VOV4.Xơ Đăng - Mâu hâi ki kố, hên tơdroăng cheăng rak ngăn, tŏng kum Têt ăm mơngế kơtiê, hdroâng kuăn ngo ki iâ mơngế ai tơdroăng rêh ối xahpá dế châ po tung lâp lu kong pơlê Thừa Thiên Huế. Mâu kế tơmeăm ki kum a rơnó hơngui kố cho tơtô khât kum vâi krâ-nhŏng o koh tơdah hơnăm nếo. Khu chêh hlá tơbeăng cheăng tung Rơ’jíu Việt Nam ai chêh tối ‘na tơdroăng kố a tơring Nam Đông, kong pơlê Thừa Thiến Huế.

To dêi hngêi nếo a mâu hâi ki achê Têt Nhâm Dần, on veăng nâ Lê Thị Tốt a thôn 4, cheăm Hương Hữu, tơring Nam Đông, kong pơlê Thừa Thiên Huế kơdrâ môi tiah tơdroăng ki ôh tá xê khât. Tung to lâi hâi kố, on veăng nâ pêi viâ, mơgrúa dêi hngêi trăng klêng hía klêng tê, ngăn dêi toăng hngêi nếo la hiâm mơno pêng păm to tơdroăng ki hơniâp ro. Ƀă hên rơpŏng, mơni kố ôh tá xê tơdroăng ki xơpá klâi drêng pro môi toăng hngêi râ má 4 ki krá kâk, la ƀă rơpŏng nâ Tốt vâ châ pro môi toăng hngêi ki mơtiah kố cho tơdroăng ki tơmiât sap ing ton.

Nâ Tốt tối, on veăng nâ xo dêi rơpó hơnăm 2008, troh hơnăm 2010 mê lo ối krê. Châ vâi krâ nhŏng o tung thôn pơlê, ngế ki ‘nâ kum ăm loăng, ngế ki ‘nâ kum ăm tôl, prế on veăng mơjiâng pro hngêi ối pơtân vâ ai tíu ối drêng kong tô, kong mêi. Lối chât hơnăm hdrối nah, liăn pêi lo ing tơdroăng ki lăm pêi cheăng vâi dêi ngế kơnốu tơ’nôm ƀă tơdroăng ki pêi lo liăn sap ing to lâi sào chiâk dêi nâ ƀă păn roăng 2 ngế kuăn hriâm xuân hiăng ôh tá bê tŭm tối klâi troh tơdroăng ki pro hngêi.

Xua mê, drêng châ Vi ƀan Măt trâ̆n tơring Nam Đông kum 40 rơtuh liăn, on veăng nâ mung tơ’nôm 50 rơtuh liăn vâ pro môi toăng hngêi râ má 4 ki chía rơdâ, lĕm kâk. Nâ Tốt tối: “Hdrối nah rơpŏng má ai hngêi ki kŭn, troh rơnó mê khía mơhot hmâ kơchoh, ôh tá chiâng ối. Châ Tơnêi têa kum ăm hngêi ối môi tiah kố rơpŏng má phiu ro khât. Hơnăm kố tơdah Têt hơniâp ro tâ tâng vâ pơchông ƀă mâu hơnăm hdrối nah”.

Kuăn pơlê cheăm Hương Hữu, Nam Đông xo tơmeăm Têt Nhâm Dần

Ôh ti xê krê to rơpŏng nâ Tốt châ kâ Têt tung toăng hngêi ki nếo, mâu hâi ki achê kố, lối 10 to toăng hngêi dêi Vi ƀan Măt trâ̆n Tơnêi têa tơring Nam Đông ƀă mâu tíu pêi cheăng, khu tơrŭm mâu ngế krê tŏng kum xuân dế pro klêi vâ teăm pơcháu ăm vâi krâ nhŏng o hdrối rơnó hơngui nếo. Rêm toăng châ tŏng kum sap ing 30 troh 60 rơtuh liăn; khu kăn pơkuâ ƀă vâi krâ nhŏng o tung pơlê, cheăm tŏng kum hâi pêi cheăng mơjiâng pro.

Pakĭng diâp hngêi hiâm tuăn tơrŭm ăm rơpŏng ki ai troăng hơlâ tŏng kum, mâu ngế kơtiê xơpá ‘na hngêi ối; khu kăn pơkuâ cheăm, tơring ối séa ngăn, ‘nâi nhên tơdroăng rêh ối dêi mâu ngế ki ai troăng hơlâ tŏng kum, mâu ngế ki ai tơdroăng rêh ối xơpá, tro tơdjâk xua pơreăng COVID-19, rơpŏng kơtiê, rơpŏng hdroâng kuăn ngo ki tro kong mê khía mơhot têa kân lân lu, pơreăng tâ tú, kơklêa drêng báu tá hâi teăm tum ƀă hên ki ê vâ teăm tŏng kum phái, kế kâ ƀă hbru tơmeăm, rak vế tơniăn hngêi ki lâi xuân ai Têt phâi tơtô.

Pôa Ra Rương Lương, kăn phŏ hnê ngăn Vi ƀan cheăm Hương Hữu, môi tung mâu cheăm ki xơpá ƀă 95% cho hdroâng kuăn ngo Cơ-tu dêi tơring Nam Đông, kong pơlê Thừa Thiên Huế ăm ‘nâi, mâu hâi ki achê Têt ai hên khu tơrŭm, mâu ngế ki hiâm mơno hơ-ui troh pôu, hbru tơmeăm Têt ăm kuăn pơlê a cheăm:

“Tơdroăng ki tŏng kum ăm rơpŏng ki ai troăng hơlâ tŏng kum, rơpŏng kơtiê, malối cho rơpŏng hdroâng kuăn ngo trâm pá tung rôh Têt kố, Vi ƀan hnê ngăn cheăm hiăng chê inâi, tơkŭm hbru tơmeăm Têt ăm mâu ngế ki châ troăng hơlâ tŏng kum, mâu rơpŏng kơtiê, mâu rơpŏng trâm pá a cheăm”.

Khu lo tŏng veăng kong pơlê Thừa Thiên Huế hbru tơmeăm Têt ăm mâu ngế ki chó chêng, tơvê kŏng

Tơring Nam Đông, kong pơlê Thừa Thiên Huế ai lối 27 rơpâu ngế, tung mê 45% kuăn pơlê cho hdroâng kuăn ngo. Vâ rak tơniăn ăm vâi krâ nhŏng o bô bố xuân ai Têt tơniăn hơniâp, rơtế ƀă kế tơmeăm dêi kăn xiâm hnê ngăn tơnêi têa ƀă dêi kong pơlê Thừa Thiên Huế, Vi ƀan hnê ngăn tơring Nam Đông xuân hbrâ lối 4,5 tâ̆n phái ƀă 200 hnoăng tơmeăm, rêm hnoăng 500 rơpâu liăn hbru ăm rơpŏng xơpá.

Pakĭng mê, hên khu tơrŭm, mâu ngế krê ki ai hiâm mơno hơ-ui xuân hiăng lăm pôu, hbru lối hrĭng hnoăng tơmeăm ăm mâu ngế ki chó chêng tơvê kŏng, mâu ngế kơtiê, mâu ngế ki ai tơdroăng rêh ối xơpá tro tơdjâk ing pơreăng COVID-19 a cheăm. Pôa Trần Quốc Phụng, Kăn hnê ngăn Vi ƀan tơring kong ngo Nam Đông, kong pơlê Thừa Thiên Huế ăm ‘nâi:

“Nôkố ai hên mâu khu tơrŭm, mâu khu ki ai hiâm mơno hơ-ui troh pôu, hbru tơmeăm ăm mâu ngế ki ai troăng hơlâ tŏng kum. Tung tơdroăng ki mê ngin kô séa ngăn xing xoăng mâu kế tơmeăm troh rêm rơpŏng kơtiê”.

Mâu hâi ki kố, hên khu rơxế ki chơ kế tơmeăm Têt rơtế ƀă tơdroăng ki pâ nhuô̆m lăm troh ƀă kuăn pơlê hdroâng kuăn ngo mâu tơring peăng kong ngo Nam Đông, A Lưới, kong pơlê Thừa Thiên Huế. Tơdroăng ki veăng tŏng kum tơdroăng ki pâ nhuô̆m dêi kuăn pơlê hiăng ƀă dế djâ rơnó hơngui tơtô troh ƀă rêm hngêi. Pôa Nguyễn Thanh Bình, kăn phŏ hnê ngăn Vi ƀan kong pơlê Thừa Thiên Huế ăm ‘nâi: Kong pơlê tơmâng ngăn tŏng kum mâu ngế ki ai troăng hơlâ tŏng kum, mâu ngế kơtiê ƀă kuăn pơlê hdroâng kuăn ngo vâ vâi krâ nhŏng o ai môi to Têt tơtôu, hơniâp ro.

“Tung pơla pơreăng tâ tú rơ-iô, pro ôh tá tơniăn, mâu rơpŏng ki ai troăng hơlâ tŏng kum, rơpŏng kơtiê ƀă rơpŏng mâu hdroâng kuăn ngo trâm hên xơpá ‘na kế kâ. Ngin xuân hiăng tơmâng ngăn vâ tŏng kum teăm tơdrêng ăm vâi krâ nhŏng o tung rôh Têt kố. Pakĭng mê, kong pơlê xuân hiăng mơdêk séa ngăn mâu rơpŏng kơtiê, rơpŏng ki ai hnoăng tơnêi têa, rơpŏng hdroâng kuăn ngo a tơring A Lưới ƀă Nam Đông ƀă pơcháu hnoăng cheăng ăm Vi ƀan hnê ngăn tơring A Lưới ƀă Nam Đông teăm tŏng kum vâ vâi krâ nhŏng o tơdah têt tơtô, ai tŭm kế tơmeăm.

VOV miền Trung

Katarina Nga tơplôu ƀă tơbleăng