A cheăm xơpá hngế hngo Yang Mao, tơring Krông bông (Dak Lak) Kŏng ti Schneider Electric Việt Nam tơrŭm ƀă mâu kăn cheăm, tơring, kong pơlê tơkŭm hbru 60 toăng kơmăi tính râng kŏng ăm Hngêi trung râ má péa Yang Mao ƀă Tíu ‘măn rak hên túa hlá mơ-éa dêi ƀuôn Kiều, cheăm Yang Mao, diâp hnoăng liăn hriâm ăm mâu vâi o hok tro a ƀuôn Kiều ki dế hriâm a mâu hngêi trung tung cheăm. Hâi hbru tơmeăm cho môi pâ tơdroăng pêi pro tŏng kum  ai inâi “Eăng bâ ƀuôn Kiều - Light up ƀuon Kieu’’ dêi mâu khu tơrŭm tŏng kum.

Tung mê, 30 toăng kơmăi tính hbru ăm Hngêi trung râ má péa Yang Mao, ƀă 30 toăng kơmăi ki ê ăm Hngêi ‘măn rak hên túa hlá mơ-éa ƀuôn Kiều, tơdrêng ƀă kơxô̆ liăn thuê bao Internet. Pakĭng mê, khu kố ối diâp 20 hnoăng liăn hriâm ăm mâu vâi o hok tro a ƀuôn Kiều, ki kơtiê xơpá la hriâm rơkê, rêm kơxu tơmeăm kơnâ 1 rơtuh liăn.

Thái Trần Hữu Phước, Ngế pơkuâ hngêi trung râ má péa Yang Mao, cheăm Yang Mao, tơring Krông Bông ăm ‘nâi, tơdroăng hriâm dêi mâu hok tro a ƀuôn Kiều ối xơpá, châ mâu tíu pêi cheăng hbru hnoăng liăn ƀă hbru kơmăi tính kô pro tơ’lêi hlâu ăm mâu vâi o tâ nếo tung tơdroăng hnê ƀă hriâm a kơpong hngế hngo xơpá kố.