VOV4.Xơ Đăng - Vi ƀan hnê ngăn kong pơlê Gia Lai nếo pơkâ tơdroăng pêi pro Tơdroăng pơkâ dêi Tơnêi têa Kơdroh kơtiê krá ton pơla hơnăm 2021 -2025. Ki xiâm dêi Túa pơkâ kố cho mơdêk kơdroh kơtiê tung hdroâng kuăn ngo, tŏng kum mơngế kơtiê tơkâ luâ kơlo rêh ối ƀă kơxô̆ rơpŏng kơdroh lối 3% rêm hơnăm. Pêi pro tiô Tơdroăng pơkâ tơnêi têa Kơdroh kơtiê krá ton pơla hơnăm 2021 -2025, Gia Lai mơ-eăm kơdroh kơxô̆ rơpŏng kơtiê dêi lâp kong pơlê 2%/hơnăm ƀă kdroh kơxô̆ rơpŏng kơtiê tung kuăn pơlê hdroâng kuăn ngo rêm hơnăm lối 3%.

Xúa rơkê ‘na khoa hok tung cheăng kâ kum vâi krâ nhŏng kơpong hdroâng kuăn rế hía rế hluăn ing kơtiê

Xuân tung pơla kố, tơdroăng kố kô tơbleăng 7 tơdroăng tơkêa, tung mê, ai mâu tơdroăng tơkêa cho: Tŏng kum ‘no liăn mơjiâng pro hngêi trăng, troăng klông, cheăng kâ, rêh ối pơlê pơla tơring kơtiê; tŏng kum mơnhông mơdêk cheăng kâ, hơ’lêh trếo lĕm; mơnhông hnê hriâm tơdroăng cheăng, cheăng pêi krá ton; kum hngêi ối ăm rơpŏng kơtiê, rơpŏng va chê kơtiê a mâu tơring kơtiê, tơdroăng kố ai tâi tâng kơxô̆ liăn ‘no lối 905 rơtal liăn.

VOV Tây Nguyên/Tơplôu: Katarina Nga