Tung hơnăm 2022, liăn ‘măn kơdĭng tŏng kum kuăn pơlê Dak Lak hiăng châ mơhnhôk tơlo lối 5 rơtal liăn, mơdêk hên kơxô̆ liăn ki mê tâk troh 52 rơtal liăn kum kuăn pơlê mơnhông pêi chiâk veăng kơdroh kơklêa xăm kơtiê. Ing kơxô̆ liăn ‘măn kơdĭng tŏng kum kuăn pơlê, rêm râ Khu ngăn kuăn pơlê pêi chiâk kong pơlê Dak Lak hiăng ăm vâ chê 2.500 rơpŏng mung châ lối 52rơtal liăn vâ ai liăn ‘no pêi chiâk deăng mơnhông cheăng kâ dêi rơpŏng hngêi.

Tơdrêng amê, Khu kố ối tơrŭm ƀă Hngêi rak liăn kum mâu ai hnoăng tơnêi têa, hngêi rak liăn kum’na pêi chiak deăng tơbleăng ăm lối 15 rơpâu rơpŏng kuăn pơlê mung ƀă kơxô̆ liăn ối chĕn lối 600 rơtal liăn. Pakĭng mê, pêi tro tơdroăng mung liăn ƀă mâu khu mơdró kum kuăn pơlê rôe chât rơpâu tâ̆n phon, hdrê loăng plâi, kế kâ chĕm kơpôu ro chu tiô tơdroăng mung hdrối ăm kơ’nâi, tâi tâng kơxô̆ liăn lối 70 rơtal liăn.

Vâ pơtối rak vế ki tơƀrê ‘na liăn mung, tung hơnăm 2022, khu kuăn pơlê pêi chiâk Dak Lak pơtối rơtế ƀă kuăn pơlê tung tơdroăng pêi chiâk, păn kơpôu ro chu, kơhnâ tơbleăng hnê pêi mâu tơdroăng pêi tŏng kum kuăn pơlê, hnê kuăn pơlê hlê khoa hok, kŏng ngê̆; tơbleăng tê dêi tơmeăm pêi lo ing chiâk deăng.