Hâi lơ 1/12, Đông mô đô̆i gak tơkăng kong Ea Hleo (Mô đô̆i gak tơkăng kong kong pơlê Dak Lak) tơkŭm po leh phiu ro hiăng mơjiâng pro kêi đeăng tơmeăm khoăng ‘’Bâ eăng kơpong tơkăng kong’’ cheăm tơkăng kong Ia Lốp, tơring Ea Súp, kong pơlê Dak Lak. Tơmeăm mơjiâng pro kơnâ 70 rơtuh liăn, ai loăng trăng meăm thĕp ƀă 40 to pul on xúa on tơhrik mâ hâi a troăng kân xŏn 2 km. Kố cho tơmeăm ‘’Bâ eăng kơpong tơkăng kong’’ má 4 xua Đông mô đô̆i gak tơkăng kong Ea Hleo tơrŭm ƀă Khu ki pleăng hnoăng cheăng NDG (pơlê kong kân Hồ Chí Minh) mơjiâng pro a cheăm Ia Lốp.

Xuân tung hâi lơ 1/12, Đông mô đô̆i gâk tơkăng kong Ea Hleo ƀă khu ki pleăng hnoăng cheăng NDG hiăng diâp 40 kơxuô tơmeăm, rêm kơxuô kơnâ 150 rơpâu liăn ăm mâu rơpŏng ai tơdroăng rêh ối pá puât a cheăm Ia Lốp. Roh kố, Khu xiâm pơkuâ mô đô̆i gâk tơkăng kong kong pơlê Dak Lak diâp 100 hlá cơ Tơnêi têa ăm kuăn pơlê.