Châ xo tơmeăm ki kơnâ 1 rơtuh liăn ƀă phĭu liăn 0 liăn xua Khu tơrŭm ngăn ‘na pêi cheăng kong pơlê Dak Lak diâp ăm, ngoh Y Krich Êban, ối a cheăm Ea Tul, tơring Čư̆ Mgar cho ngế ki ối tung Kŏng đoân dêi Tíu xiâm rak ngăn têa krúa ƀă kơpuih văng hngêi trăng, troăng klông dêi thôn pơlê Dak Lak ai tối tiah kố, klêi kơ’nâi 2 hơnăm xua tơdjâk ing pơreăng COVID-19, ngoh ƀă hên ngế pêi cheăng trâm hên pá puât tung rêh ối. Tơmeăm khoăng ki kố cho ai pơxúa kân khât, kum ăm rơpŏng ngoh châ tơdah Têt Qúy Mão hơniâp ro, phâi tơtô, lĕm tơniăn.

“Ti xê to môi ngế á, mê tâi tâng mâu ngế ki pêi cheăng xuân trâm hên xahpá, ai ngế ki ‘nâ ôh tá ai cheăng pêi, ai ngế ki mơhúa môi tiah á châ Khu ngăn ‘na chiâk deăng kĭ tơkêa pêi cheăng ton hơnăm. Rơpŏng á trâm hên xahpá, drêng châ xo tơmeăm ki kố rơpŏng á hơniâp ro khât tung rơnó Têt hơnăm kố”.

Ƀă o Y Hổ H’Mok ối a ƀuôn Akŏ Mleo, cheăm Hoà Thắng, pơlê kong kơdrâm Ƀuôn Ma Thuột, rơxế mái cho xua ing Khu lo tŏng veăng dêi pơlê kong kơdrâm Ƀuôn Ma Thuột mơhnhôk thế mâu ngế ai hiâm tuăn hơ-ui kum tung roh Têt kố tơdroăng ki ai pơxúa ƀă hâk mơnê kân ‘nâng. Rơxế mái kum ăm o tung hơnăm nếo ti xê môi tiah nah, riu kơxo má, prôk chêng vâ teăm troh a hngêi trung, ƀă Têt hơnăm kố, Y Hổ kô chơ dêi o tơná a rơxế mái ki nếo vâ lăm xah ôm hêi ƀă mâu pú hmâ tung pơlê:

“Hdrối nah, ôh tá ai rơxế mái kơto, mê á prôk chêng lăm hriâm, nôkố châ ai rơxế mái á tâ hơniâp ro khât, á kơdo mơ-eăm mơhriâm vâ kơ rêm ngế phiu ro”.

Tung hngêi trăng ki nếo mơjiâng kân rơdâ - krá lĕm mê, ngoh Trịnh Thế Hậu, ối a bêng Thiện An, pơlê kong krâm Ƀuôn Hồ tối ăm ‘nâi, ngoh pêi cheăng tung kơvâ hnê hriâm mê ai 23 hơnăm, to lâi hơnăm hdrối mê hía nah, xua rơpŏng hngêi trâm hên xahpá, tơná ngoh tro êi kliâm, mê hrê liăn hên vâ khăm pơlât xua mê ôh tá ai liăn vâ pro hngêi krê, xuân ối ƀă dêi nôu pâ.

 Hơnăm 2021, ngoh Hậu xo mâi, ai kuăn ‘nĕng, hngêi tơdjuôm mê hiăng hâ ho. Hlo tơdroăng rêh ối xahpá dêi ngoh Hậu, a khế 10 hơnăm 2022, Kŏng đoân kơvâ hnê hriâm dêi kong pơlê Dak Lak hiăng kum ngoh Hậu ai 50 rơtuh liăn vâ mơjiâng pro hngêi tuăn pâ dêi kŏng đoân. A mâu hâi leh Têt, hngêi ki kố hiăng châ mơjiâng pro klêi ƀă hiăng châ mot rêh ối dêi.

“Tâng vâ pơchông ƀă mâu hơnăm hdrối mê hía nah, mê hơnăm kố, rơpŏng ngin ai môi toăng hngêi nếo, hơniâp ro khât, á xuân tơniăn tuăn pêi cheăng. Koh tơdah têt tung tơdroăng ki hơniâp ro tơdjuôm dêi on veăng, pơla kố nah nếo ai môi ngế kuăn, tơdroăng cheăng xuân tơniăn ƀă kơnôm ai tơdroăng tŏng kum dêi mâu ngế ki pêi cheăng tơnêi têa mê ngin xuân mơnê kân khât troh tơdroăng ki tŏng kum dêi tâi tâng mâu pú hmâ”.

Tiô pôa Nguyễn Quang Thuân, Kăn phŏ ngăn ‘na Pêi cheăng ƀă mô đô̆i rong châ-pơlê pơla dêi kong pơlê Dak Lak tối, roh Têt Lo hơnăm nếo Qúy Mão hơnăm 2023, Vi ƀan hnê ngăn kong pơlê Dak Lak hiăng kum 76 rơtal liăn vâ hbru tơmeăm Têt ăm mâu ngế, mâu khu. Lối chât rơpâu hnoăng tơmeăm kum ăm mâu kơtiê xahpá, mâu ngế vâ chê kơtiê ƀă mơngế pêi cheăng ai tơdroăng rêh ối xahpá, xuân hiăng châ mâu khu râ, kơvâ cheăng, khu mơdró ƀă mâu ngế ki ai tuăn pâ lăm xing xoăng kế tơmeăm ăm kuăn pơlê a roh kố.

“Hơnăm kố kong pơlê hiăng hnê thế mâu tơring, pơlê kong krâm, pơlê kong kơdrâm, mâu cheăm, bêng,  pơlê kân kô tơkŭm po mâu tơdroăng cheăng vâ hbru tơmeăm ăm mâu ngế ki kơtiê tung kong pơlê, krê kong pơlê mê mơjiâng 8 khu lăm pôu mâu rơpŏng ai hnoăng tơnêi têa ƀă pôu mâu ngế ki gak ngăn, pêi cheăng a mâu hâi Têt. Pakĭng kơxô̆ liăn dêi kong pơlê tŏng kum mê kong pơlê xuân hiăng hnê thế Khu lo tŏng veăng, Măt trâ̆n ƀă mâu khu râ ki ê kơhnâ khât tung mơhnhôk mâu khu mơdró, khu pơkuâ cheăng a kong pơlê vâ tŏng kum kế tơmeăm ăm mơngế kơtiê xahpá vâ pôi ta lôi mâu ngế pa rŏng”.

Mâu tơmeăm ki ai pơxúa kố hiăng châ diâp troh a kŏng mâu ngế ki kơtiê xahpá tung pơla roh Têt hiăng kum ăm vâi pơtối phâi tơtô, mơhnhôk hiâm mơno vâi thăm rế kơdo mơ-eăm hên tâ tung rêh ối, pói rơhêng vâ hơnăm nếo ai hên tơdroăng ro rih ki nếo.