VOV4.Xơ Đăng - Tiô tơdroăng pơkâ xiâm tơnêi têa ‘na kơdroh kơtiê krá tơniăn hơnăm 2022 nếo tơbleăng, Viƀan kong pơlê Gia Lai pơkâ mâu tơring, tíu cheăng pêi pro tơdâng mâu troăng vâ kơdroh 2% tung tâi tâng kơxô̆ rơpŏng kơtiê ƀă 3% kơxô̆ rơpŏng kơtiê mơngế hdroâng kuăn ngo.

Gia Lai tŏng kum kuăn pơlê kơdroh kơtiê krá tơniăn

Khu pơkuâ cheăng pêi – Mô đô̆i rong râ ƀă rêh ối pơlê pơla kong pơlê Gia Lai kô tơbleăng khu râ kăn pơkuâ, khu râ kăn pơkuâ hnê ngăn cheăng mơjiâng mâu troăng pêi ki nhên, tŏng kum rơpŏng kơtiê hlŭn ing kơtiê. Tơdrêng amê xúa châ tơƀrê mâu ngế pêi cheăng ing tơnêi têa; tơrŭm ƀă mâu mât trâ̆n, đoân theh, kal kí, rêh ối pơlê pơla mâu râ vâ mơhnhôk tơlo kơxô̆ liăn ing khu tê mơdró, pơlê pơla vâ mơ’no ăm mơngế kơtiê mơnhông mơdêk pêt mơjiâng tơmeăm khoăng. Tung mâu hơnăm hiăng hluâ, kong pơlê Gia Lai hiăng mơ’no lối 1.270 rơtal liăn ing liăn ngân, pêi pro hên tơdroăng tŏng kum mâu rơpŏng kơtiê hriâm cheăng pêi, pơhlêh hdrê pêt, mơnăn păn, rôe theh ƀaoh hiêm khăm pơlât, khăm pơlât tê kơtê.

A Sa Ly tơplôu ƀă tơbleăng