Mơdêk tơdroăng rêh kâ ối ăm kuăn pơlê ki pêi chiâk deăng, malối cho vâi kdrâi hdroâng kuăn ngo a kong pơlê Dak Lak ing tơdroăng ki tơdjêp kuăn pơlê ƀă khu ki pêt mơjiâng kế tơmeăm ƀă hlá mơ-éa ki pêt mơjiâng ƀă kơxô̆ liăn ki kal. Kố cho tơdroăng ki xiâm tung tơdroăng tơkêa Tơná mơ-eăm xua Vi ƀan hnê ngăn pơlê kong krâm Ƀuôn Hồ tơrŭm ƀă Khu tơrŭm tŏng kum hbrâ mơdât kơklêa kơtiê ƀă Tíu xiâm Mơnhông pơlê pơla, kĭ tơkêa tơrŭm cheăng a kơxê lơ 9/2.

Tiô tơdroăng ki xiâm kĭ tơkêa, sap ing nôkố troh tâi khế 8/2024, tơdroăng tơkêa kố kô tơkŭm tŏng kum kuăn pơlê a 2 to cheăm Ea Drông prế Čư̆ Bao, pơlê kong krâm Ƀuôn Hồ, kong pơlê Dak Lak.

Mâu tơdroăng ki xiâm tŏng kum ki hên cho: mơdêk ivá pêt mơjiâng kế tơmeăm ăm rơpŏng kuăn pơlê, malối cho vâi kơdrâi hdroâng kuăn ngo vâ vâi ai tơdroăng rê kâ ối tơniăn; hơ’lêh tơdroăng ki châ xúa liăn ƀă rak ngăn liăn ngân; tŏng kum, mơdêk tơdroăng ki châ a chê ƀă kơchơ tê kế tơmeăm dêi kuăn pơlê. Ing mê kum vâi hơ’lêh túa rêh kâ ối tiô túa ki krá tơniăn.