-Ô pôa, tơdroăng rah xo, krếo droh rơtăm mot pro mô đô̆i hơnăm 2023 dêi kong pơlê Dak Lak ai tơdroăng ki lâi ki nếo?

Đăi tă Lê Văn Hùng: Tơdroăng rah xo droh rơtăm pro mô đô̆i hơnăm 2023 mê nôkố xuân pêi pro tiô Luât pro mô đô̆i hơnăm 2015. Laga, tơdroăng rah xo, krếo droh rơtăm pro mô đô̆i hơnăm 2023 ai tơdroăng ki nếo mê cho Chin phuh hiăng tơbleăng Pơkâ kơxô̆ 37 hâi lơ 6/6/2022 ‘mâi rơnêu, tơ’nôm mâu troăng dêi Pơkâ 120 hâi lơ 9/10/2013 pơkâ pơxâu phâk tơdroăng pro xôi ƀă liăn tung kơvâ cheăng, kơvâ ki kal.

Pơtối mê, kơlo pơxâu phâk tơdroăng pro xôi phâk liăn ƀă tơdroăng rah xo, krếo kuăn pơlê mot pro mô đôi cho hên. Ƀă kố xuân cho môi tung mâu troăng pêi vâ kơdroh, pro tơniăn tơdroăng ví kơtâu hmuâ ôh tá vâ pro mô đô̆i.

Ƀă châ pêi pro nhên, ƀă tơdroăng châ tơƀrê, hơnăm 2022, ví hmuâ ôh tá vâ khăm ivá lăm pro mô đô̆i cho 103 ngế rơtăm laga, hơnăm 2023 kố mê ví hmuâ ôh tá vâ khăm ivá lăm pro mô đô̆i bu u ối 2 ngế rơtăm. Mê cho tơdroăng ki nếo, ki eăng tung tơdroăng rah xo, krếo droh rơtăm pro mô đô̆i hơnăm 2023.

-Tơdroăng rah xo, krếo droh rơtăm mot pro mô đô̆i hơnăm 2023 dêi kong pơlê Dak Lak ai mâu tơdroăng tơ’lêi ƀă pá puât klâi, ô pôa?

Đăi tă Lê Văn Hùng: Tơdroăng rah xo, krếo droh rơtăm mot pro mô đô̆i hơnăm 2023 dêi kong pơlê ‘na tơ’lêi hlâu cho châ tơmâng tŏng kum pơkuâ, hnê mơhno tơdrêng dêi Khu kăn pơkuâ hnê ngăn Đảng, Hô̆i đong kuăn pơlê, Vi ƀan kuăn pơlê, tơdroăng ki veăng dêi Khu, kơvâ cheăng, khu râ kăn pơkuâ hnê ngăn cheăng Đảng, khu râ kăn pơkuâ mâu râ, ing thôn, pơlê, tôh kơphô̆ troh râ cheăm, râ tơring, râ kong pơlê. Ing mê, hiăng mơdêk hiâm tuăn kuăn pơlê châ hlê plĕng, ki rơhêng vâ tối cho kuăn pơlê tung hơnăm hbrâ vâ mot pro mô đô̆i.

Mơnhên hnoăng, tơdroăng cheăng, phiu ro dêi rêm ngế droh rơtăm drêng châ pro mô đô̆i xuân môi tiah pro kŏng an kuăn pơlê.

Laga, xuân ai mâu tơdroăng pá puât, má môi cho tơdroăng nah tơná cho mơngế tơkŭm tung tơdroăng mơnhông mơdêk cheăng kâ, hên rơtăm pêi cheăng kâ hơngế a kơpong hngêi kơmăi kơmok. Xua mê, tơdroăng krếo rơtăm troh khăm ivá, pêi pro hnoăng cheăng pro mô đô̆i dêi khu râ kăn pơkuâ cheăng Đảng, khu râ kăn pơkuâ mâu râ xuân trâm hên pá puât.

Má péa nếo, ivá dêi rơtăm nôkố cho kơdroh hên, xua tro pơreăng ‘na mâ, mơheăm kơtâu têi, plâi nuih. Ki rơhêng vâ tối, mâu rơtăm ôu drôu ƀiêr hên, klêi mê mâu pơkeăng pro plâi nuih kơtâu têi, pro mơheăm kơtâu têi, pro ăm hô̆i đong khăm ngăn dêi tơring tối mơgêi trâm hên pá puât.

-Ô vâi krâ nhŏng o ƀă pú hmâ, kong pơlê Dak Lak hiăng ai mâu troăng hbrâ môi tiah lâi ăm leh pơcháu, tơdah mô đô̆i hơnăm 2023?

Đăi tă Lê Văn Hùng: Tiô Pơkâ dêi Chin phuh pơcháu ăm kong pơlê Dak Lak hơnăm 2023 cho rah xo 2.968 droh rơtăm. Tung mê ai 2.502 pêi pro hnoăng cheăng lêng, ai 2 ngế kơdrâi. Ƀă 466 ngế rơtăm pêi pro hnoăng cheăng veăng tung Kŏng an kuăn pơlê, ai 1 ngế kơdrâi. Vâ pêi kêi đeăng lĕm ăm leh pơcháu tơdah lêng a mâu tơring, kơ koan hnê mơhno má môi cho Khu xiâm pơkuâ lêng kong pơlê hiăng tơbleăng Hô̆i đong rah xo mô đô̆i hnê mơhno Hô̆i đong rah xo mô đô̆i dêi 15 tơring, pơlê kong krâm, pơlê kong kơdrâm thăm ‘nâi ki dâi lĕm, pơkuâ rơtăm tung hơnăm pro mô đô̆i.

Hnê mơhno mâu tơring, ki má lối cho Khu hnê mơhno cheăng lêng mâu tơring pro lĕm tro tơdroăng hbrâ, pơtâp mâu tơdroăng xiâm vâ pêi pro leh pơcháu tơdah lêng kân krip, kơtăng, cho hâi phiu ro lo lăm pro mô đô̆i dêi kuăn pơlê mâu hdroâng kuăn ngo kong pơlê. Tơdrêng amê, hnê mơhno khu râ kăn pơkuâ cheăng Đảng, khu râ kăn pơkuâ cheăm mâu râ veăng pêi, pêi tơtro tơdroăng troăng hơlâ tŏng kum parŏng ăm khu mô đô̆i, ki rơhêng vâ tối cho lăm kơ-êng, mơhnhôk mâu kuăn pơlê hmiân tuăn, hbrâ rơnáu vâ lo lăm pro mô đô̆i hơnăm 2023.

-Ê, mơnê kô Đăi tă Lê Văn Hùng!