VOV4.Xơ Đăng - Khu pơkuâ hdroâng kuăn ngo, Hô̆i đong kuăn pơlê kong pơlê Dak Nông nếo tơkŭm séa ngăn ‘na tơdroăng rêh ối dêi vâi krâ hdroâng kuăn ngo hiăng hluăn  ing kơtiê tung kong pơlê hneăng hơnăm 2019 – 2021. Ing xiâm rêi séa ngăn nhên, Hô̆i đong kuăn pơlê kong pơlê Dak Nông pơkâ thế Vi ƀan kuăn pơlê kong pơlê hnê mơhno mâu tíu cheăng, kơvâ cheăng, kong pơlê tơrŭm krá tơniăn, tơdâng tơ’mô ƀă pêi pro tŭm mâu troăng hơlâ tŏng kum mơnhông mơdêk cheăng kâ – rêh ối pơlê pơla, xăm kơklêa kơdroh kơtiê dêi Tơnêi têa; tơtrŏng rŭm, pêi pro tơdrêng mâu troăng hơlâ tŏng kum vâ mơnhông tơ’nôm châ tơƀrê.

Tơdrêng amê, tơkŭm hriăn plĕng, tơbleăng mâu troăng hơlâ, tơdroăng ki phá tơ-ê ăm rơpŏng kơtiê cho mơngế hdroâng kuăn ngo. Nôkố lâp kong pơlê ai vâ chê 18.300 rơpŏng kơtiê, châ lối 11% tung tâi tâng kơxô̆ rơpŏng kuăn pơlê. Tung mê, rơpŏng kơtiê cho vâi krâ hdroâng kuăn ngo vâ chê 12.800 rơpŏng, châ vâ chê 28% tâi tâng kơxô̆ rơpŏng hdroâng kuăn ngo.

A Sa Ly tơplôu ƀă tơbleăng