Khu pơkuâ ngăn Đoân Droh rơtăm kong pơlê Dak Nông tơkŭm po leh hiăng pro klêi ƀă pơcháu tơmeăm khoăng droh rơtăm tâp trăng krâ On bâ eăng troăng pơlê a tơring Krông Nô. Tơmeăm khoăng mơjiâng pro mâu trăng on tơhrik xúa ing mâ hâi drô troăng kân xŏn 1km a bon R’Cập, cheăm Nâm Nung (tơring Krông Nô), tâi tâng kơnâ 125 rơtuh liăn xua Khu xiâm Đoân ƀă mâu khu mơdró tŏng kum.

Tơdroăng mơjiâng pro, kơxô̆ liăn ‘măn rak, ‘mâi rơnêu xua khu droh rơtăm cheăng ‘na kơvâ on tơhrik Dak Nông pro. Kố cho tơdroăng cheăng pêi ai pơxúa khât dêi mâu hơnăm ối nếo Dak Nông koh hâk ro hiăng klêi po hneăng hôp Đoân Droh rơtăm Kŏng sản Hồ Chí Minh rôh má 15; vâ po hneăng hôp mâu kăn Đoân Droh rơtăm lâp tơnêi têa rôh má 12, hneăng hơnăm 2022-2027.