Lối 3 khế kố, troh a 18 chôu sap hâi môi troh hâi pơtăm rêm măng tĭng, lâm hnê pơchuât, hnê chêh chư a Hngêi trung râ má môi Ngô Quyền (bêng Chi Lăng, pơlê kong kơdrâm Plei Ku hlo on eăng ƀă dế tâng idrâp pơchuât chư dêi mâu ki hriâm. Lâm hriâm mê ai 30 ngế ối a pơlê Ia Lang, bêng Chi Lăng, pơlê kong kơdrâm Plei Ku. Klêi hriâm chêh mâu ‘noăng chư ki cô chêh a kơ ƀăng, nâ H’ Thiếu, môi ngế nôu ai 3 ngế kuăn hriâm lâm hnê chư mê, tối:

“Hdrối nah, rơpŏng hngêi á kơtiê xơpá, pâ gá rĕng hlâ, tơdroăng rêh ối tung rơpŏng hngêi pá puât á ôh tá châ lăm hriâm, mê a ôh tá ’nâi chư. Pơla hdrối kố nah, châ thôn trưởng, bêng ƀă peăng hngêi trung troh mơhnhôk á thế mơ-eăm hriâm vâ ‘nâi chư. Mâu hâi apoăng hriâm chêh chư pá ‘nâng, kơtô kŏng chêh, la á vâ chiâng pơchuât, chiâng chêh, mê á mơ-eăm hriâm’’.

A lâm hriâm, jâ H’Lung (57 hơnăm, rơtế ối a pơlê Ia Lang, bêng Chi Lăng) xuân dế pơtâp chêh mâu ‘noăng chư ki kal thế chiâng. Jâ H’Lưng tối, xua hơnăm hiăng hên, hriâm chêh kơtô, tuăn tá ‘nâi rĕng chôu pâ vâ tối lot tâ mâu hơnăm ối nếo tâ tung lâm, la ƀă hiâm tuăn vâ ‘nâi kơdô mơ-eăm vâ dêi tơná pôi maluâ plong kol, jâ hiăng kơhnâ lăm troh a lâm hriâm. Nôkố jâ hiăng chiâng pơchuât, hiăng chiâng chêh inâi dêi tơná.

“Á ôh tá ‘nâi chư, ôh tá ‘nâi riân tinh ki kố ki mê, châ lăm hriâm ‘nâi pơchuât chư, ‘nâi chêh inâi tơná á ro ‘nâng, mơnê kơ cô hiăng hnê chư ăm á ƀă ăm rêm ngế”.

Tiô cô Dương Thị Kiếu- Hngêi trung râ má môi Ngô Quyền, bêng Chi Lăng, pơlê kong kơdrâm Plei KIu, klêi séa ngăn hâi teăm tŭm to lâi dêi Hngêi trung ăm hlo, pơlê Ia Lang ai dâng 100 ngế ôh tá ‘nâi chư. Drêng châ mơhnhôk lăm troh a lâm hriâm hên ngế ối xâu, ối kơxiâp xua hiăng kân hơnăm hiăng hên, mâu ki ‘nâ hiăng ôh tá xiâp tá khên, xâu tơná hriâm tá kâi mot tung tuăn ngôa. Laga, klêi troh a lâm hriâm to lâi khế, rêm ngế chiâng vâ, brôk dêi rơpó rế krâm tâ nếo lăm hriâm a lâm.

“Lâm hriâm ki hên cho mâu hiăng kân hơnăm hiăng hên, hdrối nah ôh tá châ lăm hriâm a hngêi trung, drêng troh akố hriâm chư ƀă vâi pá ‘nâng, la vâi rơhêng vâ hriâm mơhé kong hngíu, lơ kong mêi vâi xuân mơ-eăm troh a lâm hriâm tŭm.  Chôu chêh rêm ngế hiăng chiâng chêh 100% ‘na pơchuât tâng vâ tối ki hiăng chiâng pơchuât hleăng lĕm hiăng luâ tơdế kơxô̆ mơngế tung lâm’’.

Môi tiah mê, Hngêi trung râ má môi Lê Lai (cheăm Čư̆ Á, pơlê kong kơdrâm Plei Ku cho 1 tung 7 toăng hngêi trung hnê tung pơlê kong kơdrâm châ rah xo pêi tơdroăng hnê hriâm ƀă  hnê chêh chư ăm kuăn pơlê kơpong hdroâng kuăn ngo tiô Tơdroăng pơkâ dêi Tơnêi têa ‘na mơnhông cheăng kâ - rêh ối kơpong hdroâng kuăn ngo ƀă kong ngo pơla hơnăm 2021-2030.

Thái Lê Minh Tùng, Pơkuâ hngêi trung râ má môi Lê Lai tối, hngêi trung hiăng tơrŭm ƀă Vi ƀan cheăm Čư̆ Á ƀă mâu thôn, pơlê tí tăng ngăn kơxô̆ mơngế kuăn ngo ki ôh tá chiâng pơchuât hâi chiâng chêh sap 15 hơnăm troh 60 hơnăm, vâ mơhnhôk kuăn pơlê veăng hriâm.

“Hngêi trung xuân hiăng mơjiâng tôh lăm mơhnhôk thế mâu ngế lăm hriâm, mâu ngế xâp mâu ki 15 hơnăm troh 60 hơnăm ƀă troh nôkố hiăng ai 23 ngế lăm hriâm lâm hnê mâu ki ôh tá ‘nâi chư.Tơdroăng hnê mâu ngế ôh tá ‘nâi chư châ klâ 2 rôh, rôh má 1 ai 3 hneăng,  vâ tơ’mô 42 măng tĭng, tơ’mô tơrêm hneăng ai 315 tiết hnê, pơla rôh má 2 klâ chiâng 2 hneăng, tơ’mô ƀă khu lâm 4 ƀă lâm 5 mê hiăng klêi hriâm lâm hnê’’.

Krê tung hơnăm kố, Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Gia Lai kô tơrŭm ƀă Khu ngăn kuăn ngo ƀă mâu tíu pêi cheăng tơdjâk troh tí tăng ‘nâi plĕng ăm Vi ƀan kong pơlê klâ xoăng kơxô̆ liăn ăm mâu tơring cheăm vâ po 217 to lâm ăm lối 6 rơpâu 500 ngế hriâm. Pôa Nguyễn Văn Đông - Ngế pơkuâ ƀơrô ngăn hnê hriâm Hngêi trung râ má môi, Mầm non, Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Gia Lai, ăm ‘nâi:

“Kố cho tơdroăng pêi pro pơxúa ăm tơdroăng rêh ối dêi hdroâng kuăn ngo tối tơdjuôm ƀă Gia Lai tối krê châ mơdêk hlê plĕng ăm kuăn pơlê vâ ing mê kuăn pơlê hlê ‘nâi tơchĕng tơmiât xêh troh tơdroăng cheăng kâ vâ hluăn kơtiê, mơdêk tơƀrê tơdroăng rêh ối ăm tơná. Nôkố Tơdroăng kố hiăng châ xing xoăng ăm mâu tơring, pơlê kong krâm, kong kơdrâm, mâu tíu pêi cheăng hiăng tơkŭm mâu ngế hriâm vâ mâu ki hriâm hmâ  ƀă tơdroăng mê. Tung la ngiâ tơdroăng kố kô châ po rơdâ ƀă tơbleăng hnê a hên tơring cheăm’’.

Tiô pơkâ pêi pro Tơdroăng pơkâ dêi tơnêi têa mơnhông mơdêk cheăng kâ -rêh ối kơpong hdroâng kuăn ngo ƀă kong ngo pơla hơnăm 2021-2025, kong pơlê Gia Lai tơkŭm po 735 to lâm hnê pơchuât- chêh ăm vâ chê 23 rơpâu 500 ngế a 176 to cheăm.