Pôa Lê Quốc Minh, Ngế chêh hlá tơbeăng, Ngế cheăng tung Tíu xiâm Đảng Kăn hnê ngăn Khu xiâm chêh hlá tơbeăng Việt Nam, Phŏ pơkuâ hnê cheăng Xiâm kal kí, Ngế pơkuâ xiâm Rah chêh Hlá tơbeăng Nhân dân ăm ‘nâi: Luâ rêm hneăng tơkŭm po tơ’noăng kâ pri chêh hlá tơbeăng tơnêi têa, tơdroăng ki tơxâng hâk ro má môi cho ki kơtăn hơngế pơla hlá tơbeăng Xiâm tơnêi têa ƀă mâu kong pơlê rế achê tâ. Ai mâu pri A cho mâu ngế chêh hlá tơbeăng kong pơlê lơ mâu kơ koan chêh hlá tơbeăng ki kŭn tê.

Tơdroăng chêh ƀai lăm tơ’noăng vâ tối tơdâng tơ’mô tâ. Tíu ki tơƀrê nếo cho kơ koan chêh hlá tơbeăng kong pơlê nôkố hiăng tơmâng hriăn chêh a hlá tơbeăng điê̆n tưh  tŭm tâ. Mâu tíu pêi cheăng mơ’no rơ’jíu, um tơvi kong pơlê xuân hiăng chiâng chêh (phóng sự) cho chêh mơnhên rơdâ châ tơƀrê. ‘Na tơkŭm po Leh mơhá Pri chêh hlá tơbeăng Tơnêi têa rôh má 18, pôa Lê Quốc Minh, Ngế chêh hlá tơbeăng tối:

“Hơnăm kố Leh mơhá pri chêh Hlá tơbeăng tơnêi têa châ tơkŭm po phá tơ-ê, tiô túa krê xêh. Ngin xo mơngế ki châ kâ pri mê ăm pro mơngế ki xiâm. Ngế ki xông lăm xo pri tâ phiu ro tung hiâm mơno ƀă hâk tơngăm tơná hiăng châ kâ pri.  Tá mơngế ki ối ‘nân ngăn xuân tâ phiu ro há ‘na mâu hnoăng hiăng châ pêi pro dêi vâi pú tơná hiăng châ pêi pro. Tơdroăng tơkŭm po túa tơkŭm ki nếo môi tiah mê kô hnê ăm mâu ngế ki hâi châ kâ pri ƀă mơnhông mâu ngế ki hiăng kâ pri xông xo pri vâ ăm pin hlo ki tơƀrê dêi Pri Hlá tơbeăng tơnêi têa tơxâng cho pri ki kal má môi dêi Tơnêi têa Việt Nam’’.

Tiô pôa Lê Quốc Minh, Ngế chêh hlá tơbeăng, Kăn hnê ngăn Khu xiâm chêh Hlá tơbeăng Việt Nam  tối, hlá tơbeăng nôkố kal pơhlêh ƀă hriăn plĕng đi đo tơdroăng ki nếo. Púi vâ mâu kơ koan chêh hlá tơbeăng kô pêi pro tro klêi tung tơdroăng pơhlêh kơxô̆, pơhlêh hriăn plĕng ki nếo, ‘nâi hriăn rơkê chêh hlá tơbeăng ƀă malối thế rêm hâi thăm tơmâng khât troh ki tơƀrê vâ rak mơngế ki ngăn, mơhnhôk mơngế ki hmâng ngăn rơhêng vâ ngăn, pơtối pêi hnoăng cheăng djâ troăng ahdrối tung tơdroăng tối ăm ‘nâi mâu tơdroăng ki hlê ăm pơlê pơla.

Pơla hdrối kố nah, mơhé trâm hên xơpá, pơloăng mơnúa, la Khu chêh hlá tơbeăng đi đo pê klêi mâu tơdroăng cheăng pơcháu ƀă ai hên tíu ki tơƀrê. Ing mê, veăng pêi klêi tơdroăng cheăng kal kí dêi Khu chêh Hlá tơbeăng Việt Nam tung mâu hơnăm hdrối:

“Sap apoăng hneăng troh nôkố, Đảng đoân, Khu kăn pơkuâ rak ngăn, Khu kăn pơkuâ cheăng Đảng ƀă Khu kăn pơchuâ cheăng ƀă Khu tơrŭm môi tuăn, hiăng vâ môi tuăn tơdroăng cheăng pơkuâ, hnê mơhno rêm râ Khu, tơdroăng cheăng pêi dêi khu dêi rêm râ Khu tung lâp tơnêi têa ai hên tíu ki pêi tơbrê, pơhlêh tơƀrê hên; teăm pêi pro tiô tuăn tơmiât, tơdroăng púi vâ dêi mâu ngế tung khu chêh hlá tơbeăng, tơkŭm tơleăng mơnhên tơniăn tuăn tơmiât, tơrŭm môi tuăn dêi rơpó’’.

Khu chêh Hlá tơbeăng Việt Nam nôkố ai lối 25.000 ngế tung khu dế pêi cheăng a 307 tíu pêi cheăng dêi rêm râ. Sap apoăng hneăng troh nôkố, Hngêi trung hnê chêh hlá tơbeăng dêi khu hiăng tơkŭm po lối 256 lâm hriâm tơ’nôm ăm vâ chê 9.000 ngế tung khu chêh hlá tơbeăng tung lâp tơnêi têa. Pakĭng mê ăm ‘nâi, rêm râ Khu sap Tíu xiâm troh kong pơlê hiăng mơjiâng lối 250 Hô̆i đong tơleăng mơnhên mâu tơdroăng xôi ‘na rơkong tơpui, tuăn tơmiât ‘na tơdroăng cheăng dêi mơngế chêh hlá tơbeăng Việt Nam ƀă hlối pêi cheăng rêm hâi, chiâng pêi tro tiô luât pơkâ, hiăng tơleăng teăm tơdrêng ƀă prokơtăng mâu tơdroăng pro xôi luât ƀă ‘na tuăn ngôa dêi mơnế pêi cheăng.

Nếo achê kố, a rôh pêi cheăng ƀă khu chêh hlá tơbeăng Việt Nam, pôa Nguyễn Trọng Nghiã, ngế pơkuâ khu hnê tơdroăng cheăng kal kí Xiâm tối nhên: tung la ngiâ, Đảng đoân Khu chêh Hlá tơbeăng Việt Nam kal pơtối tơmâng tơdroăng hnê hriâm kal kí, tuăn mơno vâ mơngế chêh hlá tơbeăng hlê trâu tơdroăng chêh hlá tơbeăng kăch măng, mơngế ki chêh hlá tơbeăng cho mơngế lêng ki djâ troăng ahdrối ‘na tuăn mơno - túa lĕm tro dêi Đảng; pơtối rak vê pêi tro hnoăng cheăng, tơdroăng cheăng, pê klêi tơƀrê mâu hnoăng cheăng kal kí châ Đảng, Tơnêi têa ƀă kuăn pơlê loi nhoăm, hnê pơcháu.

“Khu cheh Hlá tơbeăng Việt Nam kal tíu ki loi nhoăm, cho tíu ki kơnôm ‘na tơdroăng chêh vâ mâu kơ koan chêh hlá tơbeăng pơtối mơ-eăm, tăng pơhlêh tơná, ki khât chiâng tơdroăng ki kal tro, teăm tơdrêng, pêi pro tro tơdroăng cheăng tơnêi têa, cho tơdroăng rêh ối, ing mê pêi tro hnoăng cheăng troăng rơhlâ tuăn mơno, mơhnhôk môi tuăn dêi rơpó tung pơlê pơla, rak tơdroăng ăm ‘nâi ki kal, tơxâng loi ƀă mâu kuăn pơlê. Rêm ƀai chêh hlá tơbeăng thế cho môi ƀai ai túa lĕm tro, hnê hriâm. Rêm ngế chêh hlá tơbeăng thế cho môi ngế lêng ki tơplâ  ƀă tuăn ngôa ‘’ mâ hleăng tơdah, tuăn tơdrăng lĕm, chêh tro”, ƀĕng ƀeăn tung tơdroăng cheăng, khên tơplâ mơdât mâu ki pro xôi, rak tơniăn tơná hdrối ai mâu khu ‘mêi pơlông djâ pro tơdroăng tá tro”.

Drêng troh tơbâ 99 hơnăm Hâi Hlá tơbeăng Kăch măng Việt Nam, pôa Nguyễn Trọng Nghiã, Ngế pơkuâ cheăng kal kí xiâm rơkâu kơ Khu chêng Hlá tơbeăng Viêt Nam rế ton rế tơxâng cho khu tơrŭm cheăng kal kí - rêh ối pơlê pơla - tơdroăng cheăng pêi ki kal dêi lâp tơnêi têa, cho “Hgêi ối tơdjuôm’’ tơkŭm, tơrŭm môi tuăn dêi rơpó ƀă mâu ngế chêh hlá tơbeăng tung lâp tơnêi têa.