Kong pơlê Gia Lai hiăng tơkŭm po hneăng hôp mơgêi hnoăng cheăng ti tăng, tơkŭm kơxêng kiâ mô đô̆i ƀă mơnhên inâi kơxêng kiâ mô đô̆i ki tá hâi tŭm tơdroăng hơnăm 2022, troăng pêi hnoăng cheăng hơnăm 2023. A kong têa pú hmâ Kul, tung hơnăm kố, đô̆i K52 kong pơlê Gia Lai hiăng séa ngăn, ti tăng lối 101 tíu, pơlê ối tung 3 kong pơlê Ratanakiri, Stung Treng, Preah Vi Hear. Châ ‘nâi 81 tơdroăng ƀă tơkŭm châ 18 kơxêng kiâ mô đô̆i, mơdêk tâi tâng kơxô̆ kơxêng hiăng châ xo, djâ vêh a tơnêi têa sap hơnăm 2001 troh nôkố 1.446 kơxêng kiâ mô đô̆i.

Khu pú hên đô̆i K52 phiu ro châ diâp Mê dái ƀlêi trâng ối má pái dêi Kăn xiâm hnê ngăn tơnêi têa

Xuân tung hơnăm 2022, Đô̆i K52 hiăng ti tăng, tơkŭm châ 28 kơxêng kiâ mô đô̆i a mâu tơring tung kong pơlê. Tâi tâng mâu kơxêng kiâ mô đô̆i pơrá châ mâu kong pơlê rơtế mâu kơvâ cheăng tơkŭm po lăm ngăn, tơbâ hnoăng, ‘mé kân krip. Kong pơlê Gia Lai mơnhên hnoăng cheăng tung hơnăm 2023 mơ-eăm ti tăng tơkŭm sap ing 40 troh 60 kơxêng kiâ mô đô̆i. Pơtối pêi pro hnoăng cheăng ti tăng, tơkŭm kơxêng kiâ mô đô̆i pleăng hnoăng cheăng ƀă mơngế rơkê Việt Nam hlâ ing mâu rơxông tơplâ xâ a kong têa Kul, môi tuăn mâu troăng tơkŭm po pêi pro vâ ti tăng, tơkŭm ƀă mơnhên inâi kơxêng kiâ mô đô̆i tá hâi tŭm tơdroăng mâu hơnăm pơtối châ tơƀrê hên tâ.