VOV4.Xơ Đăng - Drêng ai tơdroăng kong tro ko ‘nhê râ ó, tơdrêng amê hên pơkâ dêi luât, troăng pơkâ pêi, troăng hơlâ ôh tá tơtro ƀă tơdroăng nôkố, kong pơlê Dak Lak nếo pơtroh pơkâ ‘mâi rơnêu, pơ’lêh mâu luât, mâu pơkâ pêi, troăng hơlâ vâ mơdêk châ tơƀrê gâk ngăn, mơnhông pêt kong a kong pơlê. Mâu tơdroăng pâ thế, pơkâ châ Vi ƀan kong pơlê Dak Lak tối tung roh pêi cheăng nếo achê kố pơla kăn pơkuâ xiâm kong pơlê ƀă Khu râ kăn pơkuâ Khu xiâm pơkuâ ‘na pêi chiâk deăng ƀă mơnhông mơdêk thôn pơlê.

Tiô Vi ƀan kong pơlê Dak Lak, kơxô̆ liăn gak ngăn kong tiô pơkâ 38 hơnăm 2016 dêi Ngế pro xiâm hnê ngăn Chin phuh pơkâ a kơlo tŏng kum 300 rơpâu liăn/ha/hơnăm cho iâ tâng pơchông ƀă tơdroăng kal vâ ki khât nôkố, ôh tá tơniăn pơkuâ gâk ngăn kong. Dak Lak pơkâ thế Khu xiâm pơkuâ ‘na pêi chiâk deăng ƀă mơnhông mơdêk thôn pơlê tơbleăng Chin phuh mơdêk kơlo tŏng kum ki vâ iâ 1,3 rơtuh liăn/ha/hơnăm.

Kong pơlê Dak Lak xuân mơnhên, khu gâk ngăn kong nôkố dế ôh tá ai ngế ƀă hên tơdroăng ối pá puât tung pơkâ pêi troăng hơlâ, pá vâ gak ngăn kong. Dak Lak pơkâ thế Chin phuh ai ƀiên chê̆ krê ăm khu gak ngăn kong, tơdrêng amê, pơkâ thế Chin phuh ai pơkâ thăm mơdêk hnoăng ăm mâu ngế gak ngăn kong ƀă khu pơkuâ tơdroăng gak ngăn kong dêi mâu khu pơkuâ kong vâ mơdêk châ tơƀrê tung pơkuâ gâk ngăn kong.

A Sa Ly tơplôu ƀă tơbleăng