Khu ƀok thái pơkeăng ki pleăng dêi hnoăng dêi Hngêi pơkeăng Trương ương Huế dế tơkŭm po tơdroăng khăm ăm mâu kuăn pơlê a mâu cheăm kơpong hngế hngế a kong pơlê Lâm Đồng. Tiô tối hdrối kô ai dâng 2 rơpâu ngế kuăn pơlê châ khăm ing tơdroăng kố.

thái pơkeăng ki pleăng dêi hnoăng kô tơkŭm khăm pơlât a mâu cheăm Dă Chais ƀă Dưng Knớ, tơring Lạc Dương ƀă Đông Thanh, Phúc Thọ, tơring Lâm Hà. Kố cho mâu tơring kơpong hngế hngo, ai hên kuăn pơlê hdroâng kuăn ngo rêh ối.

Kuăn pơlê kô châ khăm ƀă tiâ mơnhên ivá, hbru pơkeăng tê kơtê ăm mâu ngế ki châi tamo hiăng krâ, vâi hdrêng, khăm mâ ƀă hơnĕng ngiâ keăng. Tung tơdroăng khăm a cheăm Dưng Knớ, tơring Lạc Dương a hâi 7/8, khu kố hiăng khăm, hbru pơkeăng tê kơtê ăm vâ chê 500 ngế kuăn pơlê. Diâp 400 kơxuô tơmeăm ăm mâu rơpŏng châ tơnêi gum, rơpŏng kơtiê, rơpŏng pá puât tung cheăm.