Khế 9 hơnăm 2022, o Lương Thị Trâm Anh, đoân viên Chi đoân lâm 12A4, hngêi trung râ má pái phôh thong Phan Bội Châu, tơring Krông Năng, kong pơlê Dak Lak hâk tơngăm châ mot tung Đảng drêng klăng 18 hơnăm. Kố cho tơdroăng ki hâk tơngăm ‘na tơdroăng ki vêh mơnhên tối dêi mâu thái cô, pú hmâ ƀă mâu tơdroăng kơdo mơ-eăm tung hriâm tâp ƀă tơdroăng ki uăn pât dêi mâu vâi o tung plâ hên hơnăm hdrối mê hía nah.

O Trâm Anh tối ăm ‘nâi:

‘’Ki hâk mơnê á hiăng chiâng mơngê hơ’lêh phá tơ-ê. Mê cho môi hvêa chêng tung plâ tơdroăng rêh ối tơná á. Xua ti mê, npin athế pêi pro klêi lĕm hnoăng cheăng tơná’’.m

O Võ Thị Như Ngọc, Kăn pơkuâ hnê ngăn Chi đoân lâm 12A1, Hngêi trung râ má pái phôh thong Lê Qúy Đôn, pơlê kong kơdrâm Ƀuôn Ma Thuột, kong pơlê Dak Lak ai tối tiah kố, tung pơla hriâm, o đi đo kơdo mơ-eăm, kơhnâ pơtâp vâ pât dêi châ tơná chiâng tơdroăng ki vâ khoh châ mot tung khu Đảng. Tung mâu hơnăm hriâm a hngêi trung o pơrá cho hok tro ki rơkê khât păng ‘nâng, rơkê hên tơdroăng, kơhnâ tung hnoăng cheăng dêi Đoân.

Kơnôm mâu tơdroăng ki kơdo mơ-eăm dêi tơná, khế 10 hdrối mê hía nah, o châ Đảng ủy hngêi trung tơbleăng tối lâm hriâm hlê plĕng ‘na Đảng. Kố bu cho tơdroăng k apoăng o hâk tơngăm:

‘’Á hlo dêi tơná hâk tơngăm ‘nâng cho môi tung mâu ngế ki iâ ngế châ veăng tung lâm hriâm tơdroăng cheăng Đảng. Kố châ ngăn cho roh ki á vâ mơnhông dêi tơná ƀă chiâng vâ pêi pro mâu tơdroăng ki ai pơxúa khât, tơdroăng ki kơdo mơ-eăm dêi mâu vâi pú tâ tá tung hngêi trung’’.

Cô hnê chư Nguyễn Thị Xuân Hương, Kăn pơkuâ hnê ngăn Đảng uỷ, Kăn pơkuâ hngêi trung râ má pái phôh thong Lê Qúy Đôn tối tiah kố, tơdroăng ki tăng rah mơngế rơkê kơhnâ vâ mơjiâng đảng viên cho tơdroăng ki kal ai pơxúa kân khât. Xua ga, pêi pro lĕm tro hnoăng cheăng ki kố ti xê to mơjiâng pro tơdroăng ki lĕm tro, dâi lĕm khât ăm mâu khu pơkuâ hnê ngăn Đảng, vâ ga mâu vâi rơxông nếo pơrá châ mot đảng, mê ối veăng kum kal khât tung tơdroăng hnê mơhno cheăng kal kí, ‘na tuăn tơmiât tung hngêi trung.

Tơdrêng amê, hnối po rơdâ hnoăng cheăng dêi khu rơxông nếo ƀă Đảng, kum mâu vâi pú rơxông nếo rêh ối tơtro ƀă tuăn loi ƀă ai tơdroăng ki pói vâ pêi pro hên hnoăng cheăng ai pơxúa kân khât.

‘’Vâi rơxông nếo nôkố cho hlê plĕng hên khât, athế thăm tăng rah xo mơngế ki nrơkê kơhnâ vâ mot Đảng ing apoăng vâ ga a hngêi trung đăi hok ah vâi o kô châ tơ’lêi hlâu vêh mơnhên dêi tơná rĕng tâ’’.

Vâ mơnhông mơdêk mơngế ki rơkê kơhnâ mot Đảng tung hngêi trung, Đảng uỷ, Khu pơkuâ hnê ngăn hngêi trung kal athế hnê tối, mơhno djâ troăng ăm rêm khu râ pơtối mơdêk hên tâ nếo hnoăng cheăng dêi khu pơkuâ ngăn Đoân droh rơtăm tung pêi pro tiô tơdroăng cheăng, hnê mơhno tuăn mơno, tơdroăng cheăng kal kí, hlê plĕng ‘na Đảng ăm hok tro.

Tơdrêng amê, hnê tơdjâ mơhno mâu tơdroăng vâ hnê pât tơdroăng ki hloh hlê rơkê plĕng, ‘nâi nhên ‘na hiâm mơno ƀă po troăng hơlâ ăm vâi o i kơdo mơ-eăm. Ing tơdroăng ki hiăng hlê plĕng tung mơnhông tăng rah hok tro rơkê kơhnâ vâ mơnhông đảng viên tung hngêi trung hriâm dêi tơná, pôa Lã Mạnh Hà, Kăn pơkuâ hnê ngăn Đảng uỷ, Kăn pơkuâ ngăn hngêi trung râ má pái phôh thong Phan Bội Châu, tơring Krông Năng ai tối tiah kố:

‘’Khu pơkuâ ngăn Đoân droh rơtăm Kŏng san Hồ Chí Minh tung hngêi trung kơnôm châ tơdroăng ki hnê mơhno, veăng vâ môi tuăn hên ing Khu pơkuâ hnê ngăn Đoân tơring xuân môi tiah khu pơkuâ ngăn ‘na cheăng kal kí pơlê pơla xua mê, drêng mâu vâi o ai veăng hlê plĕng, veăng pêi pro sap ing apoăng mê hngêi trung xuân rak vế tơdroăng ki ai châ rah xo mâu vâi o ki rơkê plĕng khât.

Tung tơdroăng hnê hriâm mê mâu thái cô ki hnê tơrêm môn xuân môi tiah mâu thái cô pơkuâ ngăn lâm po troăng ƀă tí tăng ‘nâi plĕng vâ kum ăm hngêi trung pêi pro klêi hnoăng cheăng kal kí vâ mơnhông mơdêk tăng rah đảng viên cho mâu vâi o hok tro’’.

Tiô pôa Phạm Đăng Khoa, Kăn pơkuâ ngăn ‘na hnê hriâm kong pơlê Dak Lak, hơnăm hriâm 2021-2022 ai 18 ngế hok tro, hngêi trung râ má pái hiăng rah ‘mot vâi ki mê mot Đảng. Kố châ ngăn cho tơdroăng ki ối iâ tâng vâ pơchông ngăn ƀă lối 41 rơpâu ngế đoân viên ki dế hriâm tơpui tơno a mâu chi đoân tung mâu hngêi trung râ má pái phôh thong dêi kong pơlê.

Xua ti mê, Khu ngăn ‘na hnê hriâm ƀă hnê mơjiâng tuăn ngôa rơkê hiăng pâ thế mâu hngêi trung kal athế tŏng kum hên tâ nếo troh tơdroăng ki mơnhông rah ‘mot mơngế rơkê mot đảng viên cho khu vâi hok tro, ngăn kố cho môi tung mâu hnoăng cheăng kal kí ki xiâm, hnoăng cheăng pêi pro đi đo dêi hngêi trung.

Pôa Phạm Đăng Khoa tối ăm ‘nâi:

‘’Ngin tŏng kum ngăn khât troh tơdroăng veăng kum vâi o kơdo mơ-eăm uăn pât dêi hiâm mơno vâ pêi pro klêi dêi hnoăng cheăng tơná ‘na hriâm tâp, xuân môi tiah tơdroăng hlê plĕng nhên dêi hnoăng cheăng tơná cho khu hơnăm ối nếo mot tung tơdroăng cheăng Đảng vâ mâu vâi o veăng kơdo mơ-eăm veăng tơlo dêi ivá tung tơdroăng mơjiâng ƀă kring vế tơnêi têa Việt Nam troh la ngiâ’’.

Ƀă tơdroăng ki tŏng kum ngăn khât tung tăng rah hok tro rơkê kơhnâ mot đảng viên a hngêi trung, kơvâ hnê hriâm ƀă hnê mơjiâng tuăn ngôa rơkê dêi kong pơlê Dak Lak hiăng ƀă dế kơdo mơ-eăm mơjiâng đảng viên hơnăm ối nếo ki hloh hlê, rơkê plĕng, ai hiâm mơno ki kâi chân, krá tơniăn. Sap ing mê, pơtối mơhnhôk hiâm mơno ki pleăng dêi hnoăng cheăng tơná drêng hơnăm ối nếo vâ mơjiâng Đảng, mơjiâng khu pơkuâ cheăng kal kí vâ mơnhông dêi pơlê pơla, cheăm bêng, tơring, kong pơlê ƀă tơnêi têa.