VOV4.Sêdang - Hneăng tâ phĭu rah xo khu kăn Kuô̆k hô̆i hneăng 15 ƀă khu kăn hnê ngăn Hô̆i đong rêm râ hneăng 2021-2026 kô châ po a hâi lơ 23/5, mê cho hâi leh kân pêi tơdroăng kal kí dêi tơnêi têa, châ tơkŭm po klêi hiăng hôp kêi đeăng hneăng hôp kân mâu kăn xiâm Đảng lâp tơnêi têa roh má 13. Tơdroăng rah xo mâu kăn dêi mâu hdroâng kuăn ngo veăng tung khu kăn Kuô̆k hô̆i ƀă Hô̆i đong rêm râ ai hnoăng cheăng ki kân pơxúa khât tung tơdroăng cheăng kal kí rêm râ tối tơchoâm ƀă kơ koan kuăn pơlê rah xo tối krê.

Tung mâu rôh hôp tơpui tơno dêi Măt trâ̆n tơnêi têa rêm râ rah xo mâu ngế cho kuăn ngo vâ lo tơbriât pro kăn Kuô̆k hô̆i ƀă kăn hnê ngăn Hô̆i đong rêm râ thế ai mâu pơkâ ki xiâm, la xuân pôi tá pôu râng hngăm hên tơdroăng pơkâ cheăng ăm môi ngế kăn.

Tiô pôa Nguyễn Lâm Thành, Kăn phŏ hnê ngăn Hô̆i đong hdroâng kuăn ngo dêi Kuô̆k hô̆i, tơdroăng tơtrŏng hnoăng tâ phĭu, tơbriât to pro kăn dêi vâi krâ hdroâng kuăn ngo tung tâ phĭu rah xo kăn Kuô̆k hô̆i ƀă kơ koan kuăn pơlê rah xo a kong a mâu kong pơlê đi đo châ mâu khu râ tơmâng vâ ‘nâi plĕng, hnê mơhno. Pro ăm ti lâi, mơnhông hnoăng ki pơxúa dêi rêm ngế tơbriât to pro kăn cho mơngế hdroâng kuăn ngo a pơlê dêi vâi dế rêh ối, pêi cheăng. Xua ôh tá ai kơbố plĕng luâ a kơpong kong ngo, kơpong tíu tơkăng kong tâ mâu ngế dế rêm hâi rêm chôu rơtế kâ, rơtế ối, rơtế pêi cheăng ƀă vâi krâ:

“Mâu ngế tơbriât to pro kăn kố ‘nâi nhên kong kế akố, mâu tơdroăng ki vâi rêh ối ƀă xuân cho kơpong tơnêi dêi mơngế tâ phĭu cho hdroâng kuăn ngo. Má péa, cho ‘nâi nhên khôi túa, vêa vong, mâu tơdroăng tuăn pâ, mê pơrá cho mâu tơdroăng ki kuăn pơlê dế tơmâng rơhêng vâ ‘nâi plĕng. Môi tơdroăng nếo cho rơtế nâl tơpui, chư chêh tá tơdroăng tơrŭm pơlê pơla, tơrŭm nhŏng o xiâm môi mơheăm chhá. Mê cho hnoăng ki tơtro khât dêi ngế tơbriât to pro kăn hdroâng kuăn ngo”.

Nôkố, tơdroăng hbrâ tâ phĭu rah xo Kăn teăng mâ Kuô̆k hô̆i hneăng má XV ƀă Kăn teăng mâ Hô̆i đong hnê ngăn kuăn pơlê rêm râ hneăng hơnăm 2021 – 2026 a kơpong vâi krâ hdroâng kuăn ngo, tiô Hô̆i đong hdroâng kuăn ngo dêi Kuô̆k hô̆i mơnhên hiăng pêi pro kơtăng, tro tiô pơkâ dêi luât. Laga, xua hên xiâm kối phá tơ-ê xua tơdroăng rêh ối ƀă tơdjâk pa kong, ki hôm mơngế pêi cheăng kơpong hdroâng kuăn ngo ối iâ. Kơxô̆ mơngế hriâm đăi hok, kao đăng ƀă ki rơhêng vâ tối cho kơpêng râ đăi hok bu iâ tung pơlê pơla. Tơdroăng pơtâng tối a kơpong vâi krâ hdroâng kuăn ngo ƀă kong ngo ối pá hên, hlê plĕng dêi vâi krâ ối iâ, khôi túa, vêa vong ối hên tơdroăng ôh tá tro.

Xua mê, mâu kong pơlê kal thăm pơtâng tối, tơbleăng tối, hnê mơhno ăm vâi krâ plĕng nhên ‘na hnoăng tâ phĭu ƀă tơbriât to pro kăn dêi tơná. Tơtrŏng tung tơdroăng hnê mơhno, hnê tơ’nôm tơdroăng cheăng, troăng vâ mơhnhôk mâu ngế tơbriât to pro kăn xuân môi tiah thăm pơtâng tối kơpong vâi krâ hdroâng kuăn ngo. Ki rơhêng vâ tối, mâu khu râ Đảng, khu râ kăn pơkuâ, Hô̆i đong tâ phĭu mâu râ kal tơkŭm po pơtâng tối, tơbleăng hnoăng dêi mơngế tâ phĭu tung tâ phĭu. Tơtrŏng pơtâng tối ƀă nâl hdroâng kuăn ngo, tơkŭm po tơpui tơno ‘na pơkâ rah xo, mâu ngế ki rah xo; ‘na tơdroăng mâu ngế tơbriât to pro kăn teăng mâ Kuô̆k hô̆i ƀă kăn teăng mâ Hô̆i đong hnê ngăn kuăn pơlê rêm râ vâ pro ăm kuăn pơlê hlo tơdroăng ki tro veăng tung tơdroăng tâ phĭu cho hnoăng dêi vâi krâ. Mê cho rah xo mâu ngế teăng mâ ăm vâi krâ vâ veăng mơjiâng, pơkâ, seá ngăn tơdroăng pêi pro troăng hơlâ, ki má lối cho troăng hơlâ tơdjâk troh kơpong vâi krâ hdroâng kuăn ngo, kơpong kong ngo.

Tiô pôa Ma Công Khâm, Kăn pơkuâ hnê ngăn cheăng Đảng, Kăn hnê ngăn Vi ƀan cheăm Thượng Lâm, tơring Lâm Bình, kong pơlê Tuyên Quang, a cheăm Thượng Lâm, ƀă lối 90% pơ’leăng mâ mơngế cho vâi krâ hdroâng kuăn ngo, tơdroăng tâ phĭu, tơbriât to pro kăn dêi vâi krâ a pơlê đi đo châ vâi krâ tơmâng ‘nâi nhên. Pakĭng mê, cheăm xuân tơtrŏng tâ troh hnoăng tâ phĭu, tơbriât to pro kăn dêi mâu ngế tơbriât to pro kăn cho mơngế hdroâng kuăn ngo vâ tơdroăng tâ phĭu châ tơkŭm po tơ’lêi hlâu, châ tơƀrê:

“Tơdroăng tơbleăng ngế tơbriât to pro kăn teăng mâ Hô̆i đong hnê ngăn kuăn pơlê rêm râ xuân châ mâu khu tơrŭm cheăng kal kí pơlê pơla tung cheăm châ rêm ngế tơmâng pêi pro. Ƀă mâu pơlê mê inâi mâu ngế tâ phĭu, ngế tơbriât to pro kăn troh nôkố hiăng tơbleăng. Ngăn tiô pơkâ mê châ pêi pro seá ngăn ƀă tơpui tơno mâu troăng 1,2,3 ƀă tơtrŏng mâu ngế ki loi tơngah, ai ivá pêi cheăng rơkê vâ kâi pêi hnoăng cheăng drêng châ rah xo kăn teăng mâ Hô̆i đong kuăn pơlê”.

Pakĭng mê, tơtrŏng hnoăng tâ phĭu, tơbriât to pro kăn dêi vâi krâ hdroâng kuăn ngo tung tâ phĭu rah xo Kuô̆k hô̆i ƀă Hô̆i đong kuăn pơlê rêm râ kal châ pêi pro tơdâng ing tơdroăng châ hlo, rah xo, pơkâ pêi, hnê mơjiâng, hnê tơ’nôm, tơmiât nhên, xúa vâ tơxâng tiô pơkâ rah xo kăn ƀô̆ tiô pơkâ tơdjuôm dêi Đảng ƀă Tơnêi têa. ‘Na ton xŏn, kal pơtối tơmâng tâ ƀă khu kăn ƀô̆, mơngế cheăng cho mơngế hdroâng kuăn ngo.

Ƀă mâu kăn ƀô̆ ki rơkê pêi cheăng laga tá hâi tŭm tiô pơkâ mê kal djâ ‘mot tung tơdroăng pêi cheăng, pơkâ hnê mơjiâng vâ tơniăn tơdroăng kal vâ kăn ƀô̆, mơngế cheăng, tung mê ai mâu kơ koan kuăn pơlê rah xo. Rah xo kăn ƀô̆ hdroâng kuăn ngo mơ-eăm tơxâng ƀă pơ’leăng mâ kuăn pơlê rêm kơpong, pơlê. Pakĭng mê, kal tơtrŏng troh mâu tơdroăng ‘na luât ai tơdjâk môi tiah: Luât tâ phĭu rah xo kăn teăng mâ Kuô̆k hô̆i ƀă rah xo kăn teăng mâ Hô̆i đong hnê ngăn kuăn pơlê; mâu mơ-éa hnê mơhno ‘na roh tâ phĭu dêi Tơnêi têa, dêi Vi ƀan pơkuâ Kuô̆k hô̆i ƀă Hô̆i đong tâ phĭu tơnêi têa.

Hải Nguyễn – VOV4 chêh

A Sa Ly tơplôu ƀă tơbleăng