VOV4.Xơ Đăng - Kong pơlê Dak Lak dế tơbleăng hên hĭn mâu tơdroăng tơkêa, kế tơmeăm ki xiâm ƀă tơdroăng ki rơhêng vâ tơnêi gu bro tơbăng, tâp kơđu tơnêi troh lối rơtuh met khô̆i. Laga, ai mâu tơdroăng ki phá tơ-ê cho lâp kong pơlê tá hâi ai môi tíu tơnêi ki lâi châ hbru ăm phêp. Tơdroăng kố cho hên tơdroăng tơkêa, kế tơmeăm ki kal dế mơni kô tro hrá xua ôh tá ai tơnêi.

Tơdroăng tơkêa pro Troăng kân Hồ Chí Minh troăng ki ví peăng mâ hâi Lo Ƀuôn Ma Thuột ki xŏn gá va achê 40km, tâi tâng kơxô̆ liăn ‘no mơjiâng pro lối 1.500 rơtal liăn, xua Khu rak ngăn tơdroăng tơkêa bro ‘no liăn mơjiâng pro troăng kân ƀă Khu ngăn ‘na chiâk deăng mơnhông thôn pơlê kong pơlê Dak Lak pro xiâm pơkuâ mơjiâng pro. Tơdroăng tơkêa bro pơxiâm tơbleăng pro apoăng hơnăm kố ƀă tiô pơkâ kô pro klêi a hơnăm 2023.

Tơdroăng tơbleăng mơjiâng pro dế trâm pá tơvâ tơvân, malối cho oh tá ai tơnêi vâ ok pro troăng. Pôa Hoàng Đình Chương, Ngế pơkuâ Kŏng ti  An Nguyên, ki xo hnoăng mơjiâng pro bă kơxô̆ liăn mơjiâng tơdroăng tơkêa kơxô̆ 4 dêi tơdroăng tơkêa pro troăng mê ki xŏn dâng 10km  ăm ‘nâi, nôkố dế kal dâng 200.000 met khô̆i tơnêi vâ ok a troăng, pro tơdjâk troh tơdroăng mơjiâng pro. Tiô pôa Chương, hnoăng cheăng mê cho dêi peăng Khu xiâm pơkuâ ‘no liăn cheăng ƀă kố cho tơdroăng ki pá hâi teăm ‘nâi vâ tăng tơnêi ulâi vâ ok pro:

“Tung tơdroăng vê hdró cho thế ai 1 rơtuh met khô̆i tơnêi la dế ôh tá ai tơnêi, kal vâ 200.000m khô̆i tơnêi la kô oh tá ai. Tung mê cho tung kơxô̆ liăn tơdroăng tơkêa kơxô̆ 4 dêi kŏng ti An Nguyên, nôkố thế tăng 200.000m3 tơnêi ulâi vâ ai . Ngế pơkuâ ‘no liăn mơjiâng pro ăm ‘nâi hâi tăng hlo tíu tơnêi vâ xo’’.

Tơdroăng tơkêa pro Troăng Hồ Chí Minh troăng ki ví peăng mâ hâi Lo Buôn Ma Thuột dế tơbleăng mơjiâng pro la ôh tá ai tơnêi vâ ok a troăng

Oh tá ai tơnêi vâ gu, ok ăm tơbăng, xuân cho tơdroăng ki pá hmâ hlo dêi hên tơdroăng tơkêa bro ki kal a Dak Lak môi tiah tơdroăng tơkêa bro long Ea Tam, ƀă tâi tâng kơxô̆ liăn ‘no mơjiâng dâng 1.500 rơtal liăn ƀă tơdroăng tơkêa pro troăng kân Peăng mâ Hâi Lo - Peăng mâ Hâi Lu ƀă tâi tâng kơxô̆ liăn ‘no mơjiâng pro lối 1.200 rơtal liăn xua Khu rak ngăn tơdroăng tơkêa bro pơlê kong kơdrâm Ƀuôn Ma Thuột pro xiâm teăng mâ pơkuâ ‘no liăn mơjiâng.

Pôa Lê Khắc Đô, Ngế xiâm pơkuâ ƀơrô ngăn tơmeăm khoăng tung kơdâm tơnêi, Khu xiâm ngăn tơmeăm khoăng ƀă hyôh kong prâi kong pơlê Dak Lak ăm ‘nâi, pơla hdrối nah tơdroăng kal vâ tơnêi vâ gu xo ok tơbăng hâi châ tơmâng khât troh tung mâu pơkâ ton nah lâp kong pơlê ôh tá ai tíu xo tơnêi ulâi. Tơdroăng xo tơnêi ki hên xúa ing mâu tơdroăng tơkêa, mơjiâng tơmeăm khoăng lơ ing mâu tơnêi hmốu la tơnêi ki vâ xúa ôh tá bê ăm hên tơmeăm ki mơjiâng pro, tơdroăng tơkêa bro dế tơbleăng pêi  pro nôkố.

Vâ kơdroh ki xơpá ‘na tơnêi ăm mâu tơdroăng vâ mơjiâng tơmeăm khoăng, tơdroăng tơkêa bro khế 2 hơnăm 2022 Khu xiâm ngăn tơmeăm khoăng ƀă hyôh kong prâi hiăng tí tăng ‘nâi ăm Vi ƀan kong pơlê Dak Lak kĭ pơkâ tơmeăm khoăng tung kơdâm tơnêi, po tăng ngăn 59 tíu ai tơnêi hên riân châ dâng 20 rơtuh met khô̆i, vâ tối ai va sap tơnêi pêi pro tơdroăng tơkêa bro troăng. Laga, hâi khế vâ ăm hlá mơ-éa phêp gu xo tơnêi mê ai 7-8 khế, mâu tơdroăng tơkêa bro ki ‘nâ kô hrá châ mơjiâng pro.

Pôa Lê Khắc Đô xuân tối mơnhên, ƀă mâu tơdroăng tơkêa bro oh tá bê tŭm tơnêi tối krê, tơmeăm mơjiâng pro tối tơchoâm, thế ai hnoăng cheăng dêi Ngế pơkuâ ƀă tíu mơjiâng pro hnê tối vê hdró:

“Hneăng pêi pro dêi vâ thế lăm séa ngăn rah xo tơmeăm vâ pro.  Ki xiâm chêh tơdroăng tơkêa ‘no liăn mơjiâng pro tơmeăm khoăng ki xiâm thế pro tơdâng tơdroăng chiâ kơđu ngoh thế ‘nâi nhên tíu mê tơnêi ga ti lâi tâng mâu tơmeăm vâ mơjiâng pro chêh tung tơdroăng tơkêa rơlối, tâng ôh tá bê tŭm mê ngoh athế ‘nâi nhên xo tơmeăm vâ mơjiâng mê ah alâi.

Tíu pêi cheăng séa ngăn vê hdró  thế rah xo mâu tíu  ai tơnêi tơtro ƀă tơdroăng tơkêa bro, klêi mê nếo pâ thế mâu tơdroăng tơkêa. Tơkéa vâ tối tung pơla pêi pro tơdroăng tơkêa vâ ’no liăn mơjiâng pro tơmeăm khoăng thế chêh bro hlá mơ-eá hdrối ‘nôi vâ ‘no liăn mơjiâng pro vâi thế pro hdrối mê, ing kơxô̆ liăn vâ ’no pêi  pro troh tơdroăng tơkêa bro vâ mơjâng mê, tơdroăng tơkêa bro thế ai pái rôh pro:

Tối ‘na ki ê, pôa Trần Đình Nhuận, Ngế pơkuâ ngăn tơmeăm khoăng ƀă hyôh kong prâi Dak Lak ăm ‘nâi, ki tơvâ tơvân tung tơdroăng tăng tơnêi vâ gu xo ôh a mâu  tíu pro troăng, tơdroăng tơkêa bro hâi tro ‘na luât pơkâ, ‘na luât tŏng kum. Tiô Luât Tơnêi tơníu, ƀă tơmeăm khoăng tung kơdrâm tơnêi hmâ hlo tơnêi thế pêi pro tiô luât pơkâ hiăng tơhrâ. La tơdroăng khu mơdró lăm tơhrâ ƀă kuăn pơlê hmâ hlo ôh tá rơhéa xua yă lối kơnâ, ai ngế ki ‘nâ pro yă troh chât rơtal liăn tung môi ha, ôh tá chiâng pêi pro. 

Ƀă mâu tơdroăng tơkêa ki xiâm dêi tơnêi têa, Kuô̆k hô̆i, Chin phuh ai Pơkâ krê vâ lêi tah tơdroăng tơvá tơvân la ƀă mâu tơmeăm khoăng mơjiâng pro a kong pơlê gá pá: 

“Tiô khoản 3, Troăng 62 Luât tơnêi tơníu mê Tơnêi têa xo tơvêh tơnêi tơmeăm khoăng la hmâ hlo ôh tá riân tơmeăm khoăng, tơkeá vâ tối tơnêi kơđu. prê, hmốu, luât pơkâ thế tro tiô tơhrâ.

Tung pơla mê, tâng tơnêi têa xo tơvêh vâ pro hlá mơ-éa ăm phêp tí tăng ngăn vâ ‘no liăn mơjiâng tơmeăm khoăng mê ing tơdroăng hbrâ apăng thế ‘nâi nhên mê cho vế hdró ki ai xiâm dêi tơdroăng ‘no liăn mơjiâng pro mê nếo ai xiâm ki tro luât vâ xo tơvêh. Mâu tơdroăng tơkêa bro ki kân pơtih troăng pâ tơdrăng lĕm ing peăng Kơnhŏng - peăng Hdroh mê Kuô̆k hô̆i, Chin phuh ai pơkâ krê. La mâu tơmeăm khoăng dêi râ kong pơlê, râ tơrung gá pá”.

Tơdroăng ôh tá bê tơnêi vâ gu xo ok a tíu pro troăng dế pro hên tơdroăng tơkêa bro, tơmeăm khoăng vâ mơjiâng pro a Dak Lak mơni kô hrá vâ mơjiâng pro klêi. Tơdrêng ƀă mâu tơdroăng tơvâ tơvân tung tơdroăng pơkâ hdró, séa ngăn, mơjiâng tơdroăng tơkêa bro, ai hnoăng pêi pro dêi ngế xiâm pơkuâ ƀă mâu tíu pêi cheăng tơdjâk troh mê tơdroăng tăng xo tơnêi ăm mâu tơdroăng mơjiâng tơmeăm khoăng, tơdroăng tơkêa bro xuân dế trâm pá kal tăng troăng lêi tah ing luât pơkâ, luât tŏng kum ‘na tơnêi tơníu, tơmeăm khoăng tung kơdrâm tơnêi.

Công Bắc chêh

Gương tơplôu tơbleăng