VOV4.Xơ Đăng - Hbrâ mot tung hơnăm hriâm nếo 2022-2023, Dak Lak dế mơ-eăm mơdêk mơjiâng, ‘mâi rơnêu klêi mâu hngêi trung, lâm hriâm; rôe tơmeăm xúa tung hnê hriâm ăm mâu hngêi trung. Hơnăm hriâm kố, kong pơlê Dak Lak ‘no vâ chê 488 rơtal liăn vâ mơjiâng nếo ƀă ‘mâi rơnêu, pro mâu hngêi trung hriâm ƀă rôe tơmeăm hnê ƀă hriâm ăm sap râ mầm non troh râ má pái phôh thong. Kơxô̆ liăn ki mê tơkŭm ăm mâu kong pơlê kơpong hngế hơngo, kơtiê xơpá, kơpong tơkăng kong ƀă malối mâu hngêi trung râ má môi, vâ tơniăn ăm hok tro hriâm péa hdrôh tung môi hâi tiô tơdroăng hnê hriâm phôh thong hơnăm 2018.

Hngêi trung râ má môi Y Jut, tơring Ƀuôn Đôn (Dak Lak) châ ’no liăn mơjiâng pro 3 to lâm hriâm

 Tiô khu ngăn hnê hriâm ƀă hnê mơjiâng tuăn ngôa rơkê kong pơlê Dak Lak, mơhé kơxô̆ liăn ‘no ăm tơdroăng hnê hriâm đi đo châ kong pơlê tơmâng, pêi ahdrối. Laga, vâ ai tiô tơdroăng púi vâ ‘na tơmeăm, kơƀăng tăng, tơmeăm xúa tung hnê hriâm vâ tơbleăng tơdroăng hnê hriâm phôh thong nếo, lâp tung kong pơlê ối kal ai 500 to lâm hriâm. Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Dak Lak hiăng pơtroh hlá mơ-éa tí tăng ‘nâi plĕng, tối ăm Vi ƀan kong pơlê ăm liăn vâ pêi pro tơdroăng mê.

Gương tơplôu ƀă tơbleăng