A kơxê măng mơ’nui măng tĭng, Thươ̆ng ŭi Y Biza Rơya, Đô̆i trưởng Đô̆i mơhnhôk khu lêng ƀă kuăn pơlê Đông mố đô̆i gâk tơkăng kong Ia Rvê, rơtế ƀă mâu vâi pú mố đô̆i lăm pôu kơ-êng kuăn pơlê thôn 1, cheăm Ea Rvê. Thươ̆ng ŭi Y Biza ăm ‘nâi, hnê tối mơdêk ki hlê plĕng luât ăm kuăn pơlê cho túa ki vâ vâi krâ nhŏng o hlê ƀă veăng rơtế tơdjuôm ivá rak vế gak kring tơniăn a kơpong tíu tơkăng kong.

“Đông mố đô̆i gak tơkăng kong xuân môi tiah kơ koan, khu râ, kơvâ cheăng dêi kong pơlê hmâ tơrŭm tơkŭm hnê tối mâu luât ki ai tơdjâk troh vâi krâ nhŏng o ƀă tơdroăng ki cho hnê tối tơvât tung mâu rôh hôp thôn, hôp chi ƀô̆ lơ mâu rôh hôp a mâu thôn. Ki kal cho vâi krâ nhŏng o kuăn pơlê athế ‘nâi nhên, hlê khât ƀă pêi pro tro tro tiô mâu tơdroăng pơkâ dêi luât”.

Nâ Lâm Thị Hợp, thôn 1, cheăm Ia Rvê ăm ‘nâi, vâ chê 17 hơnăm lo dêi ing pơlê xiâm Bến Tre ối a tơring Ea Súp pêi cheăng, kơnôm ai tơdroăng ki tơmâng ngăn, tŏng kum dêi khu kăn pơkuâ ƀă khu lêng a cheăm mê rơpŏng nâ hlê ‘na mâu troăng hơlâ pơkâ dêi Đảng, Tơnêi têa, hmiân tuăn pêi cheăng kâ, ‘nâi tơdroăng ki tro mê pêi, tơdroăng ki ôh tá tro mê athế ví.

“Mâu tăm mố đô̆i gak tơkăng kong xuân hiăng tơmâng ngăn, tŏng kum ăm kuăn pơlê xuân môi tiah hnê tối ăm kuăn pơlê. Ing mâu rôh hnê tối mê á xuân hlê ‘na luât ƀă xuân tơrŭm ƀă mâu khu lêng rơtế rak vế tíu tơkăng kong”.

Cheăm tơkăng kong Ia Rvê, tơring Ea Súp, kong pơlê Dak Lak nôkố ai lối 2 rơpâu rơpŏng ƀă lối 6.900 pơleăng mâ mơngế ối tung 23 hdroâng kuăn ngo rơtế rêh ối. Tung mâu hơnăm hdrối nah, rơtế ƀă khu kăn pơkuâ cheăm tơring, Đông mố đô̆i gâk tơkăng kong Ia Rvê hiăng hnê tối, tŏng kum cheăm, veăng tŏng kum mâu tơdroăng ‘na gâk kring thôn pơlê, tơniăn tơdroăng gak kring kal kí, tơniăn tung lâp pơlê pơla.

Thươ̆ng tă Nguyễn Xuân Sơn, Chính trị viên Đông mố đô̆i gâk tơkăng kong Ia Rvê, ăm ‘nâi: tơrŭm krá ƀă kuăn pơlê, pêi pro “rơtế kâ, rơtế ối, rơtế tơpui nâl hdroâng kuăn ngo”, Ia Rvê hiăng mơjiâng châ ivá tâi tâng kuăn pơlê rak vế gâk kring tíu tơkăng kong.

“Tíu pêi cheăng ai 17 ngế pêi cheăng a cheăm. Pakĭng hnoăng cheăng ki pêi, hnoăng cheăng séa ngăn, ma tŭi, mơhnhôk khu lêng ƀă kuăn pơlê mê pêi pro tro hnoăng cheăng hnê tối, mơhnhôk vâi krâ nhŏng o pêi pro tiô troăng hơlâ pơkâ dêi Đảng, luât dêi Tơnêi têa, mơhnhôk kuăn pơlê pêi pro tro tơdroăng pơkâ tíu tơkăng kong, pôi tá pro xôi luât pơkâ tíu tơkăng kong, rak vế gak kring tơniăn tung thôn, pơlê, cheăm”.

Tiô Đăi tă Đỗ Quang Thấm, kăn phŏ pơkuâ hnê ngăn Đảng Khu pơkuâ ngăn Mố đô̆i gâk tơkăng kong kong pơlê Dak Lak, tung pơla hdrối nah, rơtế ƀă tơdroăng ki kum kuăn pơlê mơnhông cheăng kâ, tơniăn tơdroăng rêh ối, khu lêng mố đô̆i gak tơkăng kong hiăng pro hơ’lêh mâu tơdroăng ki hnê tối, tơbleăng, hnê hriâm luât troh kuăn pơlê kơpong tíu tơkăng kong.

Sap ing tơdroăng hnê tối ing mâu loa tơpui, loa ki chiâng lăm ukố umê, tơdroăng ki pêi cheăng tơkŭm a thôn pơlê, xing xoăng hlá mơéa hnê tối, lơ troh rêm rơpŏng, tŏng kum tung mâu tơdroăng cheăng tŏng kum kuăn pơlê pêi cheăng kâ ƀă hên ki ê. Hơnăm 2022, mố đô̆i gâk tơkăng kong dêi kong pơlê Dak Lak hiăng tơkŭm po rôh hnê tối, mơhnhôk vâi krâ nhŏng o mâu cheăm tơkăng kong veăng hbrâ mơdât pơreăng, hbrâ tơplâ mơdât mâu ngế pro xôi ‘na ma tŭi, tê roê mơngế, tơkâ luâ tíu tơkăng kong ôh tá tro luât. Tơdrêng a mê hlối mơjiâng mâu “Kơtuh ‘măn hlá mơéa luât troăng tơkăng kong”, tơrŭm ƀă cheăm tơring mơjiâng mâu tôh tiâ mơnhên luât, kâu lak ƀô̆ pêi pro tiô luât pơkâ ƀă hên ki ê.

Troh nôkố a Dak Lak hiăng ai 26 to kơtuh ‘măn hlá mơ-éa luât ƀă lối 20 rơpâu kơxop hlá mơéa; 38 Tôh rak ngăn gâk kring, rak ngăn troăng tơkăng kong ƀă hên ki ê.

Đăi tă Đỗ Quang Thấm ăm ‘nâi tơ’nôm:

“Môi tung mâu túa pơkâ nôkố mê ngin dế tơbleăng tơrŭm ƀă cheăm tơring, mê cho túa pơkâ “Rơpŏng vâi kơdrâi ôh tá pro xôi tơdroăng pơkâ tíu tơkăng kong” ƀă “Thôn ôh tá ai rơtăm pro xôi luât” vâ bro ivá tơdjâk xuân môi tiah tơdroăng ki hnê tối tung lâp lu. Pakĭng mê, ngin ối mơdêk hnoăng cheăng dêi ngế krâ pơlê, ngế ki pơkuâ thôn, pơlê, ngế ki châ kuăn pơlê loi nhuô̆m vâ pêi pro tro hnoăng cheăng hnê tối, tơbleăng, hnê hriâm luât ăm kuăn pơlê”.

Kong pơlê Dak Lak ai 73 km troăng tơkăng kong tơkoh ƀă kong pơlê Mondulkiri, kong têa Kul; ai 4 to cheăm tơkăng kong ối tung 2 tơring Ea Súp ƀă Ƀuôn Đôn. Mâu tơdroăng cheăng tŏng kum mơnhông mơdêk cheăng kâ rêh ối, tŏng kum ivá ƀă mơdêk ki hlê plĕng ‘na luât ăm kuăn pơlê hiăng kum rak vế gâk kring tơdroăng kal kí, tơniăn tung lâp pơlê pơla, mơjiâng kơpong tíu tơkăng kong rế hía rế tơniăn mơnhông.