VOV4.Xơ Đăng - Sap ing apoăng hơnăm 2022 troh nôkố, Tíu xiâm tơbleăng tơdroăng cheăng pêi, Khu ngăn cheăng pêi mố đô̆i rong ƀă pơlê pơla kong pơlê Dak Lak hiăng pơkâ tơleăng tơdroăng ki kum ƀaoh hiêm ôh tá ai cheăng pêi ƀă 8.640 hồ sơ, tâk 43,8% tâng vâ pơchông ƀă khế kố hơnăm 2021. Tiô Tíu xiâm tơbleăng cheăng pêi Dak Lak, tung kơxô̆ ki lối 8.600 to hồ sơ pơkâ thế pơkâ tơleăng tơdroăng tŏng kum ƀaoh hiêm ôh tá ai cheăng pêi, ai lối 5.700 ngế pêi cheăng a mâu kong pơlê ki ê, lối 2.800 ngế pêi cheăng a kong pơlê, tâi tâng kơxô̆ liăn ‘no mơdrếo ƀaoh hiêm ôh tá ai cheăng pêi ai 132 rơtal liăn.

Dak Lak: Lối 132 rơtal liăn ‘no mơdrếo ăm tơdroăng ki kâ liăn ôh tá ai cheăng pêi

Tơdrêng amê tíu xiâm tơbleăng tơdroăng cheăng pêi hiăng tŏng kum hnê cheăng ăm 310 ngế dế châ kâ liăn ƀaoh hiêm ôh tá ai cheăng pêi, ƀă kơxô̆ liăn tŏng kum 1 rơtal 900 rơtuh liăn. Tiô pôa Trần Xuân Đa, Kăn phŏ ngăn tíu xiâm, vâ kum mâu ngế pêi cheăng ôh tá ai cheăng pêi rĕng châ xo ƀaoh hiêm ôh tá ai cheăng pêi, tung 3 khế mơ’nui hơnăm tíu xiâm kô mơdêk tơdroăng pêi cheăng ăm Ƀơrô tơbleăng a pơlê kong krâm Ƀuôn Hồ, tơring Ea Kar ƀă tíu xiâm tơdah xo, pơkâ tơleăng tơdroăng ki châ kâ liăn ƀaoh hiêm ôh tá ai cheăng pêi vâ rak vế tơdroăng pơkâ 3 tro: tro mơngế, tro tơdroăng pơkâ ƀă tro hâi khế.

Katarina Nga tơplôu ƀă tơbleăng