VOV4.Xơ Đăng - Ti xê to pơtối châ mơnhông hnoăng cheăng ki rơkê ple\ng, djâ troăng bâ eăng ahdrối, mơhnhôk vâi krâ-nho\ng o veăng kum dêi pó mơnhông pêi cheăng kâ, kơdroh tah kơklêa, xăm kơtiê, mê mâu đảng viên tung kơpong hdroâng kuăn ngo iâ mơngế a Dak Lak ối achê, to\ng kum, veăng cheăng [ă kuăn pơlê vâ tơleăng mơnhên, kum po troăng hơlâ vâ pơle\m, vâ tah lôi mâu tơdroăng ki tơhôu tơhêng, ôh tá môi tuăn dêi pó tung pơlê pơla. Ing mê, mơjiâng tơdroăng tơru\m tơrôa,môi hiâm mơno, mơjiâng pơlê cheăm tơru\m krá tơniăn, hơniâp niân, rơtế rak vế tuăn loi dêi vâi krâ-nho\ng o [ă Đảng.

Rơnó kố, vâi krâ nhŏng o a cheăm Ea Tiêu, tơring Čư̆ Kuin, kong pơlê Dak Lak hơniâp ro pơxiâm mot tung rơnó krí tiu. Xua kong prâi ôh tá tơniăn mot rơnó kơ’muăn plâi mê hơnăm kố ki kơtốu hên dêi tiu tiô tối hdrối kơdroh dâng 30% tâng pơchông ƀă rơnó hơnăm nah, la kuăn pơlê tung cheăm xuân ối hơniâp ro, ôh tá miât klêi hên. Xua ôh tá pêt to tiu tung tơdroăng ki pêt hdrê loăng ton hơnăm, ki hên kuăn pơlê hiăng hơ’lêh pêt tơvât ƀă mâu hdrê loăng ki ê pêi lo châ hên plâ hơnăm.

A môi ƀăng tơnêi, to lâi hơnăm vêh ngi kố, pêi lo liăn dêi vâi krâ nhŏng o hiăng tâk 30 – 40%. Tơdroăng rêh ối kuăn pơlê hiăng hơ’lêh, veăng kum kơdroh kơxô̆ rơpŏng kơtiê a cheăm. Vâ pêi châ tơdroăng ki mê, cho ai ivá veăng kum ôh tá iâ hnoăng cheăng dêi mâu đảng viên a mâu chi ƀô̆ thôn, pơlê tung hnê tối, vâ kuăn pơlê hơ’lêh túa tơmiât rak vế pêi chiâk deăng, khên tơnôu ‘no liăn mơnhông cheăng kâ.

Pôa Y Bom Ƀyă, kăn pơkuâ ngăn chi ƀô̆ Ƀuôn Ê Bung, cheăm Ea Tiêu, tơring Čư̆ Kuin ăm ‘nâi:

‘’Rêm rôh hôp chi ƀô̆ po rơdâ ai khu rak ngăn, khu pơkuâ tơdroăng kal kí cho pơrá hnê tối ăm vâi krâ nhŏng o mơdêk pêi chiâk deăng môi tiah: roê phon rơvât, hriâm ƀối khoa hok kih thât. Pơlê ngin pêt, krí kơphế, tiu, sầu riêng ôh tá ai hên, mê bu pêt tơvât ăm plâi kơtốu hên. Hnê tối vâ mơnhông cheăng kâ tung rơpŏng hngêi’’.

Pôa Y Bom {yă (adế) hnê tối ăm kuăn pơlê pêi pro mâu troăng hơlâ hbrâ mơdât pơreăng COVID-19

Tâng môi tiah đảng viên ki hiăng ton nah môi tiah pôa Y Bom ai hên tơdroăng ki hlê plĕng tung hnoăng cheăng mơhnhôk kuăn pơlê mê mâu đảng viên hơnăm ối nếo cho hdroâng kuăn ngo ai hiâm mơno kơhnâ hâk vâ dêi hơnăm ối nếo, khên tơmiât, khên pêi. Ngoh Y Khăn Niên, kot mâ hơnăm 1991, ngế ki pơkuâ chi ƀô̆ Ƀuôn Knir cho môi ngế ki djâ troăng ahdrối. Sap ing hâi ki châ pôk pro ngế pơkuâ chi ƀô̆, ngoh hlê plĕng hnoăng cheăng kân kĭn dêi tơná. Ôh ti xê to kơhnâ tung tơdroăng cheăng, ngoh ối tơtrŏng troh tơdroăng ki hnê hriâm tơdroăng rêh ối vâ kuăn pơlê loi tơngah.

Ƀuôn Knir ai 90% cho hdroâng kuăn ngo, 98% tiô khôp Tin Lành, la mâu hơnăm hdrối nah, tơdroăng gak kring cheăng kal kí, tơniăn tung pơlê pơla tíu kố đi đo rak tơniăn. Tơdroăng ki tong hơ’vĕng kế tơmeăm, droh rơtăm tơkŭm dêi rơpó, ôu drôu, xiăn pâm dêi rơpó hiăng kơdroh. Malối, hên droh rơtăm tung pơlê hiăng mơ-eăm pêi cheăng kâ châ mâu khu râ, kơvâ cheăng tơmâng ngăn, hnê hriâm tơ’nôm vâ chiâng hô̆i viên, đoân viên ki kơhnâ rơkê vâ tơbleăng ăm chi ƀô̆ cheăm, pơlê.

Ngoh Y Khăn Niê, ngế ki pơkuâ ngăn chi ƀô̆ Ƀuôn Knir, cheăm Ea Tiêu, tơring Čư̆ Kuin tối:

‘’Chi ƀô̆ ƀuôn Knir tung pơla hdrối kố nah xuân hiăng kơhnâ mơnhông đảng viên, nôkố, xuân hiăng châ ‘mot mâu ngế đảng viên hơnăm ối nếo veăng cheăng tung droh rơtăm. Kơhnâ mơhnhôk kuăn pơlê mơnhông mơdêk cheăng kâ, xo mâu kăn ƀô̆ đảng viên djâ troăng hdrối, vâ kuăn pơlê pêi pro ƀối, hnê tối vâ kuăn pơlê hlê plĕng nhên ƀă pêi pro tiô mâu troăng hơlâ pơkâ dêi Đảng ƀă Tơnêi têa’’.

Môi rôh hôp dêi chi ƀô̆ ƀuôn Ea Bung, cheăm Ea Tiêu, tơring Čư̆ Kuin, kong pơlê Dak Lak tơbleăng mâu tơdroăng pơkâ dêi Đảng

Pôa Y Min E`uôl, kăn pơkuâ ngăn Đảng ủy cheăm Ea Tiêu, tơring Čư̆ Kuin ăm ‘nâi: lâp cheăm ai 37 chi ƀô̆, a 24 to thôn, pơlê ƀă 645 ngế đảng viên. Tung mê, ai 125 ngế đảng viên cho hdroâng kuăn ngo. Ƀă tơdroăng ki xiâm cho tai tâng mâu thôn, pơlê pơrá ai kuăn pơlê hdroâng kuăn ngo rêh ối, xua mê đảng viên hdroâng kuăn ngo cho mâu kuăn, mâu vâi pú rơtế prôk ƀă kuăn pơlê mâu hdroâng a troăng mơnhông cheăng kâ, xut tah hrâ mơnguâ kơtiê xơpá, mơjiâng thôn pơlê nếo.

Vâ kum mâu đảng viên hdroâng kuăn ngo ƀă séa ngăn kơtăng khu lêng, kuăn pơlê, Đảng ủy cheăm xoăng hnoăng cheăng ăm mâu vâi pú ủy viên lăm troh a mâu chi ƀô̆ thôn, pơlê. Sap ing tơdroăng ki a chê, tơmâng, teăm tŏng kum tơdrêng muâ rơkong tơpui tối dêi kuăn pơlê mâu đảng viên hiăng chiâng tíu tơdjêp, pro tơdroăng ki loi tơngah dêi kuăn pơlê ƀă Đảng.

Pôa Y Min Ê`uôl, kăn pơkuâ hnê ngăn Đảng ủy cheăm Ea Tiêu ăm ‘nâi tơ’nôm:

‘’Đảng viên pơkuâ pơlê pêi cheăng a thôn phiu ro khât. Mâu tơdroăng klâi kuăn pơlê ối tô tuăn châ tŏng kum tơdrêng, xua đảng viên cho ngế ki ối tơdrêng amê. Drêng lâi khu lêng ƀă kuăn pơlê rơhêng vâ trâm kăn ƀô̆ lơ ai rơkong tơpui tối mâu tơdroăng ki xơpá tơvâ tơvân tung thôn pơlê mê lơ chi ƀô̆ pro môi tiah lâi, lơ đảng viên a cheăm pơlê tơpui tơno môi tiah lâi mê mâu vâi pú tơpui ăm rơkong tơbleăng ăm ngin ‘nâi, lơ ngin pêi ôh tá tro mâu vâi pú athế ai rơkong tơpui tối hlối vâ ngin ‘mâi rơnêu’’.

Ƀă hiâm mơno kơhnâ, pôu râng hnoăng cheăng dêi tơná, mâu đảng viên kuăn pơlê hdroâng kuăn ngo a cheăm Ea Tiêu, tơring Čư̆ Kuin, kong pơlê Dak Lak hiăng tối nhên ƀă mơnhông tro hnoăng cheăng ki kal kum Đảng, khu pơkuâ cheăm, pơlê tơbleăng tơƀrê mâu troăng hơlâ pơkâ, malối cho mâu troăng hơlâ ki ai tơdjâk troh mơnhông mơdêk cheăng kâ rêh ối pơlê pơla kơpong hdroâng kuăn ngo.

Đảng viên hdroâng kuăn ngo cho kơxái tơdjêp krá tơniăn khu  tơrŭm mâu hdroâng kuăn ngo, veăng kum rak vế krá tơniăn tơdroăng kal kí, gâk kring tơniăn tung pơlê pơla, mơdêk cheăng kâ rêh ối pơlê pơla a cheăm, pơlê.

Hương Lý chêh

Katarina Nga tơplôu ƀă tơbleăng