Hâi lơ 8/3, Vi ban kong pơlê Dak Lak tơkŭm hôp tơpui tơno tơmâng xo tơdroăng veăng hnê tối dêi kuăn pơla ƀă tơdroăng chêh ‘na luât tơnêi (‘mâi hơ’lêh).  Hên tơdroăng veăng hnê tối ‘na pơcháu tơnêi, ăm mung pê tơnêi, pơ’lêh xúa tơnêi, xo tơvêh tơnêi, chêl thiăn, kơjo kum ‘mâi mơnhông drêng tơnêi tro xo tơvêh hiăng châ mâu kăn tối tơbleăng.

Tiô mâu kăn, tung tơdroăng pơkâ xo tơvêh tơnêi trâm xơpá, ối ai tơdroăng tơvâ tơvân mâu tơdroăng săm phoăng ki pá, krâm mơngế, ki hên xiâm cho hâi pơkâ nhên ‘na luât xo tơvêh chêl thiăn kơjo kum, hâi vâ môi tuăn dêi rơpó tung tơrŭm pêi. Xua mê, tơdroăng pro hlá mơ-éa chêl thiăn, kơjo kum, pro pơlê nếo, xo tơvêh tơnêi kal kuăn pơlê ki pro xiâm, tơbleăng ăm ‘nâi nhên ƀă hnoăng tối nhên ăm hlê, tơniăn tơtro ai pơxúa ăm tơnêi têa, khu mơdró ƀă kuăn pơlê.

Ăm hnê tối ‘na mơdêk liăn ‘măn kơdĭng tơnêi mơjiâng tơnêi ki ‘măn ‘na pêi chiâk, pêt loăng kong ing tơdroăng ăm mung ƀă pơlêh ăm xúa, mâu kăn tối mê cho tơdroăng ki nếo pro tơ‘lêi hlâu tung tơdroăng pêi cheăng mơdêk deăng tơnêi pêi kâ. Laga, luât kal pơkâ nhên tâ nếo ‘na mâu ngế ăm mung pêi tơnêi lơ pơcháu ăm ngế ki ê.

Hneăng hôp, mâu kăn tơkŭm tơpui nhên ‘na tơdroăng tơkŭm pêi tiô pơkâ, tơdroăng pơkâ xúa tơnêi; mâu pơkâ ki tơdjâk troh mơdêk rơdâ tơnêi ki ‘măn; ‘na pro hlá mơ-éa tơnêi, ăm hlá mơ-éa mơnhên xúa tơnêi ƀă mâu tơdroăng pro hlá mơ-éa ki ê, tơdroăng ai chêh ‘măn tung kơmăi, tơdroăng ‘na tơnêi tơníu.