A rôh hôp, pôa Nguyễn Minh Chí, Kăn phŏ hnê ngăn Chiâk deăng ƀă mơnhông thôn pơlê dêi kong pơlê Dak Lak tối: 52 tíu mơ’no têa krúa tơdjuôm a thôn pơlê hiăng pơtê ôh tá mơ’no têa xếo ƀă hên tíu mơ’no têa krúa ki ê ai drêng ‘no drêng ôh xúa mơ’no bú sap 20% - 40% ki Rơ’jiu Việt Nam chêh tối mê tro ‘nâng.

Ki xiâm xua mâu tíu mơ’no têa krúa mê sap apoăng mơ’no liăn mơjiâng pro ing hên hơnăm hdrối nah, ôh tá hên kơxô̆ liăn ‘no, châ mơcháu ăm Vi ƀan hnê ngăn kuăn pơlê mâu cheăm lơ mâu khu rak ngăn dêi thôn mê ki rak ngăn têa, la mâu ki pơkuâ ngăn mê ôh tá rơkê ôh tá hlê ‘na tơdroăng cheăng. Tơdroăng rak ngăn ‘mâi rơnêu vâ tối ôh tá hlo ngăn, ôh tá rơnêu ki klâi. Klêi tâng Teăng mâ kơvâ ngăn ‘na Chiâk deăng tối nhên, pôa Nguyễn Tuấn Hà, Kăn phŏ hnê ngăn Vi ƀan kong pơlê Dak Lak pơkâ thế Khu xiâm ngăn chiâk deăng ƀă mơnhông thôn pơlê.

Vi ƀan hnê ngăn kuăn pơlê mâu cheăm, tơring tung kong pơlê thế séa ngăn mâu tíu kuăn pơlê ối ki ai pro têa krúa xua mâu tíu mơ’no têa hiăng tơ’nhiê vâ ăm liăn ‘mâi rơnêi pro, vâ rĕng ai têa mơ’no ăm kuăn pơlê, malối cho tung pơla tô mơdrăng ó môi tiah nôkố.