kô mơ-eăm rak ngăn vâ mơnhông mơdêk cheăng kâ ‘na loăng plâi kâ, rế hía rế vâ châ hluăn ing kơtiê”.

A cheăm Yang Tao, tơring Lak, kơdrum loăng plâi mit siam pêt tơvât dêi pôa Y Gham Triết, a ƀuôn Bhôk xuân hiăng hlo xông kân lĕm klêi kơ’nâi hâi khế pêt. Y Gam ăm ‘nâi, ôh ti xê to châ hbru ăm lối chât to xiâm hdrê loăng pêt, kăn ƀô̆ tơring, cheăm ối troh a kơdrum hnê túa ki pêt ƀă rak ngăn mê loăng xông kân lĕm.

Mâu hdrê loăng pêt 0 liăn châ tŏng kum ăm rơpŏng kơtiê

‘Nâi ki pơxúa tung tơdroăng ki hơ’lêh pêt hdrê loăng tơtro, pôa Y Gham Triết tơmiât rơnó mê hngê kố kô pêt loăng tâi tâng a kơdrum ki chúa lôi tê kơtê kố:

“Rơpŏng á xuân châ cheăm kum ăm hdrê loăng pêt. Á mơnê Tơnêi têa hiăng tŏng kum á. Á rơhêng vâ Tơnêi têa ăm tơ’nôm hdrê loăng vâ á pêt tơ’nôm tung kơdrum ki kố, mơ-eăm mơnhông mơdêk cheăng kâ”.

Pôa Nguyễn Văn Huyên, kăn pơkuâ ngăn Đảng ủy cheăm Yang Tao, tơring Lak, ăm’nâi, nôkố lâp cheăm hiăng hbru lối 7 rơpâu to xiâm loăng plâi mit siam, plâi tuâk (ki vâi khĕn dừa xiêm), mãng cầu ăm 1.473 rơpŏng kơtiê. Rơtế amê, cheăm hiăng mơjiâng 22 túa pơkâ pêt plâi mit siam a 11 to pơlê  dêi cheăm vâ vâi krâ nhŏng o hriâm tâp; pơtối mơhnhôk mâu tíu pêi cheăng ki tơrŭm pro nhŏng o, khu ki ai hiâm mơno hơ-ui roê tơ’nôm hdrê loăng pêt vâ kum ăm vâi krâ nhŏng o:

“Ngin hiăng séa ngăn tâi tâng mâu ƀăng tơnêi a cheăm ki hdrối nah kuăn pơlê ôh tá pêi. Ngin pơkâ thế vâi krâ nhŏng o ki hdrối tâ hơ’lêh túa pơkâ kơdrum dêi tơná, vâ hbrâ rơnáu hơ’lêh mâu mơnăn mơnoâ ki păn, hdrê loăng pêt tiô pơkâ kơxô̆ 05. Klêi kơ’nâi tơkŭm tối tơbleăng, ngin hiăng mơhnhôk pơlê pơla tâi tâng mâu khu tơrŭm, khu mơdró kâ, xuân môi tiah mâu ngế krê cho kăn ƀô̆, đảng viên tung cheăm. Ƀă mâu cheăm ngin hiăng mơhnhôk, veăng kum lối 10 rơtuh liăn vâ roê hdrê loăng plâi mit siam. Loăng plâi mit cho hdrê loăng ki xiâm xuân cho hdrê loăng ki vâ xut tah hrâ  mơnguâ kơtiê ăm vâi krâ nhŏng o tung hneăng hơnăm la ngiâ”.

Vâi krâ nhŏng o pêt hdrê loăng plâi kâ

Lak cho tơring ki ai kơxô̆ rơpŏng kơtiê ối má péa dêi kong pơlê Dak Lak ƀă lối 27%. Tung mê, a 90 to pơlê, cheăm hdroâng kuăn ngo, kơxô̆ rơpŏng kơtiê ối 60%. Hên hơnăm hdrối, ki hên rơpŏng kuăn pơlê hdroâng kuăn ngo ối lôi “kơdrum ktê kơtê, hngêi tê kơtê”, tơnêi tê kơtê ôh tá ai klâi, mê chiâng pro hnoăng cheăng xut tah hrâ mơnguâ kơtiê xơpá ối trâm hên tơdroăng xơpá.

Pôa Võ Ngọc Tuyên, kăn pơkuâ ngăn Đảng tơring Lak ăm ‘nâi: Klêi kơ’nâi vâ chê môi hơnăm tối tơbleăng kăn ƀô̆, đảng viên rêm râ hiăng mơhnhôk, diâp châ lối 100 rơpâu xiâm hdrê loăng plâi tŭm túa, tung mê ki hên cho plâi mit siam, sầu riêng, krui ngeăm, krui ƀŏng, plâi nong, plâi ối, plâi tuâk kơnâ lối 2 rơtal liăn. Vâ chê 10 rơpâu rơpŏng kơtiê hiăng châ xo hdrê loăng pêt tŏng kum ƀă vâi krâ nhŏng o hiăng hơ’lêh hdrê loăng pêt, pêt tâi tâng a 200 ha tơnêi ki ôh tá chiâng pêt klâi, tơnêi lĭng.

“Tơdroăng pơkâ gá ai pơxúa khât tơƀrê khât ƀă ai ivá tơdjâk kân troh lâp lu. Troh chôu phut kố, tơring Lak tá hâi xúa liăn ngân, troh nôkố ngin hiăng mơhnhôk mâu tíu pêi cheăng ki tơrŭm pro nhŏng o diâp hdrê loăng ăm mâu pơlê cheăm ki tơrŭm pro nhŏng o. Tung pơla iâ khế sap ing lơ 5/3 troh nôkố hiăng pêt châ lối 100 rơpâu xiâm loăng tŭm túa. Mơhno tối hiâm mơno ki lĕm, hnoăng cheăng pôu râng Đảng, Tơnêi ƀă kuăn pơlê, malối cho kuăn pơlê hdroâng kuăn ngo”.

Tơdroăng pơkâ kơxô̆ 05 dêi Khu pơkâ ngăn Đảng ƀô̆ tơring Lak, kong pơlê Dak Lak châ tơbleăng hiăng ƀă dế châ xo tơdroăng ki môi tuăn dêi kăn ƀô̆, đảng viên ƀă kuăn pơlê. Ing mê, veăng kum pro tơdroăng ki hơ’lêh tung túa tơmiât túa pêt dêi vâi krâ nhŏng o a mâu thôn pơlê, tơdrêng amê hnối mơdêk tơdroăng ki pêt, po troăng ăm tơdroăng ki kơdroh kơtiê krá tơniăn a tơring, cheăm ki kố.

Tuấn Anh chêh

Katarina Nga tơplôu ƀă tơbleăng