Buôn Mriu  nôkố ai 300 rơpŏng ƀă vâ chê 1.400 ngế, ki hên cho mâu hdroâng kuăn ngo. Tung mâu hơnăm hdrối mê hiá nah, Kŏng ti ngăn on tơhrik Dak Lak đi đo mơ-eăm hnê tối, mơhnhôk kuăn pơlê pêi tro mâu troăng rơhlâ, luât pơkâ dêi Đảng, luât tơnêi têa; hnê tối thế hbrâ rơnáu hlo ai hên mâu tơdroăng khu ‘mêi hriăn vâ pro tơklâ tơdroăng tơrŭm môi tuăn pơla mâu hdroâng kuăn ngo.

Kum kuăn pơlê kơdroh ki xơpá, Kŏng ti ‘no liăn mơjiâng pro hngêi kuăn pơlê tơkŭm hôp, hngê lăm mơdrah ƀuôn Mriu; đi đo tơmâng lăm pôu hbru tơmeăm ăm kuăn pơlê rêh rôh troh leh, têt; rôe 13 to ro hdrê ăm mâu rơpŏng kơtiê păn mơnhông cheăng kâ tung rơpŏng hngêi.

Tâi tâng kơxô̆ liăn khu ngăn on tơhrik Dak Lak kum ƀuôn Mriu tung pơla hdrối kô nah lối 950 rơtuh liăn. Tung la ngiâ, péa pâ pơkâ 5 tơdroăng kal tơrŭm pro nhŏng o pơtối môi tuăn dêi rơpó, rơtế ƀă veăng kum kuăn pơlê mơnhông cheăng kâ, tơniăn kal kí.