Hâi lơ 21/10, Vi ƀan Măt trâ̆n tơnêi têa Việt Nam kong pơlê Gia Lai tơkŭm po Hneăng hôp kheăn kơdeăn Kăn hnê ngăn Vi ƀan Măt trâ̆n râ cheăm ƀă Kăn pơkuâ Pêi cheăng Măt trâ̆n ki má môi kong pơlê Gia Lai hneăng hơnăm 2017 – 2022. Gia Lai nôkố ai 220 ngế Kăn hnê ngăn Vi ƀan Măt trâ̆n tơnêi têa Việt Nam râ cheăm ƀă 1.576 Kăn pơkuâ tơdroăng cheăng Măt trâ̆n. Mơnhông mơdêk hnoăng ƀă pơlê pơla, 5 hơnăm hiăng hluâ, mâu kăn ƀô̆ măt trâ̆n đi đo thăm tơrŭm rơtế mâu khu cheăng a kơ koan pơtâng tối, mơhnhôk kuăn pơlê veăng tơlo, tŏng kum, thăm mơhnhôk, veăng tơlo vâ mơjiâng pro hngêi ối, tŏng kum tăng cheăng pêi ăm rơpŏng kơtiê, pleăng tơnêi pro troăng mơjiâng thôn pơlê nếo; pơtâng tối mơhnhôk vâi krâ kuăn pơlê hdroâng kuăn ngo pơ’lêh troăng tơmiât pêi vâ hluăn ing kơtiê krá tơniăn.

Tâi tâng a hneăng hôp

Hên kăn ƀô̆ ai mâu troăng pêi rơkê, troăng pêi tơmiât rơkê, châ tơƀrê tung pơtâng tối, mơhnhôk, tơkŭm mâu râ kuăn pơlê mơnhông mơdêk ivá rŭm môi tuăn hdroâng mơngế. Roh kố, Vi ƀan kong pơlê Gia Lai ƀă Vi ƀan Măt trâ̆n tơnêi têa Việt Nam kong pơlê Gia Lai diâp ƀâng kheăn kơdeăn ăm 92 ngế krê kơhnâ rơkê pêi cheăng.