Drêng troh Têt Lo hơnăm kố, kong pơlê Dak Lak xúa kơlo pơkâ kum 500 rơpâu liăn/ngế ƀă mâu kăn ƀô̆, kŏng chưk, viên chưk, mâu ngế pơtê cheăng hơnăm hiăng krâ, kơjo kum pơlê pơla, mâu lêng tơplâ, mâu ngế ai hnoăng tơnêi têa; kơlo 1 rơtuh liăn/ngế ƀă krâ pơlê, kăn thôn, ƀă mâu ngế ki rơkê;  kơlo 1,3 rơtuh liăn/ngế ƀă mâu ai hnoăng kơhnâ rơkê. ‘Na tơmeăm hbru ăm, kơlo tơmeăm ki ăm khu pú hên sap 500 rơpâu liăn/hnoăng (mâu hơnăm hdrối) tâk 1-2 rơtuh liăn/hnoăng, tâi tâng kơxô̆ liăn ‘no lăm pôu ƀă hbru tơmeăm ai lối 76 rơtal liăn, tâk lối 30 rơtal liăn tâng vâ pơchông ƀă hơnăm 2022.

Vi ƀan Măt trâ̆n tơnêi têa Việt Nam kong pơlê ƀă Khu lo tŏng veăng kong pơlê Dak Lak xuân hbru ăm lối 3 rơpâu kơxu tơmeăm (kơnâ 500 rơpâu liăn/hnoăng) ăm mâu rơpŏng kơtiê, rơpŏng xơpá a 11/15 tơring, pơlê kong krâm, kong kơdrâm. Krê mâu tơring Ea Sup, Krông Bông, Ƀuôn Đôn, Lak châ xoăng ăm, kơjo kum tơmeăm Têt ing kơxô̆ liăn tŏng kum dêi grup ki kân ƀă hên ki ê.