VOV4.Xơ Đăng - A pơkâ 08 tơbleăng ăm pêi pro hâi lơ 28/3, Chin phuh pơkâ tŏng kum rêm ngế 500 rơpâu liăn/khế, hâi khế tŏng kum ki vâ hên 3 khế ƀă mơngế pêi cheăng tung khu tê mơdró a kơpong hngêi kơmăi kơmok, kơpong mơjiâng pro kế tơmeăm khoăng lơ kơpong cheăng kâ ki xiâm dế ối mung, ối hngêi mung pơtân sap hâi lơ 1/2 troh lơ 30/6.

Pôa Vũ Trọng Bình, Kăn pơkuâ Kơ koan xiâm ‘na cheăng pêi ối tung Khu xiâm pơkuâ cheăng pêi mô đô̆i rong ƀă pơlê pơla, tối ăm ‘nâi: mơhé ngế ki lâi pêi cheăng dế pêi cheăng tung mâu khu tê mơdró, tíu tê mơdró, mơjiâng tơmeăm khoăng ƀă ai kĭ tơkêa pêi cheăng sap ing môi khế tơngi klêng, tơdrêng amê dế ối a hngêi mung ối pơtân, kô ối tung khu châ kum kơxô̆ liăn kố, ôh tá pơrah tơkêa mơnúa pêi cheăng lơ hiăng pêi cheăng khât.

Xuân tiô pôa Bình, tiô tối hdrối, kơxô̆ liăn tŏng kum tiô Pơkâ 08 dêi Chin phuh ‘na tŏng kum kơxô̆ liăn mung hngêi ối ăm mơngế pêi cheăng tơdjâk troh dâng 3 rơtuh 500 rơpâu ngế ƀă tâi tâng kơxô̆ liăn châ mơ’no cho 6.600 rơtal liăn.

A Sa Ly tơplôu ƀă tơbleăng