A kong pơlê Dak Nông, mâu kăn ƀă kuăn pơlê dế tơkôm ngăn tơdroăng tơkêa bro ƀa kong pơlê dế hbrâ vâ  tơbleăng pro tơdroăng tơkêa bro drêng hiăng châ kĭ. Công Bắc, ngế chêh hlá tơbeăng dêi Rơ’jíu Việt Nam kơpong Tây Nguyên ai chêh tơdroăng mê.

Pôa Nguyễn Quang Vinh, ối a tôh 1, thôn 3, cheăm Nhân Cơ, tơring Dak Lak, kong pơlê Dak Nông phiu ro drêng Tơdroăng tơkêa ‘no liăn bro troăng kân ing peăng kơnhŏng troh peăng hdroh peăng mâ hâi lâ troăng ki tơkâ luâ Gia Nghĩa (Dak Nông) – Chơn Thành (Bình Phước) hiăng châ Vi [an pơkuâ Kuô̆k hô̆i môi tuăn pơtroh ăm Kuô̆k hô̆i ki ngăn, pơkâ troăng ‘no liăn pêi cheăng a hneăng má 7, khế 5 la ngiâ. Pôa Vinh tơngah khât troăng kân kố kô rĕng châ kĭ, tơbleăng, bro klêi vâ kuăn pơlê dêi kong pơlê Dak Nông tối krê châ prôk, lăm tê tê mơdró, Tây Nguyên tối tơdjuôm châ tơ’lêi hlâu tâ. Mâu kế tơmeăm pêi lo ing chiâk môi tiah kơphế tiu, sầu riêng ƀă hên ki ê ki kuăn pơlê môi tiah pôa Vinh kố pêi lo, kô châ tê tơ’lêi hlâu tâ, yă tê tơniăn tâ, pro tơ’lêi hlâu vâ cheăng kâ, tơdroăng rêh ối mơnhông tơtêk.

“Á tơngah Kuô̆k hô̆i rĕng kĭ tơdroăng tơkêa kố. Drêng ai troăng kâ prôk tơdrăng tơkâ luâ mê tơniăn hlối tơdroăng pơto chơ tơmeăm. Troăng prôk hiăng klêi ah mê cheăng kâ, tơdroăng rêh ối mơnhông rơdêi tâ nếo, tơdroăng cheăng ƀă kơmăi kơmok, pêi chiâk deăng, tối tơdjuôm mâu tơmeăm kô tơ’lêi hlâu tâ. Troăng kân kố kô pro pơxúa hên ăm kuăn pơlê’’.

Pôa Lê Văn Chiến,  Ngế cheăng tung pơkuâ ngăn Đảng, Kăn phŏ hnê ngăn ki ai mâ đi đo dêi Vi ƀan hnê ngăn kong pơlê Dak Nông ăm ‘nâi, Dak Nông tối krê, kơpong Tây Nguyên tối tơdjuôm cho kơpong ki pêt hên tơmeăm ing chiâk deăng kum ăm tơdroăng ki tê ngi kong têa ê ƀă mơjiâng bro, uâ pơliê. Kố xuân cho kơpong ki pêt tơmeăm kal má  môi ƀă mâu kơvâ cheăng pêi ƀă kơmăi kơmok, ki xiâm môi cho kơvâ boxit-alumin-nhôm. Laga, Tây Nguyên xuân ối cho kơpong ki thông ‘na mơnhông cheăng kâ rêh ối pơlê pơla. Xiâm kối cho xua hngêi trăng troăng klông ối pá. Ôh ti ai kơno têa kơxĭ, ôh ti ai troăng rơxế lơ treng, lâp kơpong rơhêng vâ mơnhông bu cho tơkôm to a troăng prôk chêng châ tơmâng ngăn, ‘no liăn bro.

Pôa Lê Văn Chiến tối tơdêi, Troăng kân ing peăng kơnhŏng troh peăng hdroh peăng mâ hâi lâ troăng ki tơkâ luâ Gia Nghĩa (Dak Nông) – Chơn Thành (Bình Phước) kô veăng kum kal khât tung tơdroăng ki tŏng kum mâu tơdroăng pá puât ‘na hngêi trăng troăng prôk, prôk lăm troh a peăng hdroh, troăng kân kố kô tơkoh a troăng kân Chơn Thành – Pơlê kong kân Hồ Chí Minh. Tơrôu tâk peăng kơnhŏng, kố kô cho tíu ki pơxiâm vâ bro troăng kân tơkâ luâ Tây Nguyên, ing Dak Nông luâ Dak Lak, Gia Lai, Kon Tum, tơdjêp ƀă peăng tơdế tơnêi têa ƀă tơkoh ƀă troăng kân ing peăng kơnhŏng troh peăng hdroh. Tơdjêp tâi tâng kơpong kô pro tơnêi tơníu mơnhông nếo, ivá mơdêk cheăng kâ rêh ối pơlê  pơla, ăm đak Nông ƀă kơpong Tây Nguyên. Ƀă ki kal môi tiah mê, kong pơlê Dak Nông hiăng hbrâ rơnáu nhên, hbrâ rơnáu mâu tơdroăng vâ tơbleăng tơ-ƀrê.

“Kong pơlê ngin xuân tơbleăng mâu hvêa chêng prôk ki kal vâ hbrâ rơnáu pêi pro tơdroăng tơkêa. Ngin hiăng chêh pro mâu hlá mơéa ƀă hbrâ mâu kơxô̆ liăn tiô tơdroăng ki hnê mơhno dêi Chin phuh cho kong pơlê Dak Nông veăng tơlo 1 rơpâu rơtal liăn mê Dak Nông hiăng hbrâ rơnáu. Krê hnoăng cheăng ki kal tâ nếo cho rôu mâu xiâm loăng, gu tơnêi bro tơbăng mê ngin xuân hiăng hbrâ rơnáu’’.

Tiô túa pơkâ, troăng kân Gia Nghĩa – Chơn Thành chiâng vâ ăm 6 toăng rơxế kơtâu. Hneăng ki xoăng ‘no liăn bro ƀă ki xŏn 128,8 km, chiâng 4 toăng rơxế kơtâu, rôu mâu xiâm loăng, gu tơnêi ăm tơbăng môi xôh 6 troăng rơxế. Apoăng tâi tâng kơxô̆ liăn hrê ăm tơdroăng tơkêa kố dâng 25.540 rơtal liăn, tung mê tơdế cho kơxô̆ liăn tơnêi têa, tơdế cho kơxô̆ liăn xua tơnêi têa tí tăng .

Krê a kong pơlê Dak Nông, troăng kân prôk tơkâ luâ ai ki xŏn 27,8 km ki xiâm cho prôk tơkâ luâ tơring Dak Rlâp, tâi tâng ƀăng tơnêi xo tơvêh dâng 526 ha kal xoăng vêh pro pơlê ăm 252 rơpŏng. Pôa Phan Anh Tuấn, kăn pơkuâ ngăn Đảng tơring Dak Rlâp, kong pơlê Dak Nông ăm ‘nâi, pêi pro hnê mơhno dêi Khu pơkuâ ngăn Đảng, Vi ƀan hnê ngăn kong pơlê, tá khu pơkuâ tơdroăng kal kí dêi tơring hiăng veăng vâ hbrâ rơnáu ăm tơdroăng tơkêa. Tung tơdroăng ki troăng prôk dêi tơdroăng tơkêa, tơring hiăng ngăn, pơkâ 6 kơpong pro pơlê ối, 10 tíu ai tơmeăm, 8 tíu ki ok hvât tơmeăm. Tơring xuân hiăng hnê mơhno mâu khu râ, kơvâ cheăng mâu cheăm tơrŭm ngăn, chêh mâu tơnêi tơníu, loăng pêt, prá alâi, kế tơmeăm tung tơdroăng pơkâ vâ pro troăng, hbrâ rơnáu ăm tơdroăng ki rôu mâu loăng pêt, gu ăm tơnêi ăm tơbăng.

“Pêi pro hnê mơhno dêi kong pơlê mê ngin hiăng mơjiâng Khu mơhnhôk, hnê tối ƀă xuân hiăng mơjiâng mâu tôh. Tâi Tâng mâu cheăm tơring, mâu đảng ƀô̆ cheăm, bêng, pơlê kân, khu gâk kring,khu lêng, mê nếo măt trâ̆n, đoàn thêh pơrá veăng. Kố cho môi hnoăng cheăng ki kân, tá khu pơkuâ tơdroăng kal kí athế veăng pêi, hnê mơhno kơtăng, pro tiah lâi chiâng ăm kuăn pơlê châ  môi tuăn’’.

Dak Nông hiăng hbrâ rơnáu kơhnâ hbrâ rơnáu mâu tơdroăng vâ drêng troăng prôk Gia Nghĩa – Chơn Thành châ kĭ kô rĕng châ tơbleăng. Tơdroăng ki Dak Nông hbrâ rơnáu ăm tơdroăng tơkêa hiăng ăm hlo ki rơhêng vâ mơnhông cheăng kâ rêh ối pơlê  pơla ó rơdêi dêi kong pơlê.