VOV4.Xơ Đăng - Vi ƀan hnê ngăn kong pơlê Gia Lai nếo pơkâ tơdroăng ki tối tơbleăng pêi pro Tơdroăng pơkâ kơxô̆ 23/NQ-CP hâi lơ 2/3/2022 dêi Chin phuh ‘na mơnhông mơdêk cheăng kâ kơpong tíu tơkăng kong tơnêi a kong pơlê. Kong pơlê Gia Lai ai 90 km troăng tơkăng kong tơkoh ƀă kong pơlê Ratanakiri, kong têa Kul. Kơpong tíu tơkăng kong dêi kong pơlê nôkố ai 7 to cheăm dêi 3 to tơring tơkăng kong, ƀă tâi tâng pơ’leăng mâ mơngế vâ chê 50 rơpâu ngế ối tung 20 to hdroâng kuăn ngo nhŏng o rơtế rêh ối.

Vâ tơbleăng hnoăng cheăng vâ rak vế mâu tơdroăng pơkâ hiăng châ mơ’no a Tơdroăng pơkâ kơxô̆ 23/NQ-CP dêi Chin phuh, Vi ƀan hnê ngăn kong pơlê pơkâ thế mâu khu râ, kơvâ cheăng tơkŭm mơjiâng tơdroăng ki kal vâ pêi pro tơdroăng pơkâ dêi túa pơkâ kố tơdrêng amê hlối hnê tối ƀă pêi pro mâu hlá mơéa luât ‘na tíu tơkăng kong ki Chin phuh péa tơnêi têa Việt Nam prếi Kul hiăng kĭ tơkêa.

Katarina Nga tơplôu ƀă tơbleăng