Tơbleăng Tơdroăng “Hyôh ƀă kơmăi tĭnh ăm o”, kơvâ ngăn hnê hriâm kong pơlê Dak Lak hiăng mơhnhôk, krếo thế ing pơlê pơla veăng tŏng kum liăn vâ roê 14 rơpâu toăng kơmăi tĭnh ăm mâu vâi o hok tro kơtiê. Tung pơla hdrối nah, Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Lak hiăng krếo thế mơhnhôk tơlo ing mâu kơxô̆ liăn tŏng kum châ 40 rơtal, mê cho: 5 rơtal sap ing liăn mơhnhôk dêi kơvâ ngăn hnê hriâm ƀă hnê mơjiâng tuăn ngo rơkê; 35 rơtal liăn tơlo kum sap ing Grup pơkuâ On tơhrik Việt Nam xua Khu xiâm ngăn hnê hriâm ƀă hnê mơjiâng tuăn ngoâ rơkê mơ’no kum ăm kong pơlê.

Klêi kơ’nâi tơdah xo 35 rơtal liăn, Khu ngăn hnê hriâm ƀă hnê mơjiâng tuăn ngoâ rơkê Dak Lak hiăng tơrŭm ƀă Tíu xiâm tơbriât tê kế tơmeăm kong pơlê tơkŭm po tơbriât tê tơmeăm, roê kế tơmeăm tiô pơkâ. Tơdroăng kố, tơrŭm inâi 3 kŏng ti châ tro tơdroăng tơbriât tê tê 14 rơpâu toăng kơmăi tĭnh bảng ăm hok tro ƀă yă tê 2.294 rơpâu tung môi toăng, tơ’mô lối 32 rơtal liăn. Kơxô̆ liăn kơdĭng ing tơbriât tê vâ chê 3 rơtal hiăng châ Khu ngăn hnê hriâm ƀă hnê mơjiâng tuăn ngoâ rơkê pơtroh ăm râ ki ai hnoăng pơkuâ pơtối roê tơ’nôm vâ teăm kum tơdrêng ăm hok tro xơpá.

Pôa Đỗ Trường Hiệp, kăn phŏ pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Lak ăm ‘nâi:

“Ing rôh mơhnhôk kố, ngin pro tơdjâk tơdroăng kố ôh ti xê to ƀă kơvâ ngăn hnê hriâm mê ối hên kơvâ cheăng ki ê, tá mâu ngế krê kuăn pơlê, tơdroăng ki bro tơdjâk tung pơlê pơla môi túa ki mơhnŏng vâ xêh vâ tâi tâng kuăn muăn a kong pơlê Dak Lak pơrá châ hriâm tâp tung pơla ai pơreăng COVID, ôh tá ăm hok tro ki lâi tro lôi pá rŏng”.