A tơdế tíu dế pêi pro Tơdroăng tơkêa pro Plông kân tơdế pơlê kong kơdrâm Gia Nghĩa, chât toăng rơxế dế prôk vêh, gu tơbăng tơnêi. Pôa Trương Công Tiến, Ngế pơkuâ tíu mơjiâng pro tơmeăm khoăng long Gia Nghĩa, Kŏng ti tơlo liăn mơjiâng pro tơmeăm khoăng Phú Hiển Vinh, ăm ‘nâi, tíu pêi cheăng dế mơdoh pêi tung pơla kong tô mơdrăng lĕm vâ rĕng pro klêi tơmeăm khoăng.

“Nôkố hiăng mot tung rơnó mơdrăng, tíu pêi cheăng ngin hiăng tơrŭm ƀă khu xiâm pơkuâ ‘no liăn cheăng kô tơkŭm kơmăi kơmok hbrâ mâu ngế pêi vâ pêi rĕng klêi, tơniăn troh tâi lơ 31/12/2022 kô pê klêi mâu tíu hyô ngăn ƀă mâu tíu gu tơbêng tơnêi ki u ối”.

T

Pôa Hồ Sỹ Điệp, Kăn phŏ rak ngăn tơdroăng tơkêa ‘no liăn cheăng mơjiâng tơmeăm khoăng kong pơlê Dak Nông ăm ‘nâi, Tơdroăng tơkêa bro Plông kân tơdế pơlê kong kơdrâm Gia Nghĩa ai tâi tâng kơxô̆ liăn ‘no mơjiâng pro 400 rơtal liăn, mơjiâng pro pơla hơnăm 2022 - 2025. Kơxô̆ liăn ‘no pro hơnăm 2022 ai 54 rơtal liăn. Mơhé kố cho tơmeăm khoăng ki xiâm dêi kong pơlê la trâm hên tơdroăng ki pá ing tơdroăng gu tơbăng tơnêi troh kĭ hlá mơ-éa kơchuâ  chêh tíu mơjiâng pro,  xoăng liăn pêi pro… Nôkố mâu tơdroăng ối tơvâ tơvân hiăng châ lêi tah vâ mơjiâng pro tơmeăm khoăng:  

“Rôh apoăng pêi tơdroăng cheăng hnê tối thế mâu tíu pêi cheăng rĕng mơjiâng pro. ‘Na tơdroăng gu tơbăng tơnêi mê nôkố hiăng pê klêi pơcháu ăm Ngế xiâm pơkuâ  mơjiâng pro hâi lơ 15/11 kô tơbleăng pêi’’.

Hơnăm 2022  tâi tâng kơxô̆ liăn ‘no mơjiâng pro tơmeăm khoăng dêi kong pơlê Dak Nông ai 2.783,517 rơtal liăn. Riân troh mơ’nui khế 10, kong pơlê hiăng xo dâng tơdế tơdroăng pơkâ pêi. Ki xiâm khoh hrá xua tung pơla pêi pro mâu tơdroăng tơkêa bro hồ sơ pro hlá mơ-éa ton hâi nếô klêi ƀă hlối tơvâ hên tơdroăng tung pơla gu tơbăng tơnêi.

Pôa Lê Văn Chiến, Kăn phŏ hnê ngăn Vi ƀan kong pơlê Dak Nông, ăm ‘nâi, mơdêk rĕng xo liăn ngân, kong pơlê hiăng pơtroh liăn ing mâu tơdroăng tơkêa bro ôh tá kâi pêi klêi ăm a mâu tơdroăng tơkêa bro hiăng pê klêi; hnê tối ăm mâu khu ‘no liăn mơjiâng pro, mâu khu ‘no liăn mơjiâng pro pơ’lêh dêi rơpó pêi plâ hâi măng, pêi pro a rơnó mơdrăng; ƀă pro vâ rĕng klêi tah mâu tơdroăng xơpá tơvâ tơvân tung chêl thiăn liăn xua ‘mâi xĕn hngêi trăng tơnêi tíu. Dak Nông tơhrâ kô xo liăn ngân châ lối 95% tiô pơkâ kơxô̆ liăn ki vâ ăm:

“Hơnăm kố, Dak Nông pơxiâm mơjiâng pro tơmeăm khoăng hên, mâu tơmeăm khoăng ki ai liăn ‘no pêi hên, châ vâ chê tơdế tung tâi tâng kơxô̆ liăn ‘no mơjiâng tơmeăm khoăng tơnêi têa dêi hơnăm. Mâu tơmeăm khoăng mê kal thế ai pơla ki hbrâ hdrối vâ ‘no liăn mơjiâng pro, mê troh nôkố tâi tâng mâu tơmeăm khoăng dế pro,ƀă kô xo liăn ngân vâ pêi pro tung khế 11, khế 12.

Drêng mâu tơmeăm khoăng mê hiăng klêi rah châ tơbleăng mơjiâng pro, mê tơdroăng xo liăn ngân ‘no pêi kô tâk há. Ƀă ngin tơhrâ ƀă Chin phuh, hơnăm kố kô xo liăn ngân vâ ’no mơjiâng pro mê lối 95% kơxô̆ liăn ‘no pêi pro.