Hơnăm kố, Dak Lak pêi luâ pơkâ ‘na tăng cheăng pêi ƀă lăm pêi cheăng a kong têa ê.  Kố  cho tíu ki tơƀrê tung tơdroăng hnê tối, tơbleăng tơdroăng cheăng pêi, châ tối a hneăng hôp mơgêi tơdroăng cheăng mê, xua Khu xiâm ngăn mố đô̆i tro rong ƀă rêh ối pơlê pơla dêi kong pơlê Dak Lak tơkŭm po a kơxê hâi lơ 16/12. Tiô tơdroăng ăm ‘nâi ing hneăng Hôp, hơnăm 2022, lâp tung kong pơlê hiăng kum ăm 41 rơpâu 250 ngế ai cheăng pêi, ƀă 103,12% tâng vâ pơchông ƀă tơdroăng pơkâ ƀă 1 rơpâu 472 ngế hiăng lăm cheăng a kong têa ê,  tơ‘mô ƀă 106% tơdroăng pơcháu tung hơnăm. Kơxô̆ mơngế châ lăm cheăng a kong têa ê tiô tơdroăng tơhrâ pơla hơnăm 2018-2022 châ 5 rơpâu 372 ngế.

Pôa Nguyễn Văn Cường, Kăn xiâm phŏ ngăn ‘na tăng cheăng pêi kong pơlê Dak Lak ăm ‘nâi, mơhé xuân ối tơdjâk xua pơreăng COVID-19, kong pơlê hiăng po lối 80 Tơdroăng mơdró tăng cheăng pêi, hnê tơbleăng cheăng pêi, cho hơnăm ai kơxô̆ mơngế pêi cheăng hên má môi riân sap ing nah ta troh nôkố.