Mâu hâi ki kố, mâu kơ koan, mâu tíu pơkuâ cheăng ki pro nhŏng o, mâu khu râ ki hơ-ui kum dế rơtế ƀă mâu khu râ, kơvâ cheăng, mâu tơring, cheăm tơkŭm po hên tơdroăng lăm pôu kơ-êng, hbruô tơmeăm, tŏng kum kế khoăng Têt ăm mâu kơtiê ƀă mâu rơpŏng hngêi ki xahpá a kong pơlê Dak Nông. Drêng troh hâi Têt Lo hơnăm nếo Qúy Mão, Khu lo tŏng veăng kong pơlê Dak Nông hiăng tơrŭm ƀă mâu khu ki kro mơdrŏng hiăng lăm diâp 1 rơpâu tơmeăm khoăng ăm kuăn pơlê ki ai tơdroăng rêh ối xahpá a 2 tơring kơpong hơngế kơhngo, cho Dak Glong ƀă Krông Nô.

Rêm tơmeăm mê kơâ châ 500 rơpâu liăn, hnối pơtroh rơkong rơkâu, tŏng kum, hơlêm pơxô̆, pói rơhêng vâ rêm ngế, rêm rơpŏng hngêi pơrá ai kế tơmeăm kâ Têt. Tơdrêng amê, a 5 tơring tung kong pơlê xuân hiăng tơkŭm po “Kơchơ hơ-ui kum” vâ tơbleăng mâu tơmeăm kâ ăm kuăn pơlê ki ai tơdroăng rêh ôí xahpá. Khu hnê mơhno hiăng xing xoăng 1 rơpâu phĭu liăn, 1 kơtâ phĭu mê kơnâ 600 rơpâu liăn vâ kuăn pơlê rôe xêh tơmeăm ki tơná vâ.

Khu ngăn ‘na tơrŭm pêi cheăng dêi kong pơlê Dak Nông tơkŭm po Tơdroăng “Têt tơkŭm - Rơnó Hơngui tơrŭm” ăm kŏng nhân, mơngế pêi cheăng ki ai tơdroăng rêh ối xahpá. Tơdroăng kố hiăng diâp lối hrĭng tơmeăm, tâi tâng kơnâ châ 180 rơtuh liăn, kum ăm kuăn pơlê ai tơmeăm khoăng vâ kâ Têt.