Hiăng 7 hơnăm klêi kơ’nâi Chin phuh ai Pơkâ 100 ‘na mơjiâng ƀă pơkuâ hngêi ối pơlê pơla, troh nôkố kong pơlê Dak Nông nếo bu ai môi tơdroăng tơkêa bro châ pêi pro laga tá hâi ai ivá, dế séa ngăn pơtê tơdroăng tơkêa bro. Tơdroăng mơjiâng hngêi ối pơlê pơla tung kong pơlê dế trâm hên pá puât. Pôa Nguyễn Văn Nam, Kăn phŏ Khu pơkuâ mơjiâng pro kế tơmeăm khoăng kong pơlê Dak Nông tối ăm ‘nâi, troh nôkố, tung kong pơlê nếo bu pêi pro môi tơdroăng tơkêa bro hngêi ối pơlê pơla kân vâ chê 18.000 met karê, ai 127 toăng hngêi.

Klêi kơ’nâi 7 hơnăm, Chin phuh ai Pơkâ 100 ‘na mơjiâng ƀă pơkuâ hngêi ối pơlê pơla, a Dak Nông nếo pêi pro tá hâi kêi đeăng 1 tơdroăng tơkêa bro

Tơdroăng tơkêa bro kố a bêng Nghĩa Tân, pơlê kong kơdrâm Gia Nghĩa, ai tâi tâng kơlo mơ’no liăn cheăng 139 rơtal liăn. Klêi kơ’nâi 5 hơnăm pêi pro, 3 xôh pơ’lêh pơkâ troăng hơlâ mơ’no liăn cheăng, pơ’lêh khu mơ’no liăn cheăng ƀă mơdêk kơlo mơ’no liăn cheăng tâk 162 rơtal liăn, tơdroăng tơkêa bro nếo kêi đeăng châ 16 toăng hngêi, 28 toăng hngêi ki ê dế mơjiâng pro tá hâi kêi.

Thăm nếo, tơdroăng pêi pro apoăng troh nôkố xuân ối ai hên tơdroăng tơvâ tơvân, pro xôi ƀă dế châ séa ngăn vâ pơtê lôi tơdroăng tơkêa bro. Mơnhên tâi tâng, pôa Nam tối tơdroăng mơjiâng pro hngêi ối tung pơlê kong kơdrâm nôkố cho pá puât. Môi iâ xua kong pơlê ối kơtiê, tá hâi liăn ngân vâ pro lơ tŏng kum ăm khu tê mơdró po rơdâ pêi pro mâu tơdroăng tơkêa bro.

Ki ê, mê mâu khu mơ’no liăn cheăng tá hâi tơmâng hên troh kơvâ kố a kong pơlê xua mâu kơpong hngêi kơmăi kơmok tá hâi mơnhông mơdêk, tơdroăng kal hngêi ối a pơlê pơla ối iâ.