Tiô kơlo ki pơkâ, vâ gak ngăn 10 rơpâu ha kong a cheăm Ia Mơr, tơring Cư̆ Prông, mê Khu hnê mơhno rak ngăn kong Ia Mơr kal ai 17 ngế ki pêi cheăng. Maluâ ti mê, tung plâ hên hơnăm hdrối mê hía nah, lâp kơpong kố bu ai 12 ngế. Pêi cheăng tá kơhâi tá kơmăng a mâu tíu ki hmâ ai mơngế lăm tong ko kếo loăng tung kong, pro xôi luât dêi kong pơlê, la kơlo liăn khế dêi kăn ƀô̆, mâu ngế ki cheăng akố bu ai 5 troh 7 rơtuh liăn 1 ngế 1 khế. Pôa Đinh Văn Khẩn - Kăn pơkuâ ngăn kong rak kơnhŏng têa Ia Mơr tối, 1 tung 5 ngế dêi khu hiăng chêh hlá đơn pâ pơtê cheăng tung hơnăm 2022, la xuân tá hâi teăm ăm phep lo pơtê, tối nhên tiah kố:

“Hnoăng cheăng rak vế ngăn kong dế nôkố trâm hên xahpá, Khu hnê mơhno rak ngăn kong Ia Mơr thăm rế trâm pá tâ, achê rơchôa têa Ia Mơr. Ai 3 khu ki xiâm châ mơjiâng pro hno têa drô tung kong, kuăn pơlê hlo mê vâi tơbriât xo tơnêi pêi kâ. 2 ngế ki hiăng pâ lo pơtê cheăng. Nốkố, tâng pơtối ai mơngế pơtê kô ôh tá ai mơngế pêi cheăng”.

Pa puât, liăn khế iâ, mơngế ki gak ngăn kong ối trâm hên xahpá, xâu xía. Pôa Đinh Mạnh Phong, Kăn pơkuâ rak ngăn kong tơring Čư̆ Sê tối ăm ‘nâi tơ’nôm, dế nôkố, tâng vâ riân ngăn rêm ngế ai hnoăng cheăng rak ngăn 1 xá kong, tơdâng ƀă 1 rơpâu ha kong.

Kong kế, ngo ngối hơngế ing pơlê pơla, troăng prôk pá puât. Khu ‘mêi hmâ lăm tong kếo loăng tâng châ trâm khu rak ngăn kong vâi kô ti dât pâm, la khu rak vế ngăn kong bu iâ, ôh tá hbrâ rơnáu kơchăng hdrối:

“Hiăng ai to lâi ngế gak ngăn kong hiăng tro khu ‘mêi ti dât xiăn pâm, ing mê, pro vâi chiâng ôh tá tơniăn. Hnoăng cheăng dêi Khu pơkuâ rak ngăn kong xuân ôh tá ai ki klâi hên, drêng hlo ai khu ki tong kếo loăng mê vâi nếo tối tơbleăng. Môi tiah khu ki ngin pơkuâ ngăn kố, tiô tơdroăng pơkâ mê hmân ếo, tơmeăm ki vâ xúa xuân tá ti ai hên ki klâi, tí tăng tôm xo mâu tơmeăm vâi ki ton vâ dâi”.

A Gia Lai dế nôkố ai 22 Khu pơkuâ rak ngăn kong, vâ chê 500 ngế kăn ƀô̆, mơngế cheăng tâng vâ pơchông ngăn ƀă kơlo rak vế ngăn kong mê ối kal lối 200 ngế nếo. Mơngế rak ngăn kong ôh ta tŭm, la 2 hơnăm hdrối nah, ai lối  20 ngế hiăng pâ lo pơtê cheăng, lối chât ngế ki ê xuân tối vâ lo pơtê cheăng há.

Pôa Nguyễn Văn Hoan, Kăn phŏ hnê ngăn ‘na chiâk deăng ƀă mơnhông thôn pơlê tối ăm ‘nâi, kơvâ ki kố hiăng pơkâ pêi pro hên hnoăng cheăng vâ khŏm châ pơrâng mâu ngế ki gak ngăn kong, la ki xiâm cho tơdroăng ki tí tăng pơlông mơhnhôk vâi tê:

“Ki hdrối tâ, ngin hiăng mơhnhôk mâu kăn ƀô̆ mơ-eăm hâk git dêi tơdroăng cheăng, kơhnâ tung pơkuâ rak ngăn kong, tơdrêng amê, hnối tŏng kum tơ’lêi vâ hơ’lêh tíu cheăng dêi mâu kăn ƀô̆ a kơpong ing hơngế vâ kơdroh chôu phut, hâi khế ki hơ’lêh ƀă mơngế ki pêi cheăng a tíu ki hơngế, ing mê, tŏng kum ăm nhŏng o châ xúa mâu tơdroăng pêi ki nếo vâ nhŏng o kơhnâ tung pêi cheăng”.

Dế nôkố, Khu ngăn ‘na chiâk deăng ƀă mơnhông thôn pơlê dêi kong pơlê Gia Lai pơtối hnê mơhno tối ăm Vi ƀan hnê ngăn kong pơlê pâ thế Khu xiâm Đảng mơnhên ngăn, ‘mâi rơnêu túa ki tŏng kum, ‘mâi mơnhông túa pêi cheăng ƀă khu rak vế ngăn kong.