VOV4.Xơ Đăng - Troh nôkố, lối 90% kơxô̆ rơpŏng kơtiê, vâ chê kơtiê a kong pơlê Dak Nông hiăng châ mung liăn kơjo vâ mơnhông mơdêk cheăng kâ. Nôkố kong pơlê xuân dế pơtối mơdêk ăm kơxô̆ liăn tŏng kum troh ƀă kuăn pơlê, kum vâi krâ nhŏng o ‘mâi mơnhông cheăng kâ klêi kơ’nâi pơreăng COVID-19 hiăng châ hbrâ mơdât.

Troh tâi khế 6/2022, tâi tâng kơxô̆ liăn dêi mâu tơdroăng ăm mung tŏng kum a kong pơlê Dak Nông hiăng pêi pro châ 3.640 rơtal liăn, tâk vâ chê 15% tâng vâ pơchông ƀă apoăng hơnăm. Kố cho tơdroăng ki mơdêk hên má môi sap ing hdrối nah troh nôkố.

Dak Nông ai hên liăn kơjo ăm mâu kơtiê

Pôa Đào Thái Hòa, kăn pơkuâ Hngêi rak liăn tŏng kum rêh ối pơlê pơla tíu pêi cheăng a kong pơlê Dak Nông, ăm ‘nâi, hngêi rak liăn hiăng séa ngăn vâ chê 1.600 tôh kơdĭng ƀă mung a pơlê, cheăm, pro tơ’lêi hlâu ăm kuăn pơlê châ mung rĕng má môi, tơdrêng amê hlối séa ngăn, hnê vâi krâ nhŏng o xúa kơxô̆ liăn mung tơƀrê.

Ƀă tơdroăng ki ôh tá ăm rơpŏng kơtiê, vâ chê kơtiê ki lâ ôh tá ai liăn vâ pêi kâ, hngêi rak liăn tơrŭm ƀă mâu khu râ, kơvâ cheăng, kong pơlê, pêi pro séa ngăn rêm ngế ăm mung ki nhên tơrêm pơlê, cheăm xing xoăng teăm tơdrêng kơxô̆ liăn.

Katarina Nga tơplôu ƀă tơbleăng