VOV4.Xơ Đăng - Tung 2 hâi, lơ 29 troh lơ 30/9, Khu ngăn mô đô̆i hơnăm hiăng krâ kong pơlê Dak Lak tơkŭm po hneăng hôp mâu kăn roh má 7, hneăng 2022-2027. Ki nếo dêi Hneăng hôp kố mê cho tơdroăng ki mơhnhôk rêm khu râ veăng tŏng kum ăm lối 1 rơpâu 700 rơpŏng mô đô̆i hơnăm hiăng krâ pêi kâ châ hluăn kơtiê, mơnhông pro kro mơdrŏng.

Cho khu ki châ ăm phep mung liăn ing hngêi rak liăn, rêm râ Khu pơkuâ ngăn mô đô̆i hơnăm hiăng krâ kong pơlê dế pơkuâ vâ chê 30 rơpâu rơpŏng mung liăn, tâi tâng kơxô̆ liăn mung lối 1 rơpâu 100 rơtal liăn, tăng cheăng pêi ăm lối rơpâu ngế pêi cheăng, mơngế tung khu ƀă kuăn ‘nĕng; mơjiâng kơxô̆ liăn ki vâ tŏng kum tơdroăng cheăng tung khu vâ chê 92 rơtal liăn, hnê djâ, mơhnhôk thế po rơdâ mâu ngế mô đô̆i hơnăm hiăng krâ pêi cheăng kâ rơkê, pêi chiâk pêi deăng châ rơhéa.

Tung plâ 5 hơnăm hdrối ai 1.753 rơpŏng mô đô̆i hơnăm hiăng krâ Dak Lak châ hluăn kơtiê

Tung hneăng ki nếo, ƀă tơdroăng pơkâ ‘’Môi tuăn-Tơrŭm-Djâ troăng-Hơ’lêh nếo”, mê Khu pơkuâ ngăn mô đô̆i hơnăm hiăng krâ kong pơlê Dak Lak khŏm hnê mơjiâng 1 troh 2 túa cheăng kâ ki rơkê nếo, tê mơdró kâ nếo, ai tơmeăm khoăng ki mơjiâng thôn pơlê ki hloh hlê rơkê plĕng, veăng kring vế, rak ngăn tơniăn tơdroăng rêh ối pơlê pơla, troăng prôk ƀă po rơdâ mâu kâu lăk ƀô̆ hnoăng cheăng mô đô̆i hơnăm hiăng krâ tung rak vế ngăn tơnêi tíu, hyôh kong prâi a pơlê cheăm.

VOV Tây Nguyên/Tơplôu: Nhat Lisa