Mot a rơnó tô mơdrăng hơnăm kố, Kŏng ti On tơhrik Dak Lak hiăng pêi pro tơdrêng hên troăng vâ tơniăn xing xoăng on tơhrik tơniăn, loi tơngah, kum mơnhông cheăng kâ – rêh ối pơlê pơla kong pơlê. Tiô tối hdrối, hơnăm kố, ivá on tơhrik tung kong pơlê Dak Nông tâk 10%, ƀă dâng 135 MW. Vâ ƀeăn ƀĕng tâ tung pêi cheăng, mơdêk ki loi tơngah mơ’no ăm on tơhrik, Kŏng ti hiăng séa ngăn ƀă teăng, tơ’nôm mâu troăng kơxái, mâu tơmeăm mơ’no tơpâ a troăng on tơhrik, mơdêk ivá kơmăi axoăng on tơhrik; pêi pro tơdjêp mơ’no on tơhrik ing hơngế, kơdroh chôu hía on tơhrik drêng mơ’no tơpâ lơ rơnêu on tơhrik tơ’nhê.

Troh nôkố, tâi tâng 7 kơmăi klâ xoăng on tơhrik 110kV ƀă kơmăi mơ’no tơpâ trung thê̆ a Dak Nông hiăng châ pêi pro ing tíu xiâm on tơhrik, pơtối tơ’nôm, mơnhên tơ’nôm on tơhrik tiô rêm kơpong vâ pêi pro tơtro tâ, ôh tá ăm ai tơdroăng lối hngăm pro hía on tơhrik. Kŏng ti xuân xing xoăng khu ngế gâk pêi cheăng vâ teăm tơdrêng châ hlo, rơnêu tâng ai tơdroăng ki tơ’nhê troăng kơxái on tơhrik.